«سايلاۋ الدىنداعى ۇگىتتى ەرتە باستاعان بۇقارالىق اقپارات قۇرالدارى جاۋاپقا تارتىلىپ، ۇمىتكەردىڭ سايلاۋعا تۇسۋىنە تىيىم سالىنادى». بۇگىن ورتالىق سايلاۋ كوميسسياسىنىڭ مۇشەسى ءلاززات سۇلەيمەن وسىلاي دەدى.

ونىڭ ايتۋىنشا، ۇمىتكەرلەرگە ەفير ۋاقىتى، باسىلىم الاڭى سايلاۋ قورىنىڭ قارجىسىنا نەگىزدەلە وتىرىپ،  تەك كەلىسىم-شارت ارقىلى بەرىلەدى. ولاردىڭ قۇنى 7 ناۋرىزعا دەيىن جاريالاندى. 18 ناۋرىزداعى جاعداي بويىنشا ورتسايلاۋكوم 48 باق، ونىڭ ىشىندە 10 اقپاراتتىق اگەنتتىك، پورتالدار مەن سايتتار، 12 ايماقتىق جانە 13 رەسپۋبليكالىق گازەت، 5 ايماقتىق جانە 7 رەسپۋبليكالىق تەلەارنا مەن 7 راديو ارناسىن تىركەدى.

«ۇمىتكەر ەفيرگە نەمەسە باسىلىمعا شىعۋى ءۇشىن باق-قا جاريالانۋىن قاداعالايتىن باسشىلىق اتىنا جازباشا ءوتىنىش پەن كۋالىگىن ۇسىنۋى قاجەت. قر پرەزيدەنتتىگىنە ۇمىتكەرلەر جايىندا قانداي دا ءبىر ۇگىت-ناسيحات اقپارات شىعاتىن بولسا وندا مىندەتتى تۇردە قارجدىلاندىرىلۋ كوزى جازىلۋى ءتيىس. قر پرەزيدەنتتىگىنە ۇمىتكەرلەردىڭ ۇگىت-ناسيحات ماتەريالدارى تەك 2015 جىلدىڭ 26 ناۋرىزدان باستالىپ 24 ءساۋىر ساعات 00:00-گە دەيىنگى ارالىعىندا عانا جاريالانۋى كەرەك ەكەندىگىن ەسكەرەمىن. سايلاۋ الدى ۇگىتتىڭ جۇرگىزىلۋ ۋاقىتى رەسمي تۇردە جاريالانعانعا دەيىن ماتەريالدار جاريالانسا ول ارەكەت ۇمىتكەر ءۇشىن ونىڭ تىركەلگەندىگى تۋرالى شەشىمنىڭ قايتىپ الىنۋىنا، ال باق زاڭدى تۇردە سوت الدىندا جاۋاپقا تارتىلادى، - دەدى ورتالىق سايلاۋ كوميسسياسىنىڭ مۇشەسى ءلاززات سۇلەيمەن.

اباي-اقپارات.