كەشە قازاقستاننىڭ بۇرىنعى قورعانىس ءمينيسترى سەرىك احمەتوۆكە «كوررۋپتسيالىق سيپاتتا التى بىردەي قىلمىس جاساعان» دەگەن رەسمي ايىپ تاعىلدى.

«پروكۋراتۋرا قىلمىستىق ءىس بويىنشا تابىلعان دالەلدەردىڭ زاڭناماعا سايكەس جيناقتالعانىن تانىپ وتىر. سەرىك احمەتوۆكە قر قىلمىستىق كودەكسىنىڭ ءتورت بابى – اسا ءىرى كولەمدە پارا الۋ، اسا ءىرى كولەمدە بيۋدجەت قاراجاتىن ۇرلاۋ، قىزمەت بابىن اسىرا پايدالانۋ جانە زاڭسىز تۇردە كاسىپكەرلىك قىزمەتكە ارالاسۋ باپتارى بويىنشا ايىپ تاعىلىپ وتىر» دەيدى باستى باقىلاۋشى ورگاننىڭ وكىلدەرى.

س.احمەتوۆ رەسمي تۇردە سوتقا تارتىلعان ساتكە دەيىن ايىپتالۋشى رەتىندە قالا بەرەدى، سوسىن بارىپ سوتتالۋشى سانالادى. ۇيقاماقتا وتىرعان ەكس-مينيستر ءدال قازىر كولەمى 150 تومعا جەتكەن قىلمىستىق ءىس ماتەريالدارىمەن تانىسۋدا. ءىس بارىسىمەن تولىق تانىسىپ شىعۋعا 18 ساۋىرگە دەيىن ۋاقىت بەرىلىپ وتىر، سوسىن قىلمىستىق ءىس سوتقا كەتەدى.

تەرگەۋ نۇسقاسى بويىنشا، سەرىك احمەتوۆ پارا بەرۋشىگە جاردەمدەسكەنى ءۇشىن ودان 400 مىڭ دوللار كولەمىندە پارا العان. بۇعان قوسا، 2012 جىلى «سارىارقا» ارنايى ەكونوميكالىق ايماعى جانىنداعى «مەتاللۋرگيا-مەتاللووبرابوتكا» يندۋستريالدى پاركىنىڭ اۋماعىندا ينفراقۇرىلىم، ونىڭ ىشىندە كاناليزاتسيالىق جەلى قۇرىلىسى جۇرگىزىلگەن. جوبانىڭ قوسالقى مەردىگەرى – «تسەنترستروي-كومپلەكت نس» جشس قاراعاندى وبلىسى اكىمدىگىنىڭ باسشىسىمەن، اتاپ ايتقاندا، وبلىستىڭ ەكس-اكىمى احمەتوۆپەن قۇپيا كەلىسىم بويىنشا ساپالى چەح جابدىقتارىن باسقا ارزان قۇرال-سايماندارمەن اۋىستىرا سالعان. جابدىقتاردى الماستىرۋ بارىسىندا پايدا بولعان 1 ميلليارد 200 ميلليونداي تەڭگە باعا ايىرماسىن لاۋازىمدى تۇلعالار توبى ءوزارا يەلەنىپ العان. ۇرلىقتى جاسىرۋ ءۇشىن، تەرگەۋشىلەردىڭ نۇسقاسىنا سەنسەك، كادىمگى بيۋدجەت قارجىسىن قىمقىرۋ سحەماسى قولدانىلعان: دەلدال فيرمالار جۇيەسى قۇرىلىپ، الگى «ارتىلعان اقشا» سولاردىڭ ەسەپ-شوتىنا ءتۇسىپ وتىرعان.

ەستەرىڭىزگە سالا كەتەيىك، سەرىك احمەتوۆ ەڭبەك جولىن قاراعاندى وبلىسىندا باستاعان-دى. ول الدىمەن تەمىرتاۋ قالاسىندا، سوسىن قاراعاندى وبلىسىندا اكىمدىك قىزمەت اتقاردى. 2011 جىلى قازاقستان پرەمەر-ءمينيسترىنىڭ ءبىرىنشى ورىنباسارى بولدى، ال 2012 جىلدان باستاپ مينيسترلەر كابينەتىن باسقاردى. 2014 جىلى قازاقستاننىڭ قورعانىس ءمينيسترى قىزمەتىنە تاعايىندالىپ، جارتى جىل جۇمىس ىستەدى، سوسىن ءوز ەركىمەن وتستاۆكاعا كەتتى.

Abai.kz