پۋتين بيلىگىنە قارسى كۇشتەردىڭ جەتەكشىسى، رەسەيدەگى بەدەلدى ساياسي تۇلعا – بوريس نەمتسوۆ كىسى قولىنان قازا تاپتى. نەمتسوۆتى بەلگىسىز بىرەۋ اتىپ ولتىرگەن دەپ حابارلاۋدا اقپارات كوزدەرى. نەمتسوۆتى وققا بايلاعان جەردەن قىلمىسكەر تەز جاسىرىنىپ ۇلگەرگەن. قازىر ول ىزدەۋدە. وپپوزيتسيونەردىڭ ءولىمىن «ەلدەگى احۋالدى ۋشىقتىرۋ ءۇشىن بىرەۋلەر قاساقانا جاسادى» دەپ مالىمدەگەن رف پرەزيدەنتى پۋتين بولعان ءىستى ءوزى قاتاڭ باقىلايتىندىعىن ايتۋدا.

بوريس نەمتسوۆ كوز جۇمارىنان بىرەر ساعات بۇرىن «ەحو موسكۆى» راديوسىنا سۇحبات بەرگەن كورىنەدى. نەمتسوۆتان سۇحبات العان جۋرناليست تە، راديونىڭ باس ديرەكتورى دا ونىڭ ادەتتەگىدەي سەرگەك ءارى كوڭىلدى بولعانىن ەسكە الادى. «ەفيردەن سوڭ، - دەيدى راديو قىزمەتكەرلەرى، - نەمتسوۆ بىزگە «ۆەسنا» شەرۋىنىڭ قالاي وتەتىندىگى تۋرالى اڭگىمەلەدى».

نەمتسوۆ 1 ناۋرىز كۇنى شەرۋ وتەتىن ماسكەۋدەگى مارينو اۋدانىنىنا قاراي ۇلكەن تاسكوپىر ارقىلى ازىرگە اتى-ءجونى جاريا ەتىلە قويماعان ۋكراين قىزىمەن سويلەسىپ كەلە جاتادى. تاپ وسى كەزدە تۇتقيىلدان شىعا كەلگەن اۆتوكولىكتەن وعان قاراي وق جاۋىپ كەتكەن. جەتى رەت اتىلعان وقتىڭ تورتەۋى بوريس ەفيمۇلىنا دارىپ، ول قازا تاپقان. نەمتسوۆ اتىلعان جەردە بولعان قىز تەرگەۋگە الىندى.

ەستەرىڭىزگە سالىپ قويعانىمىز ءجون شىعار، ەرتەڭ ماسكەۋدە وپپوزيتسيالىق كۇشتەردىڭ ۇلكەن شەرۋى وتپەك بولىپ جوسپارلانعان. جيىن ۇستىندە بوريس نەمتسوۆ رەسەي قارۋلى جاساقتارىنىڭ ۋكرايناداعى تىنىشسىز ايماقتاردا قانداي ارەكەتتەر جاساپ جۇرگەنى تۋرالى بايانداما جاساماق نيەتتە ەكەندىگىن سەرىكتەرىنە ەسكەرتىپتى. نەمتسوۆتىڭ بۇل ەسكەرتۋىن جۋرناليستەرگە رەسەيلىك ساياساتكەر يليا ياشين حابارلاعان. وسى جايتتى ايتا وتىرىپ ياشين: «بوريس ەفيمۇلى «پۋتين جانە سوعىس» دەگەن كىتاپ جازىپ ءجۇر ەدى» دەيدى.

مارقۇم بوريس نەمتسوۆ ەلتسيننىڭ تۇسىندا بيلىككە ارالاسقان تۇلعالاردىڭ ءبىرى ەدى. جاڭاشىلدىعىمەن، دەموكراتتىعىمەن كوزگە تۇسەتىن. ول مەملەكەتتىك قىزمەت باسپالداعىندا پرەمەر-ءمينيستردىڭ ورىنباسارى دەيتىن لاۋازىمعا دەيىن كوتەرىلدى. پۋتين بيلىككە كەلگەن سوڭ قىزمەتتەن مۇلدە الاستالىپ، سولشىل كۇشتەردىڭ ليدەرلىگىن ءوز قولىنا الدى. نەمتسوۆ ۇنەمى ءپۋتيننىڭ سىنشىسى بولدى. رەسەي گازەتتەرىنە بەرگەن ءبىر سۇحباتىندا بوريس ەفيمۇلى: «انام ماعان حابارلاسقان سايىن، «سەن پۋتين تۋرالى قاتتى سويلەمە. ول سەنى ولتىرەدى» دەگەندى ءجيى ايتادى» دەپتى. «ال، ءسىز پۋتيننەن قورقاسىز با؟» دەگەن جۋرناليستەردىڭ سۇراعىنا: ء«يا، ازداپ سەسكەنەم. الايدا، قورىقپايمىن. ەگەر مەن ودان قورقاتىن بولسام وپپوزيتسيانى باسقارماس ەدىم عوي» دەپ اعىنان اقتارىلعان ەكەن.

ءىستىڭ اق-قاراسى انىقتالعانشا، نەمتسوۆتىڭ ءولىمىن پۋتيننەن كورۋ قاتە دەپ جازۋدا ورىس باسىلىمدارى. ايتكەنمەن دە، "نەمتسوۆتى كىم اتتى؟ نەگە اتتى؟" دەگەن سۇراق رەسەيدە كۇن تارتىبىنەن ءتۇسىپ قالمايتىن شىعار. «ۆەسنا» مارشى قارالى جيىنعا ۇلاساتىن بولدى.

P.S. بوريس نەمتسوۆ قازىرگى رەسەيدەگى دەموكراتيالىق كوزقاراسىنان تانباي كەلە جاتقان ساناۋلى ساياساتكەردىڭ ءبىرى بولاتىن. ول ەلدەگى ءدال قازىرگى جاعدايعا قاتىستى سىندارلى پىكىرىن ۇنەمى جاريالاپ، ورىس بيلىگىن ءپۋتينسىز كورگىسى كەلەتىنىن جاسىرمايتىن ەدى. ورىس قوعامىنىڭ قۇردىمعا بەت العانىن بيىك مىنبەردەن اشىق ايتا بىلگەن كوزى اشىق ادام رەتىندە دە نەمتسوۆ اتقارۋشى بيلىكتىڭ قىسپاعىنا ۇشىراپ وتىردى...

ەلۋ بەس جاستاعى وپپوزيتسيونەردىڭ ءولىمى بۇگىنگى رەسەيدەگى ساياسي ديكتاتۋرانىڭ شارىقتاۋ شەگىنە جەتكەنىن كورسەتىپ قانا قويماي، جوعارعى ەليتا اراسىندا قىلمىستىق ارەكەتتەردىڭ بەلەڭ العانىن دا بايقاتسا كەرەك...

Abai. kz