قازاقستان مەن رەسەي اراسىنداعى مەملەكەتتىك شەكارانى دەماركاتسيالاۋعا قاتىستى ايتىلعان اڭگىمە قوعام تاراپىنان قىزۋ تالقىعا تۇسكەن بولاتىن. ( قاراڭىز: http://abai.kz/post/view?id=2917 «جەر الماسۋ» ما، الدە جەرگە جارماسۋ ما؟)

تىلگە تيەك بولعان جايتتىڭ ۇشىعىن كورشى ەلدىڭ ومبى وبلىسىنىڭ گۋبەرناتورى ۆيكتور نازاروۆ پەن سولتۇستىك قازاقستان وبلىسىنىڭ اكىمى ەرىك سۇلتانوۆ ەكەۋارا كەزدەسۋ بارىسىندا شىعارعان ەدى. «بىزدە رۋسسكايا پوليانا اتتى ەلدى مەكەن بار، ودان وبلىس ورتالىعى – ومبىعا شىعاتىن جول قازاقستان رەسپۋبليكاسىنىڭ اۋماعىنان وتەدى. قازىر ەكى ەل اراسىندا شەكارانى دەماركاتسيالاۋ جۇمىستارى ءجۇرىپ جاتىر، ەگەر ول ءدال بۇرىنعى كەلىسىممەن، ءدال قازىرگى شەكارا سىزىعىمەن بەكىتىلسە، وندا ءبىز، رەسەي جاعى، رۋسسكايا پولياناعا بارا الماي قالامىز» دەپ مۇڭ شاققان ومبى گۋبەرناتورى نازاروۆ ەكى مەملەكەت اراسىندا كەلىسىم جاساۋدى، اۋماقتىڭ ەرەكشەلىكتەرگە وراي جەر ايىرباستاۋدى ۇسىندى. بۇل ءسوز ايتىلعالى بەرى قازاق قوعامى تاراپىنان قارسىلىق تانىتۋشىلاردىڭ قاراسى كوبەيۋدە. ال، بيلىك تاراپىنان وسى ماسەلەگە ناقتى جاۋاپ ايتىلماي كەلگەن بولاتىن. تەك وتكەن كۇندەرى عانا ەلىمىزدىڭ سىرتقى ساياسات ۆەدموستۆوسى باستاماعا وراي پىكىر ءبىلدىردى.

سىرتقى ىستەر مينيسترلىگىنىڭ رەسمي سايتىندا جاريالانعان مالىمدەمەدە: «رەسەي فەدەراتسياسى، ومبى وبلىسىنىڭ گۋبەرناتورى ۆيكتور نازاروۆ پەن سولتۇستىك قازاقستان وبلىسىنىڭ اكىمى ەرىك سۇلتانوۆتىڭ ۇسىنىسىنا قاتىستى قوعام تاراپىنان قىزۋ تالقىعا تۇسكەن تاقىرىپپەن تانىسا كەلە، ەكى مەملەكەت اراسىنداعى جەر الماسۋعا قاتىستى قانداي دا ءبىر جۇمىستار مەملەكەتتىك شەكارانى بەلگىلەۋگە قاتىستى قازاقستان – رەسەي بىرىككەن كوميسسيانىڭ قۇزىرەتىنە جاتاتىندىعىن حابارلايمىز» دەلىنگەن.

ءسىم تاراتقان اقپاراتتىڭ توقەتەرى مىناۋ: رەسەي فەدەراتسياسى قازاقستان تاراپىنا شەكارا ماڭىنداعى اۋماقتاردى دەماركاتسيالاۋ تۋرالى ءوتىنىش ايتپاعان. «رەسەي تاراپىنان ونداي ۇسىنىس بولا قالعان جاعدايدا، ماسەلەنى قاراۋ مەن شەشۋ حالىقارالىق تاجىريبە مەن تالاپتار شەڭبەرىندە جۇزەگە اسادى» دەلىنگەن سىرتقى ىستەر مينسترلىگىنىڭ اقپاراتىندا.

قالاي بولعاندا دا، سىرتقى ساياسات ۆەدوموستۆوسى تاراتقان مالىمدەمەنى قازاق قوعامىنداعى الىپ-قاشپا اڭگىمەلەرگە بەرىلگەن العاشقى رەسمي جاۋاپ دەپ قابىلداۋعا بولادى. ازىرگە...

سوندىقتان، بۇل تاقىرىپ ەلىمىزدەگى بارلىق باق-تىڭ باستى نازارىندا بولىپ قالا بەرمەك.

اباي.kz