«رەسەي ءرۋبلىنءىڭ قۇنسىزدانۋى قازاقستان ەكونوميكاسىنا اسەر ەتپەيدى» دەگەن ءۋاجدىڭ ەرتەگى ەكەنىن ۋاقىت كورسەتىپ وتىر. جاعدايدىڭ اسقىنۋعا اينالعاندىعىنان بولار، ەل ۇكىمەتى وتاندىق نارىققا شەكتەۋسىز اعىلىپ كەلىپ جاتقان كورشى ەل ونىمدەرىنە توسقاۋىل قويۋدىڭ قامىنا كىرىستى. بۇل تۋرالى اقپاراتتى ورىس ءباسپاسوزى ءزارلى كەكەسىنمەن تاراتىپ جاتىر.

«كوممەرسانت» باسىلىمىنىڭ جازۋىنشا، استانا تاراپى رەسەيدەن تاسىمالداناتىن مۇناي ونىمدەرى، اۆتوكولىك قۇرىلدارى، قۇرىلىس زاتتارى جانە تاماق ونەركاسىبى ونىمدەرىنە ەمبارگو ەنگىزۋدى كوزدەۋدە. دەمەك، قازاقستاندىق نارىقتاعى كورشى ەلدىڭ تاۋار اينالىمى ءرۋبلدىڭ قۇلاۋىنان كەيىن جەرگىلىكتى وندىرۋشىلەردىڭ تىنىسىن تارىلتىپ جىبەرگەن. قازىرگى كەزدە ورىس ۆاليۋتاسىنىڭ تەڭگە باعامىمەن العانداعى قۇنسىزدانۋى 47 پايىزدى قۇرايدى. بۇل شەكارا اسىپ كەلەتىن ءونىمنىڭ قۇنىن جەرگىلىكتى تاۋاردىڭ باعاسىنان الدەقايدا تومەندەتۋگە ءماجبۇر ەتەدى.

ايتالىق، رەسەيلىك فەرمەر وندىرگەن تاۋىق ەتى قازاقستاندىق شارۋانىڭ قوراسىندا سويىلعان مەكيەنگە قاراعاندا اجەپتاۋىر ارزان. نارىقتاعى زەرتتەۋ رەسەيلىك تاۋىق ەتىنىڭ باعاسى 760 تەڭگەدەن 380 تەڭگەگە دەيىن ارزانداپ كەتكەنىن كورسەتەدى. ال، وتاندىق شارۋانىڭ ءونىمى 400 تەڭگەنىڭ ۇستىندە. بۇل - تەك وزىندىك قۇننىڭ شاماسىندا ەسەپتەلگەن باعا. سوندىقتان دا، قازاقستاندىق اۋىلشارۋاشىلىق تاۋار وندىرۋشىلەرى شىعىنعا باتىپ وتىر.

بىلاي العاندا، بۇقارا ءۇشىن باعانىڭ تومەن بولۋى قولايلى-اق. بىراق، وتاندىق ءوندىرىستىڭ شىعىنعا باتۋىنا جول بەرىپ قويىپ وتىرۋ – ەل ەكونوميكاسىن تىعىرىققا تىرەۋگە دەيىن اپاراتىن قاۋىپتى قۇبىلىس. وسى ماقسات تۇرعىسىنان العاندا، اقوردا كرەملدىڭ قاباعىنان ىقپاي، وتاندىق كاسىپكەرلەردى قولداۋى ورىندى.

ءوز كەزەگىندە ورىس تاراپى دا قاراپ قالماسى انىق. ولار دا كورشى ەلدەر نارىعىنان اعىلىپ كەلىپ جاتقان مول اقشادان اياق-استى ايىرىلىپ قالماۋ ءۇشىن بارىن سالاتىنى بەلگىلى. بۇعان دەيىن، ءبىزدىڭ ەل رەسەيدەن كەلەتىن اراق-شاراپ ونىمدەرىنە شەكتەۋ قويعان بولاتىن. ۋاقىتشا بولسا دا. الايدا، ورىس اراعىنىڭ اعىنىن تەجەۋدىڭ ارتى ۇزاققا سوزىلماي، العاشقى كەلىسسوزدەن-اق ول شەكتەۋ جويىلعان-تىن. ال، بۇل جولعى ماسەلە حالىق تۇتىناتىن تاۋارلار تۋرالى تۋىنداپ وتىرعاندىقتان ءماسىموۆتىڭ كابينەتى تاباندىلىق تانىتۋى ءتيىس دەپ ويلايمىز ءھام سەنگىمىز كەلەدى.

قالماحانبەت مۇقامەتقالي.

اباي.kz