تاۋەكەلگە بەل بۋىپ، باتىل قادام جاساۋدان ەش تايسالمايدى. كوپشىلىك قاۋىمنىڭ كوڭىلىندە قايسار قىز رەتىندە تانىلعان. ول – تانىمال ءانشى. ول – بەلگىلى اكتريسا. ول – عىلىم كانديداتى. ول – كونسەرۆاتوريانىڭ اعا وقىتۋشىسى. ول وتكەن جىلدىڭ سوڭىندا «قر ەڭبەك سىڭىرگەن قايراتكەرى» دەگەن اتاققا يە بولدى. ول – وزگە ارىپتەستەرىنە ۇقسامايتىن، بىربەتكەي مىنەزى بار ءانشى مەرۋەرت تۇسىپباەۆا.

– مەرۋەرت حانىم، ءسىز جاڭا جىلدىڭ قارساڭىندا قايراتكەرلىك اتاق العاندىقتان، ءبىز سىزبەن قايراتكەر تۇرعىسىندا سۇحباتتاسۋدى قالايمىز. كەلىسەسىز بە؟

– البەتتە!

– ەڭ الدىمەن العان اتاعىڭىزبەن قۇتتىقتايمىز! اتاقتى بولعان مەن بولماعاننىڭ اراسىندا ايىرماشىلىق بار ما ەكەن، مەرۋەرت حانىم؟

– بۇل اتاق دەگەن ءولىم سەكىلدى: بىرەۋگە ەرتە، بىرەۋگە كەش كەلەدى. شىنىن ايتسام، وسى اتاقتى 43 جاسىمدا العانىما قۋانامىن. كەيبىر ارىپتەستەرىم تىم ەرتە اتاق السا دا: «مەن وسىنداي اتاق الدىم دەپ» ايتۋعا داتتەرى بارمادى. ءوزىمىزدىڭ ارتىستىك «اسحانامىزدىڭ» ىشىندە عانا «ە، سولار اتاق الىپتى عوي...» دەگەن كۇبىردى عانا ەستىدىك.

قۇدايعا شۇكىر، بۇل مەنىڭ ونەردە جۇرگەن 17 جىلدىڭ ىشىندەگى ەڭبەگىمنىڭ ناتيجەسى دەپ بىلەم. ەلگە جار سالىپ، اۋىز تولتىرىپ ايتا الامىن. مەن اتاقسىز دا «مەرۋەرت تۇسىپباەۆا» بولعانمىن.

ايتپاقشى، اتاق الۋ تۋرالى ءوزىمنىڭ پالسافالىق پايىمىم بار: اتاق دەگەن ادامعا كەلەشەك ۇرپاعى ءۇشىن كەرەك. اللا بۇيىرتسا، مەنى ءتىرى كورمەيتىن ۇرپاعىم تىم بولماسا مەنىڭ سۋرەتتەرىمدى، ۆيدەولارىمدى، وردەنىم مەن مەدالدارىمدى قاراپ: ء«بىزدىڭ اجەمىز حالىق ءارتىسى بولعان» دەپ، ماقتانىشپەن ايتاتىن بولادى. ال تىڭدارمان حالىققا مەنىڭ اتاعىم بار ما، جوق پا – ءبارىبىر سەكىلدى. مەن اتاعى جەر جارعان تالاي انشىلەردى بىلەمىن، بىراق ولاردى حالىق جىعا تانىمايدى.

سول سياقتى اتى دۇركىرەگەن تاعى ءبىر انشىلەر بار: ولار كەڭەس وداعى كەزىندە ومىردەن اتاقسىز وتكەن. مىسالى، ءشامشى قالداياقوۆ قازاق حالقىنا عاسىردان عاسىرعا جالعاساتىن ەسىمىن قالدىرعانىمەن، اتاقتى ءدال قايتىس بولار ساتىندە الدى. ارينە، ءبىزدىڭ بارىمىزگە ءشامشى اعامىزداي بولۋ قايدا!

– ايتپاقشى، وسى اتاعىڭىزدى «جۋىپ»، تۋىستارىڭىز بەن دوس-جاراندارىڭىزعا ارناپ، توي جاسادى، ونى كتك ارناسى ارنايى كەلىپ ءتۇسىردى دەپ ەستىپ جاتىرمىز...

– ءيا، ءوزىمنىڭ «فەيسبۋكتەگى» پاراقشاما توي جاسايتىنىمدى جازدىم. مەنىڭ ءۇش بولەك قالادا تۇراتىن ءۇش ءسىڭىلىم جاڭا جىلدىڭ الدىندا العان اتاعىممەن قۇتتىقتاپ، قارا ساندىقتىڭ تۇبىنە جيناعان اقشالارىن الىپ، ارنايى الىپ-ۇشىپ كەلدى. ماعان تىلەكشى سول ءۇش قىز كەلە جاتىر دەگەن سوڭ، جاقىن دوستارىمنىڭ باسىن قوسىپ، مەيرامحاناعا توي جاسادىم. ول توي جاقىن-جۇراعاتىما جاسالعان سوڭ، ارىپتەستەرىمنىڭ ءبىرى دە بولمادى. ولارعا ارنالعان توي بولاشاقتا بولادى دەپ ويلايمىن، اللا عۇمىر بەرسىن!

– تەلەديدار مەن شوۋ-بيزنەستىڭ جۇلدىزدارىنا قاتىستى ءسوز جاتپايدى عوي: «بۇدان بىلاي قولتاڭباڭدى التىن قالاممەن بەر» دەپ، سىزگە ءبىر جاقىنىڭىز التىن قالام سىيلاپتى دەگەن سىبىس تا شىقتى...

– شىنىمدى ايتايىن – وسى تويدا بەرىلگەن ەڭ قىمبات، ءارى توسىن سىي – سول التىن قالام بولدى. گۇلبارشىن زايىروۆا دەگەن قۇربىم: «ەندىگى جەردە قولتاڭباڭدى ءجاي قالاممەن بەرۋگە قۇقىڭ جوق» دەپ، التىن قالام سىيعا تارتتى. ارينە، التىن دەگەن جاقسى ادامداردىڭ اراسىندا توت باسپايتىن كوڭىلدىڭ بەلگىسى. ونىڭ ۇستىنە مەنىڭ عىلىم كانديداتى، ءارى ۇستاز ەكەنىمدى ەسكەرەتىن بولساق، مەن ءۇشىن قالام – قاسيەتتى دۇنيە.

ايتپاقشى، سول تويدا ماعان باسقا دا قىمبات سىيلىقتار بەرىلدى. سونىڭ ءبىرى – اۆتوكولىك. بىراق وعان بولا ەشكىمگە جار سالمادىم: سىزدەرگە العاش رەت ايتىپ وتىرمىن. شىنىمدى ايتايىن، اۆتوكولىككە قالام العانداي قاتتى قۋانبادىم. ەلدەن ەستۋىم بار: جاقسى ادامداردان قالام ۇرلايدى ەكەن. اقىن-جازۋشى، عالىم-پروفەسسوردىڭ قالامى جۇعىستى بولسىن دەگەن نيەت بولسا كەرەك. ىزگى نيەت بولعان سوڭ، بۇل ابەستىك دەپ سانالمايدى.

– عالىم دەمەكشى، ءسىزدىڭ كونسەرۆاتورياداعى قىزمەتىڭىز جونىندە جۇرتشىلىق كوپ بىلە بەرمەيدى...

– قازىر مەن اعا وقىتۋشىمىن. ۇستاز رەتىندە جۇمىس ىستەگەلى 7–8 جىل بولدى. ءوزىمنىڭ ۇيرەنەرىم دە، ستۋدەنتتەرگە بەرەرىم دە ءالى الدا. ۇستازدىق مەنىڭ تەك ءومىرىمنىڭ ءبىر تارماعى، ال ونەر – مەنىڭ ءومىرىمنىڭ ءمانى. سوندىقتان ماعان ونەر جولى قىمبات. ءوزىمدى ونەردىڭ ءار سالاسىنان كوردىم. بەلگىلى پروديۋسەر دينارا ادامنىڭ «ساعان سەنەمىن» دەگەن تەلەجوباسىندا جۇمىس جاسادىم. مەن جۇرگىزگەن 13 باعدارلاما وتە بيىك رەيتينگكە يە بولدى. ارادا 15 جىل وتكەن سوڭ، 15 سەريالى كينوعا ءتۇستىم. سول تەلەحيكايادا حالىققا قىزمەت كورسەتۋ ورتالىعى باسشىسىنىڭ ءرولىن سومدادىم. «قازاقتىڭ قىزى مەملەكەتتىك قىزمەتتە قانداي بولۋ كەرەك؟» دەگەن سۇراق تۋسا، جاۋابى – سول كينوداعى مەنىڭ وبرازىم. بۇگىنگى قازاقتىڭ باتىر قىزدارىنىڭ ءبىرىنىڭ رولىندە وينادىم.

دەگەنمەن، ونەردىڭ ءار سالاسىندا جۇمىس جاساسام دا، مەن بارماعان ءبىر سالا بار. ول – راديو. ارمانىم – راديودا تۇنگى ەفيردى جۇرگىزۋ، ادامدارمەن سىرلاسۋ. ءبارى بىردەن بولمايدى عوي: اقىرىنداپ سول ارمانعا دا جەتەرمىن. ماعان تالاي مۇمكىندىك تۋىپ جاتىر، ونى بەرىپ جاتقان حالقىما، ەلىمە ريزامىن.

– مەرۋەرت حانىم، ءسىز بايقاپ كورەتىن تاعى ءبىر سالا بار سياقتى: بويىڭىزداعى حاريزمالىق ارىنىڭىز ساياساتكەر بولۋعا لايىق دەپ، ەشكىم سىزگە مەملەكەتتىك ساياساتپەن اينالىسۋعا كەڭەس بەرمەدى مە؟ جالپى، ءسىز سونداي قاسيەت بويىڭىزدا بار ەكەنىن سەزەسىز بە؟

– كەڭەسىن قايدام، بىراق ۇسىنىس ءتۇسىپ جاتسا، ويلانىپ كورەم (كۇلدى). ءبىز كوبىنەسە ءوزىمىزدى كورشى رەسەيمەن سالىستىرامىز عوي. رەسەيدىڭ مەملەكەتتىك دۋماسىندا مارينا كوجەۆنيكوۆا سياقتى ءانشى-ارتىستەر، الينا كاباەۆا سياقتى سپورتشىلار وتە كوپ. نەگە ەكەنى بەلگىسىز، بىزدەگى ادەمى قىز-كەلىنشەكتەردى جوعارى جاققا جولاتپايدى. كەزىندە پارلامەنتتە نۇرلان ونەرباەۆ پەن بەكبولات تىلەۋحان اعامىز وتىرعاندا قۋانعان ەدىك. پارلامەنتتە ءبىزدىڭ ءسوزىمىزدى سويلەيتىن ونەر مايتالماندارى بارىنا قۋانىپ جۇرگەندە، ولار دا دەپۋتاتتىقتان شىعىپ كەتتى. ارينە، ءوز ورتامىزدان ونەر ادامدارى، سپورتشىلار مەن اتاقتى جۋرناليستەر پارلامەنتتە بولسا، جىرتىسىمىزدى جىرتاتىنىنا ۇمىتتەنەم.

– ماسەلەن، «ساياسات» دەگەندە، ءوزىڭىز جۇرگەن مادەنيەت سالاسىنداعى ساياسات تۇرعىسىندا ايتار بولساق، ء«داستۇرلى ءان» دەگەن جاپ-جاقسى ايدارى بار ءان جانرى بوساعادا قالىپ بارا جاتقانىنا وسى سالاداعى ولقىلىقتار كىنالى سياقتى. شاماسى، ەندى ءبىر-ەكى ۇرپاقتان كەيىن (40-50 جىل), بۇل ونەردىڭ داۋىسىن ارحيۆتەردەن عانا تاۋىپ الاتىن شىعارمىز. وسى جاعداي مادەنيەت سالاسىنداعى كەم-كەتىكتەن تۋعان كەندەلىك دەپ ويلامايسىز با؟

– كەڭەس ۇكىمەتى كەزىندە ءداستۇرلى ءان جانرىن كوبىرەك قولدايتىن ەدى. نەگە ەكەنى بەلگىسىز، بۇگىندە بۇل جانر مۇلدەم ۇمىتىلىپ بارادى. قازىرگى ءداستۇرلى انشىلەر دومبىراسىن لاقتىرىپ تاستاپ، ەستراداعا كەلدى. ونىسى جاراسىمدى ما، جوق پا – وعان ەشكىم كوڭىل ءبولىپ جاتقان جوق. ەسترادا – جەڭىل جانر، اقشا تابۋعا بولاتىن ونەر.

ارينە، وكىنىشتى، بىراق ءداستۇرلى انشىلەرگە قالاي كومەكتەسۋ كەرەك ەكەنىن بىلمەيمىن. قازىرگى تىڭدارمان دا جەڭىل انگە اۋەس. حالىقتىڭ تالعامىنىڭ ءوزى وسىعان سايىپ كەلە جاتقان سياقتى. بۇل ەندى رۋحاني-الەۋمەتتىك پروبلەمادان تۋاتىن قۇبىلىس بولسا كەرەك. بۇل – ۇلتىمىزدىڭ قاسىرەتى. وزبەك پەن قىرعىزعا جاقىنداپ جاتىرمىز، بىراق ءوزىمىزدىڭ ءتۇپ-تامىرىمىزدى ىزدەمەيمىز.

– جالپى، ونەر ادامى ساياساتپەن اينالىسپاعانى دۇرىس دەگەن ءسوز بار. بىراق ۋكرايناداعى سوعىس بارىسىندا رەسەيدىڭ ونەرى مەن مادەنيەتى سالاسىندا ءپۋتيننىڭ ساياساتىن قولدايتىندار مەن قولدامايتىندار توبى قالىپتاستى. ماسەلەن، ءپۋتيندى قولدايتىندار ايگىلى ءانشى-كومپوزيتور اندرەي ماكارەۆيچتى اعاش اتقا تەرىس مىنگىزىپ جىبەرمەك ويدا. بۇدان تۋار قورىتىندى: قالاي بولعاندا دا، جەمە-جەمگە كەلگەندە ونەر ادامدارى ساياساتتان ادا ەمەس ەكەن. وسى ويعا قوسىلاسىز با؟

– رەسەي انشىلەرىنىڭ مەنتاليتەتى دە، تاربيەسى دە باسقاشا. رەسەيدىڭ جەر كولەمى دە، حالقى دا مول عوي. انشىلەرى ەلىن ءبىر ارالاپ شىقسا، ميلليونەر بولىپ شىعا كەلەدى. ءبىز 17 ميلليونعا تولار-تولماس حالىقتىڭ قاي ورتاسىن اينالامىز؟ ارتىستەرى نە ايتسا دا، وت تا جوق، سوت تا جوق. ءپۋتيندى اللا پۋگاچەۆا بىردە قولدايدى، بىردە – جوق. سوندىقتان ءبىز ونداي بەيمارال ساياساتتان اۋلاق بولعانىمىز ءجون. ۋكراينا دەمەكشى، ءدال قازىرگى جاعدايدا مەنىڭ ءبىر عانا انالىق تىلەگىم بار – ەلىمىزدىڭ اماندىعى مەن تىنىشتىعى.

– دەگەنمەن، ساياساتتى اۋىزعا العىسى كەلمەيتىندەر قالاي جالتارسا دا، ونەردىڭ ءورىسى – حالىق، ال سول حالىقتىڭ الەۋمەتتىك-تۇرمىستىق جاعدايى قالىپتاسقان ساياساتپەن تىكەلەي ءارى تىعىز بايلانىستى. وسى تۇرعىدان كەلگەندە قازاق حالقىنىڭ بۇگىنگى جاي-كۇيى دامىعان 30 ەلدىڭ قاتارىنا كىرۋگە بەت العان مەملەكەتكە ساي دەپ ويلايسىز با؟

– بۇل سۇراققا جاۋاپ بەرۋ مەن ءۇشىن وتە قيىن. ول مەنىڭ ساياساتتان جالتارعانىم ەمەس، ونى – بىلمەيتىنىم. ءبىز بيلىكتى پرەزيدەنت پەن پارلامەنتكە بەردىك: ولاردى سايلادىق، بيلىكتى سولاردىڭ قولىنا سەنىپ بەردىك. ەگەر 30 ەلدىڭ قاتارىنا كىرەمىز، كەرەمەت ەلمىز، قاتارعا كىرمەسەك بولمايدى دەسە، سولاي بولۋ كەرەك شىعار.

– وسى سۇراقتى باسقاشا قويىپ كورەيىكشى: بۇگىندە قازاق انشىلەرى نەگىزگى تابىسىن تويدان تاباتىنى بەلگىلى ءجايت. بىراق سول تويىن نەسيە الىپ جاسايتىن قازاقتىڭ جايى ءسىزدى قانشالىقتى الاڭداتادى؟

– مەن نەسيە دەگەن نارسەنى جەك كورەمىن. ءبىر ادام نەسيە الدى دەسە، سوعان بولا ۋايىمداپ، الاڭدايمىن. ءوز باسىم كەزىندە كوپ نەسيە العانمىن. 1996 جىلى اتاعىم ەندى شىعىپ جۇرگەن كەزىمدە ساتباەۆ – سەيفۋللين كوشەلەرىنىڭ قيىلىسىنداعى جاتاقحانادا تۇراتىنمىن. جاتاقحانادا تۇراتىندار مەنى كورگەندە: مىناۋ دا جاتاقحانا دا تۇرا ما؟» دەپ، ساۋساقتارىمەن شۇقىپ كورسەتەتىن. سول «شۇقي» بەرگەننەن كەيىن، تاۋەكەلگە بەل بۋىپ، نەسيەگە ءۇي الدىم. ول ۋاقىتتا تەاتردا جۇرگەن كەزىم بولاتىن. «كرەديت» دەگەن ءسوزدى العاش ەستىگەن اعا-اپالارىمىز: «قىزىم-اۋ، سوتتالىپ كەتەسىڭ عوي!...» دەپ، مەنەن دە قاتتى شوشىناتىن.

جاقىندا ءبىر كىسىنىڭ: «نەسيە العان ادامعا اللا ءوزى كومەكتەسەدى، ءناسىبىن مول بەرەدى» دەگەن ءسوزىن ەستىدىم. ونىڭ سوزىنە قاراعاندا، نەسيە العان ادامعا اللا تاعالا ۇنەمدەۋدى ۇيرەتەدى ەكەن. ول ادامنىڭ نەسيەسى ويىنا تۇسكەن سايىن، ۇنەمشىل بولادى. مىسالى، ءاتىر الايىن دەپ وقتالساڭ، العان نەسيەڭ ەسىڭە ءتۇسىپ، ەسكى ءاتىردى قولدانا تۇرايىن دەيسىڭ. مۇمكىن، جانى بار ءسوز شىعار.

نەسيەنى جەك كورسەم دە، كەزىندە قارىزعا كوپ باتقان ادامنىڭ ءبىرى – مەنمىن. قۇدايعا ءتاۋبا، مەن نەسيەمدى ايىنا جەتپەي، ەرتەرەك تولەپ وتىردىم. قازاقتا ءبىر ءسوز بار: «بالاسىنا ءبىر توي جاساي الماي، دۇنيەدەن ءوتىپ جاتىر قانشا ادام...» دەگەن. سوندىقتان نەسيە الىپ، توي جاساپ جاتقان حالىقتى دا تۇسىنەمىن. ويتكەنى بالانىڭ ءبىر تويىنا ء«اي، بالام، اقشا جوق» دەپ، تاعى وتىرا المايدى. ەڭ باستىسى – امالسىزدان نەسيە العان اعايىنعا «ۇنەمشىل بولىڭدار» دەيمىن. مەنىڭ باسقاداي الاڭداۋشىلىعىم كىمگە كەرەك دەرسىز؟

– ايتپاقشى، ءسىز ءبىر باسىلىمعا بەرگەن سۇحباتىڭىزدا كىتاپ جازىپ جاتىرمىن دەگەن ەدىڭىز: ول جازۋ قانشالىقتى ءونىمدى بولىپ تۇر؟

– ەگەر ءسىز مەنىڭ «فەيسبۋك» پاراقشاما كىرسەڭىز، مەنىڭ جازعان ەسسەلەرىمدى وقي الاسىز. سول پاراقشامداعى جازبالارعا بەلگىلى جۋرناليستەر ء«سىزدىڭ بويىڭىزدا جازۋعا ىڭعايلى قاسيەت بار ەكەن...» دەپ، «لايك» قويىپ جاتادى. شىنىمدى ايتامىن، جازعان پوستارىمدى وقىپ، ء«سىزدىڭ ءتىل بايلىعىڭىز جاقسى ەكەن» دەيتىندەر كوپ. بىراق مەن ورىسشا جازامىن. ورىسشا وقىعاندىقتان، قازاقتىڭ ءتىلىن جاقسى بىلسەم دە، ماعان ورىس تىلىندە جازۋ وڭايىراق. وعان بولا مەنى اعايىن-ەل سوكپەس دەپ ويلايمىن.

كىتاپقا ەنەتىن ءبىراز ەسسەلەر مەن پوستتار «فەيسبۋككە» جازىلدى. ءۇش جىل ۋاقىت ىشىندە جەلىدەن جەتكىلىكتى وقىرمان جينادىم. مەن جانىمدى تەبىرەنتكەن، قۋانتقان، يا مۇڭايتقان ساتتەرىمدى جازامىن. تانىمالدىعىم بولار، ءوزىمنىڭ اشىق ايتقان پوستتارىم كەيبىر وقىرمانعا قىزىق كورىنۋى مۇمكىن. بۇل جاعداي مەنى وتە قۋانتادى. ويتكەنى مەنى كوپشىلىك قاۋىم جاڭا قىرىمنان كورىپ جاتىر. بىرەۋلەردىڭ انشىلەردى «ساۋاتسىز» دەيتىن پىكىرىنە مەن «مات» قويىپ ءجۇرمىن.

– ءبارىن ايت تا، ءبىرىن ايت دەمەكشى، ەلگە تانىمال ءانشى مەرۋەرت تۇسىپباەۆادان ونىڭ شىعارماشىلىق جوسپارى جونىندە سۇراماساق، وقىرمان ءبىزدى تۇسىنبەۋى مۇمكىن...

– مەنىڭ العان قايراتكەرلىك اتاعىم ماعان ۇلكەن سەرپىلىس بەردى. مەن ءۇشىن ول ماقتانىش ەمەس، ۇلكەن جاۋاپكەرشىلىك. ەلباسىنىڭ قولى قويىلىپ بەرىلگەن كۋالىك حالىقتىڭ سەنىمى دەپ بىلەمىن. ەندىگى جوسپارىم وسى سەنىمنىڭ ۇردەسىنە بايلانىستى. تۋعان جەرىم باياناۋىلدىڭ اكىمىنىڭ شاقىرۋىمەن ناۋرىز ايىندا ەلگە تەگىن كونتسەرت بەرمەك ويىم بار.

ءبىر ايتا كەتەتىن ءجايت – 17 جىل كولەمىندە مەنى قانات بوزىمباەۆ قاتتى قولدادى. بۇرىنعى اكىم دانيال احمەتوۆ بار، باسقا جەرلەستەرىم بار، تۋعان جەرىمدەگى اكىم-اعالارىم بار – ولار دا شاما-شارىقتارىنشا جاردەم ەتەدى. جالپى، انشىلەر بيلىككە سۇيەنبەي ءومىر سۇرە المايدى. مىسالى، 2006 جىلى الماتىدا كونتسەرت بەرگەن كەزىمدە ەل جاقتان اكىمدى دە، باسقانى دا شاقىردىم. رەسپۋبليكا سارايىندا وتكىزگەن سول ەسەپ بەرۋ كونتسەرتىمە اكىم ءبىر تيىن بەرمەك تۇگىلى، ءوزى دە كەلمەدى، وكىلىن دە جىبەرمەدى. ءتىپتى ء«بىزدىڭ ەلدە تۋعان مىنا قارا قىز كەزىندە الماتىعا كەتىپ ەدى...» – دەپ، ءبىر ادام مەنى ەلەپ-ەسكەرمەدى.

ايتپاقشى، «ەڭبەك سىڭىرگەن قايراتكەر» دەگەن وسى اتاققا مەنى پاۆلودار وبلىسىنىڭ اكىمشىلىگى ۇسىندى. «جاقسىنىڭ جاقسىلىعىن ايت، نۇرى تاسىسىن» دەيدى عوي. سىزدەر ارقىلى وبلىس اكىمشىلىگىنە ريزاشىلىعىمدى بىلدىرسەم، ارتىق بولماس دەپ ويلايمىن. اتاق بەرۋ جونىندە جارلىق شىقتى دەگەن حاباردى ەستىگەندە، اباي كوشەسىنىڭ بويىندا ماشينانىڭ رولىندە كەلە جاتقان ەدىم. وسى حابارعا انامنىڭ قۋانعانىن ەستىگەندە، قاتتى وكسىپ جىلادىم...

سۇحباتتاسقان جانسايا ەرتاي.

اباي.kz

دەرەككوز: «وبششەستۆەننايا پوزيتسيا» گازەتى. (پروەكت «DAT» №03 (274) وت 22 يانۆاريا 2015 گ.)

تۇپنۇسقاداعى تاقىرىپ: مەن اتاقسىز دا «مەرۋەرت تۇسىپباەۆا» بولعانمىن...