جەتىسۋ وبلىسى حالىقارالىق سەرىكتەستىك اياسىن كەڭەيتىپ جاتىر. قازىرگى كەزدە ءوڭىردىڭ ينۆەستيتسيالىق الەۋەتىن ارتتىرۋدىڭ ارقاسىندا ساۋد ارابياسى، گەرمانيا، بەلگيا، چيلي، قحر، يوردانيا، پاكىستان ەلدەرىنىڭ ينۆەستورلارىمەن ىنتىماقتاستىق ورناتىلۋدا. جالپى، جىل باسىنان بەرى وبلىس ەكونوميكاسىنا 330,3 ملرد تەڭگە ينۆەستيتسيا قۇيىلدى. سونىڭ 35 ملرد. تەڭگەگە جۋىعى - شەتەلدىك ينۆەستورلاردىڭ تىكەلەي ينۆەستيتسياسى، بۇل وتكەن جىلدىڭ وسى مەرزىمىمەن سالىستىرعانداعى كورسەتكىشتەن 3 ەسەگە ارتىق، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ مالىمەتىنە قاراعاندا، بۇگىنگى كۇنگە وڭىردە قۇنى 2,9 ترلن تەڭگە بولاتىن، 13 مىڭ جۇمىس ورنى قۇرىلاتىن 110 جوبادان تۇراتىن ينۆەستيتسيالىق پۋل قۇرىلعان. ولاردىڭ ىشىندە ىرىلەرىن اتاپ وتسەك، «شوعىرلاندىرىلعان تاۋ-كەن قۇرىلىس كومبيناتى» كومپانياسىنىڭ 2 مىڭ جۇمىس ورنىن قۇراتىن مەتاللۋرگيا كومبيناتى سالىنۋدا. سول سياقتى «قورعاس – شىعىس قاقپاسى» ەركىن ەكونوميكالىق ايماعىندا گەرمانيالىق  «Skyhansa» كومپانياسىمەن بىرلەسىپ، حالىقارالىق اۋەجايدىڭ قۇرىلىسى قولعا الىنادى. بۇل اۋەجاي جوباسىندا ساعاتىنا 500 ادامعا دەيىن جولاۋشى وتكىزەتىن تەرمينال سالۋ، 50 مىڭ توننا جۇك اينالىمى مۇمكىندىگى قاراستىرىلعان، سونىمەن قاتار تۋريستىك جانە ساۋدا-ويىن-ساۋىق باعىتىن دامىتۋعا ىقپال ەتپەك.

ال ءوندىرىس جانە وڭدەۋ سالالارىندا چيلي، پاكىستان، قحر، قىرعىزستان ينۆەستورلارىنىڭ قاتىسۋىمەن تەگىستەگىش بولات شار، گاز-بەتون بلوكتارىن، ەدەن جابىندارىن وندىرەتىن زاۋىتتار مەن ۇن تارتۋ كەشەنى ىسكە قوسىلادى دەپ جوسپارلانعان.

بالامالى ەنەرگيا كوزدەرى سالاسىنىڭ دا الەۋەتى زور. بۇل سالانى دامىتۋعا وڭىردە كۇن، جەل جانە تاۋ وزەندەرىنىڭ سۋى سياقتى قاجەتتى تابيعي جاعدايلار جەتكىلىكتى. اتاپ وتسەك، بۇگىندە جەتىسۋ وبلىسىندا جالپى قۋاتتىلىعى 251 مۆت-تان اساتىن 18 جاڭارتىلاتىن ەنەرگيا كوزدەرى (جەك) نىسانى جۇمىس ىستەپ تۇر. بيىل ەسكەلدى اۋدانىنداعى قورا وزەنىندە قۋاتتىلىعى 26 مۆت بولاتىن قورا سۋ ەلەكتر ستانتسياسى ىسكە قوسىلدى. سونىمەن قاتار ەنەرگەتيكا جانە جاڭارتىلاتىن ەنەرگيا كوزدەرى سالاسىندا بىرقاتار جاڭا ينۆەستيتسيالىق جوبالار جۇزەگە اسىرىلۋدا. ولاردىڭ قاتارىندا «قورعاس – شىعىس قاقپاسى» اەا-دا جەل گەنەراتورلارى مەن ەنەرگيا ساقتاۋ جۇيەلەرىنە ارنالعان جابدىق وندىرەتىن زاۋىتتىڭ قۇرىلىسى، سونداي-اق قەربۇلاق اۋدانىندا قۋاتتىلىعى 110 مۆت بولاتىن كۇن ەلەكتر ستانتسياسىنىڭ جوباسى بار.

(سۋرەت:https://www.gov.kz/)

– جەتىسۋ وبلىسىنىڭ ينۆەستيتسيالىق ساياساتى حالىقارالىق ارىپتەستىكتى تەرەڭدەتۋگە، ەكسپورتتىق الەۋەتى بار وندىرىستەردى دامىتۋعا جانە ەكونوميكانى ارتاراپتاندىرۋعا باعىتتالعان. جالپى وڭىردە بەس ستراتەگيالىق باعىت - اگروونەركاسىپتىك كەشەندى دامىتۋ، كولىك، لوگيستيكا، تۋريزم، بالامالى ەنەرگەتيكا جانە ونەركاسىپ بويىنشا جۇمىس جۇرگىزىلۋدە. جەتىسۋ – قىتايمەن شەكاراسىندا بەس كەدەن بەكەتى بار رەسپۋبليكاداعى جالعىز ءوڭىر. سونىمەن قاتار ءبىزدىڭ ايماق ارقىلى قىتايدان ەۋروپاعا جۇك نەبارى 10 كۇندە جەتكىزىلەتىن «باتىس ەۋروپا – باتىس قىتاي» ترانسقۇرلىقتىق ءاۆتودالىزى وتەدى. گەوگرافيالىق ارتىقشىلىقتى ءتيىمدى پايدالانىپ، حالىقارالىق ارىپتەستىكتى كەڭەيتۋ ارقىلى ءبىز بەلگيا، گەرمانيا، چيلي، پاكىستان، ساۋد ارابياسى، يوردانيا سياقتى الىس شەتەلدەرنىڭ ءىرى ينۆەستورلارمەن جۇمىستى تابىستى جۇرگىزىپ كەلەمىز. مۇنىڭ ءبارى ءوڭىر ەكونوميكاسىنا ينۆەستيتسيا تارتۋعا، جاڭا وندىرىستەر اشىپ، جۇمىس ورىندارىن قۇرۋعا، ءوڭىر ءۇشىن باسىم سەكتورلاردا ۇزاق مەرزىمدى ارىپتەستىك بايلانىستار ورناتۋعا مۇمكىندىك بەرەدى، – دەدى جەتىسۋ وبلىسى اكىمىنىڭ ورىنباسارى اسەت قاناعاتوۆ.

سول سياقتى بيىل قۇنى 50,6 ملرد تەڭگە بولاتىن 25 ينۆەستيتسيالىق جوبا قولعا الىنعان، سونىڭ ىشىندە ونەركاسىپ، اۋىل شارۋاشىلىعى جانە ەنەرگەتيكا سالالارىنا قاتىستى 10 جوبا جۇزەگە اسىرىلدى. ولاردىڭ قاتارىندا وندىرىستىك «قاينار-اكب» زاۋىتىنىڭ اككۋمۋلياتورلار شىعاراتىن جاڭا جەلىسى، كەراميكالىق پليتالار شىعاراتىن «الماز كەراميكس» جشس-نىڭ ءوندىرىسىن كەڭەيتۋ جانە باسقا دا جوبالار بار.

- ءبىزدىڭ زاۋىت وبلىستاعى ەڭ ءىرى، جۇيەقۇراۋشى كاسىپورىننىڭ ءبىرى. مۇندا 1200 ادام جۇمىس ىستەيدى. زاۋىتتىڭ تالدىقورعان قالاسى ونەركاسىبىندەگى ۇلەسى 33,6% قۇراپ وتىر. مۇندا جەڭىل جانە جۇك اۆتوكولىكتەرىندە، اۋىل شارۋاشىلىعىندا، اسكەري تەحنيكادا ت.ب. سالالاردا قولدانىلاتىن اككۋمۋلياتور باتارەيالارىنىڭ 50-دەن استام ءتۇرى شىعارىلادى. وعان قوسا جۋىردا زاۋىتتىڭ رەزەرۆتە قۋات بەرۋگە ارنالعان ءۇشىنشى وندىرىستىك ۋچاسكەسىن ىسكە قوستىق. جاڭا تسەحتاردا جۇمىس ىستەيتىندەر سانى 150 ادامعا جەتكىزىلەدى، - دەيدى «قاينار-اكب» زاۋىتىنىڭ باس ديرەكتورىنىڭ ءوندىرىس جونىندەگى ورىنباسارى تالعات قوناقباەۆ.

اتاپ وتسەك، جىل سوڭىنا دەيىن وبلىسقا تارتىلاتىن ينۆەستيتسيا كولەمى 573 ملرد تەڭگەگە جەتەدى دەپ جوسپارلانعان، سونىڭ 430 ملرد تەڭگەسى بيۋدجەتتەن تىس ينۆەستيتسيا بولماق.

Abai.kz