ءبىز ادىلدىك ىزدەپ شىرىلداعان ماسيپحان قونايدىڭ جانايقايىن بۇعان دەيىن دە جازعان بولاتىنبىز. بۇل جولى قانداس باۋىرىمىز كەزەكتى حاتىن قر مەملەكەتتىك قىزمەت ىستەرى جانە سىبايلاس جەمقورلىققا قارسى ىس-قيمىل اگەنتتىگىنىڭ توراعاسى قايرات قوجامجاروۆقا ارناپ جازعان ەكەن. بۇل حاتتى دا جاريالاۋدى ءجون ساناپ وتىرمىز. 

Abai.kz پورتالى

قر مەملەكەتتىك قىزمەت ىستەرى

جانە سىبايلاس جەمقورلىققا قارسى

ءىس-قيمىل اگەنتتىگىنىڭ توراعاسى

 ق.پ. قوجامجاروۆقا

قۇرمەتتى قايرات پەرنەشۇلى!

ءسىزدى قاي كەزدە دە ەلباسىمىزدىڭ قاسىنان تابىلاتىن ازامات رەتىندە ماقتانىش تۇتامىن. ەكى جىلعا تاياۋ ۋاقىتتان بەرگى ءوز باسىما تۇسكەن قيىن جاعداي تۋرالى سىزدەن كومەك سۇراماسقا ەش امالىم قالمادى.

مەن ماسيپحان كوناي 04.11.1969 جىلى قىتاي حالىق رەسپۋبليكاسى، كۇنەس اۋدانىندا تۋعانمىن. ۇلتىم قازاق. 2004 جىلى، 5 مامىردا قازاقستان رەسپۋبليكاسىنا كوشىپ كەلدىم. قىتاي ازاماتىمىن. تۇراقتى تىركەۋگە تۇرىپ، ىقتيارحاتپەن ءجۇرمىن. قىتاي مەن قازاقستان اراسىندا جەكە كاسىپكەرلىكپەن اينالىسامىن.

اسقار المابەكۇلى تۇتۋباەۆ

2004 جىلى تالدىقورعاندىق اسقار المابەكۇلى تۇتۋباەۆ دەگەن جىگىتپەن تانىسىپ، ءبىراز جىل ساۋدا ىستەدىم. العاشىندا بىرلەسىپ، كىرپىش زاۋىتىن اشتىق. 2007 جىلى بۇل زاۋىت اسقار تۇتۋباەۆتىڭ يەلىگىنە ءوتىپ كەتتى. ودان كەيىنگى جىلداردا دا ءبىزدىڭ ساۋدا جايىنداعى بايلانىسىمىز ۇزىلگەن جوق. مەن اسقار تۇتۋباەۆتىڭ بەرگەن تاپسىرىسىن قىتايدان تاسىپ بەرۋمەن اينالىستىم. وسى بارىستا ارامىزدا قوماقتى اقشانىڭ الىس-بەرىسى جۇرگەنى راس. بىراق، مەن ونىڭ بار ەسەبىن ۋاعىندا جاۋىپ وتىردىم. بۇل تۋرالى سوت الدىندا ايتىپ، بۇلتارتپاس دالەلدەرمەن تولىق جانە اشىق دالەلدەپ بەرە الامىن.

2015 جىلى ءساۋىر ايىندا سول اسقار تۇتۋباەۆ جانە ءىنىسى باقىتبەك تۇتۋباەۆ مەنىڭ ۇستىمنەن، اقشامىزدى بەرمەي ءجۇر دەپ، الماتى وبلىسى، ىلە اۋداندىق سوتىنا ارىز بەرىپتى. قۇقىق قورعاۋ ورگاندارى ارقىلى تۇتقىنداتىپ، ىلە اۋدانىنىڭ ۋاقىتشا قاماۋ ورتالىعىنا مەنى ءۇش كۇن قاماتتى. قاماۋ ورنىندا قۇقىق قورعاۋشىلار ەمەس، باقىتبەك تۇتۋباەۆ ءوزى سۇراققا تارتتى. ولاردىڭ قولىندا مەنىڭ «60 مىڭ اقش دوللارىن الدىم» دەپ 2009 جىلى بەرگەن قولحاتىم بار ەكەن. بىراق، بۇل اقشانى مەن سول جىلى كۇزدە ۇرىمجىدە اسقار تۇتۋباەۆتىڭ اتىنان كەلگەن ءوز ادامدارىنا (باحا دەگەن ۇشارالدىق رەكەتتىڭ ادامدارىنا) بەرگەنمىن. اقشانى بەرگەنىم تۋرالى  اسقار تۇتۋباەۆتىڭ وزىنە تەلەفون شالىپ ايتقان ەدىم. ەسەپ سونىمەن جابىلعان بولاتىن.

سول جولى اسقار المابەكۇلىنىڭ تۋعان ءىنىسى باقىتبەك تۇتۋباەۆ مەنى تۇرمەدە ۇرىپ-سوعىپ، 60 مىڭ اقش دوللارىنىڭ ۇستىنە جانە 32 مىڭ اقش دوللارىن قوسىپ، جيىنى «92 مىڭ اقش دوللارىنا قارىزبىن» دەگىزىپ، زورلىقپەن تاعى قولحات جازدىرىپ الدى. جانە ءۇش ادامدى جابىرلەنۋشى رەتىندە جانە وزدەرىنە قوسىپ الىپتى.

مىنە، سودان بەرى ءتورت رەت سوت وتىرىسى بولدى. مەن قىتايدا «جاڭا جازۋ» دەپ اتالاتىن الفاۆيتپەن وقىعانمىن. توتە جازۋدى دا دۇرىس تانىمايمىن. ال، كيريلليتسا ءارىبىن ءتىپتى بىلمەيمىن. ورىس ءتىلىن مۇلدەم تۇسىنبەيمىن. سوتتىڭ بارلىق وتىرىسى قازاق تىلىندە ءوتىپ كەلەدى. بىراق، مەن جازۋ تانىمايمىن. ادۆوكاتتىڭ كومەگىنە سۇيەنىپ، جاۋاپ بەرىپ كەلەمىن. مەنىڭ اق ەكەنىمدى سوت ءتۇسىنىپ، ءبىلىپ وتىر. بىراق، ءالى اقتاپ شەشىم شىعارا العان جوق. سەبەبى، اسقار تۇتۋباەۆ الماتى وبلىسىندا لاۋازىمدى قىزمەتتە ەكەن. ول مەنىڭ ۇستىمنەن ارىزدى تۋعان ءىنىسى باقىتبەك تۇتۋباەۆتىڭ اتىنان بەرىپ قويىپ، ءوزى تاسادا وتىر.

مەن كوبىندە قازاقستاندا بولامىن. ساۋدا بابىمەن قىتايعا دا بارىپ تۇراتىنمىن. سول كەزدە. ەگەر، مەن شىنىمەن ولارعا 60 مىڭ اقش دوللارى قارىز بولسام، تۇتۋباەۆتار نەگە مەنى ىزدەمەگەن. ولار ۇكىمەت قىزمەتىندەگى لاۋازىمدى تۇلعا عوي، قۇقىق قورعاۋ ورىندارىنا ارىز بەرىپ، شەكارادان ءوتىپ جۇرگەندە نەگە تۇتقىنداتپايدى؟ تۇتقىنداتۋعا مۇمكىندىكتەرى تولىق جەتەدى عوي!

سوت وتىرىسى بولعان سايىن باقىتبەك تۇتۋباەۆ مەنى دالەلسىز ايىپتاپ، بالە-قازانى ءۇيىپ-توگۋمەن كەلەدى. الاياق دەپ، كۇش كورسەتەدى. قىتايدا قىلمىستى بولعان دەپ، جالا جابادى. ءار سوت تىڭداۋى سايىن ەكى-ءۇش ادامدى اكەلىپ، «قونايدان الاشاق اقشامىز بار!» دەگىزىپ، قىسىم جاساتادى. بىراق، ءبىر دە بىرەۋىنىڭ تۇك دالەلى جوق! ءتىپتى، ازاماتتىق ءىستىڭ ءوزىن قىلمىستىق ىسكە اينالدىرتىپ جاتىر.

سوڭعى كەزدە بۇل ماسەلەگە باق ارالاسا باستاپ ەدى، تۇتۋباەۆتار سوتقا كەلۋدى قويدى. ۇساق-تۇيەكتى سىلتاۋراتىپ، تايىپ تۇراتىندى شىعاردى. اسقار تۇتۋباەۆ سوتقا قاتىستىم دەپ شىلعي وتىرىك ايتتى. ول ءومىرى سوت تىڭداۋىنا كەلگەن ەمەس، ءىنىسى باقىتبەك تۇتۋباەۆتى سالىپ قويىپ، تاسادا وتىر.

2015 جىلعى مامىر ايىنان باستاپ، مەنىڭ بۇكىل جۇمىسىم توقتادى. قىتايدان قازاقستانعا شاقىرعان، قارجى سالعان قانشاما ينۆەستورلارىم وسىلاردىڭ كەسىرىنەن ەلىنە قايتىپ كەتتى.

تولقۇجاتىم مەن «لەكسۋس-470» ماركالى اۆتوكولىگىم ىلە اۋداندىق قۇقىق قورعاۋ ورىندارىنىڭ قولىندا ەكى جىلدان بەرى كەپىلدە تۇر.

قۇرمەتتى قايرات پەرنەشۇلى!

باسىما قاۋىپ تونۋدە. بالارىم مەن ايەلىم قىتايدا قالدى. بارماعانىما ەكى جىل بولدى. تۇتۋباەۆتار ناقاق سوتتاتىپ جىبەرەيىن دەپ تۇر. ەگەر، شىنىمەن قارىز بولسام، ولار مەنى باياعىدا سوتتاتىپ تىنار ەدى. دالەلى بولماعان سوڭ، قورقىتىپ، ۇركىتىپ مويىنداتقىسى كەلەدى...

سىزدەن ماعان اراشا ءتۇسۋىڭىزدى، وسى قاۋىپتەن تەزىرەك قۇتىلۋىما كومەكتەسۋىڭىزدى وتىنە سۇرايمىن!

قۇرمەتپەن، ماسيپحان كوناي

Abai.kz