بەلىگىلى ءبىر اقىن اعاممەن سۇحباتتاسقانىمدا، «ادەبيەت الەۋمەتتىك جەلىلەنبەۋ كەرەك، كەرىسىنشە الەۋمەتتىك جەلى ادەبيەتتەنۋى كەرەك» دەگەن ويلى ءسوز ايتىپ ەدى.

بۇگىندە الەۋمەتتىك جەلىدە وتىرمايتىن اقىن، كەمدە-كەم. جاسى دا جاسامىسى دا وسىندا ءوزىنىڭ تىڭ تۋىندىلارىمەن ءبولىسىپ، پىكىر الماسۋعا بەيىم. بۇل بەلگىلى ءبىر دەڭگەيدە ادەبيەتتىڭ دامۋىنا، زاماناۋيلانۋىنا وزىندىك سەپتىگىن تيگىزىپ جاتقان بولار. الايدا، شىنايى پىكىر ايتۋ از ەكەندىگى كورىنەدى. ولاي دەۋىم بەكەر ەمەس. كەز-كەلگەن الەۋمەتتىك جەلىدە وتىراتىن جاس اقىننىڭ پاراقشاسىن اشىپ كورىڭىز. اسىرەسە ونىڭ بولىسكەن شىعارمالارى، ولەڭدەرىنىڭ استىنداعى پىكىرلەرگە كوز جۇگىرتىڭىز. كىلەڭ ماقتاۋ، ماداقتاۋ. «كەرەمەت»، «تاماشا»، «عاجاپ» دەگەن سارىنداردا ءوربيتىن «ايحايلاعان»، «پاي-پايلاعان» پىكىرلەر... ياعني، سىن جوق. ويتكەنى، «پىكىرشىلەردىڭ» كوبى ادەبيەتتەن الشاق قاراپايىم ادامدار. نەمەسە پوەزيانى ساحنادا شىرقالار اندەردىڭ ءسوزىنىڭ دەڭگەيىمەن عانا سالىستىرىپ قارايتىن ءورىمتال جاستار. «بەت كورسە، ءجۇز ۇيالادى» دەگەنىڭ كەرى بولسا كەرەك، كەيدە ءتىپتى ءمۇيىزى قاراعايداي بەلگىلى اقىندار دا سىن-ەسكەرتپە، «قىشقىل» ويلار ايتا المايدى. ايتەۋ كوپپەن بىرگە «لۇپىلدەتىپ»، «بارماق كوتەرىپ»، قوشتاپ كەتە بەرەدى.

ال، سىن جوق جەردە ءوسۋ مەن ورلەۋدىڭ بولمايتىندىعىن بىلەسىزدەر. مەنىڭشە، بۇل بۇكىل ءومىرى ۇيالى تەلەفونعا «تاۋەلدى»، الەۋمەتتىك جەلى ارقىلى ءار قادامى الەمگە ناسيحاتتالار بۇگىنگى جاستار مەن ادەبيەتشىلەر ءۇشىن جاقسىلىققا باستاماسا كەرەك.

سوزىمە دالەل، بۇگىندە ءبىراز جاستار الەۋمەتتىك جەلى ارقىلى ءجۇردىم-باردىم شۋماقتار جازىپ، شاتپاقتاپ، ويسىز، جۇيەسىز جىر قۇراپ جوعارىدا ايتقانداي قوشەمەتتەرگە يە بولىپ ءجۇر. ءتىپتى، قازىر وزدەرىن كلاسسيك ساناپ كەتتى. ەشبىر ەسكەرتپە، كولدەنەڭ سىندى كوتەرمەيتىن كۇيگە جەتتى. بۇعان سول ازاماتتاردىڭ كىناسى جوق-اۋ، ولاردى وسىناي ەتكەن ءوزىمىز. سىن پىكىر، شىن پىكىر ايتا المايتىن ادەبيەتشىلەر، وقىرماندار.

سودان الەۋمەتتىك جەلى ءالى دە بولسا ادەبيەتتەنە الماي جاتىر-اۋ دەگەن ويعا قالام... ءسىز نە ايتاسىز؟

جارقىنبەك امانتايۇلى

Facebook-تەگى پاراقشاسىنان