«اق جول» پارتياسىنىڭ توراعاسى ازات پەرۋاشەۆ جانە "قازاقستاننىڭ تۇرعىن ءۇي قۇرىلىس جيناق بانكى" اق باسقارما ءتورايىمى ءلاززات يبراگيموۆا باستاپ، پارتيا مەن بانك وكىلدەرى، جۋرناليستتەر قاتىسقان وتىرىس بولدى. وتىرىس بارىسىندا جۋرناليستتەر بانك باسشىسىنا ءارتۇرلى ساۋالدار قويدى. سۇراقتار نەگىزىنەن مەملەكەتتىك بانك ارقىلى ءۇي الۋدىڭ ءتۇرلى تەتىكتەرى حاقىسىندا بولدى. ءسوزدىڭ توق ەتەرىن ايتقاندا، العىڭىز كەلەتىن ءۇيدىڭ ەلۋ پايىزىن بانككە سالساڭىز (جيناقتاپ) قالعان سوماسىن بانك بەرىپ، ءۇي الۋىڭىزعا بولادى. قىسقاسى – وسى. ال، قازىرگى نارىقتاعى باعامەن الىپ قاراعان كۇننىڭ وزىندە جۇمىسسىز، بىراق ۇكىمەتتىڭ ەسەبىنە «ءوزىن-ءوزى جۇمىسپەن قامتاماسىز ەتۋشى» بولىپ ەنىپ كەتكەن، ۇلكەن قالانىڭ ىرگەسىنەن ءۇي جالداپ، جان باعىپ جۇرگەن مىڭداعان ادامدار بانك ارقىلى الار باسپانانىڭ 50% جيناي الا ما؟ بۇل سۇراققا ەشكىم كەسىمدى جاۋاپ بەرە المايدى. ال، بىزدەگى ەسەپتەردىڭ ءبارى ورتاشا ايلىق جالاقىمەن ەسەپتەلەدى. بانكتەر زەينەتاقى قورىڭىزعا اۋدارىمدار جۇيەلىلىگىن ءبارىبىر تالاپ ەتەدى. ويتكەنى، تولەم جاسايتىن جاعدايىڭىز بار ەكەنىنە كوز جەتكىزۋى ءتيىس. قايتپەك كەرەك؟ وسى ويلاردى قورىتا كەلە، وتىرىس بارىسىندا بانك باسشىلارىنا «كەز كەلگەن زەينەتاقى قورىنداعى اقشاسىن بانككە سالىپ، سونىڭ ەسەبىنەن ءۇي الۋعا بولا ما؟» دەپ سۇرادىق. ءلاززات يبراگيموۆا ونداي جۇيە قاراستىرىلماعانىن ايتتى. دەمەك، بۇل ماسەلە ۇدايى كوتەرىلسە، ۇكىمەتتىڭ الدىنا شىعارىلسا، تۇبىندە شەشىمىن تابادى. ماسەلەن، بەلگىلى ساياساتتانۋشى، بجزق جانىنان قۇرىلعان قوعامدىق كەڭەستىڭ توراعاسى دوسىم ساتپاەۆ ءبىر سۇحباتىندا بىلاي دەپتى: «ۇكىمەت زەينەتاقى جاسىن وسىرۋگە باس قاتىرعانشا، سالىمشىلاردىڭ ءبىر بولىگىنە ءوز جيناعىن مەرزىمىنەن بۇرىن شەشىپ الۋىنا مۇمكىندىك بەرەتىن تەتىكتى قاراستىرسا، ءجون بولار ەدى». ساراپشىنىڭ بۇل ءسوزى ءبىز ءسوز ەتىپ وتىرعان ماسەلەگە ۇستەمە بەرەدى. ياعني، ۇكىمەت سالىمشىلارعا ءوز جيناعىنىڭ ءبىر بولىگىن شەشىپ الۋعا نەمەسە قازاقستاننىڭ تۇرعىن ءۇي قۇرىلىس جيناق بانكىنە" اۋدارىم جاساۋ ارقىلى ءۇي ماسەلەسىن شەشەتىندەي مەحانيزمدەردى قاراستىرۋى ءتيىس. مۇنداي قادام ۇكىمەتتىڭ ءوزىن دە ءتيىمدى ءارى حالىقتىڭ قولداۋىنا يە بولاتىن باستاماعا اينالار ەدى. ەگەر قوعامدىق قوزعاۋ بولسا، ۇكىمەت شەشىم قابىلداسا، بانك تاراپى مۇنداي باستامانى قولدايتىنى ءسوزسىز.

نۇرا ماتاي

Abai.kz