كەشە قر پرەزيدەنتى نۇرسۇلتان نازارباەۆ رەسەيدىڭ مير-24 ارناسىنىڭ تىلشىسىنە سۇقبات بەرگەن بولاتىن. سۇقبات بارىسىندا قازاق مەملەكەتىنىڭ باسشىسى ايتقان ويلار باق-تاردا تەز تاراپ جاتىر.  سونىڭ ءبىرى ەلباسىنىڭ ەكستەرميستىك ۇيىمدارعا قاتىستى بىلدىرگەن پىكىرى بولدى.

«قر زاڭدارى بويىنشا، ەگەر ءبىزدىڭ ەلدىڭ ادامى ەلدەن كەتىپ، قاندايدا ءبىر ەكستەرميستىك ۇيىمعا مۇشە بولىپ، سودان سوڭ قايتىپ ورالعان جاعدايدا، ول مىندەتتى تۇردە ازاماتتىقتان ايرىلادى. بۇل ءماجبۇرلى شارا»، - دەدى نازارباەۆ.

پرەزيدەنت بۇنداي شارانى قولدانۋدىڭ قاجەتتىلىگى  قوعامعا بەيىمدەۋ ورتالىقتارىنىڭ قىزمەتى ناقتى ناتيجە بەرە الماي جاتقانىنا بايلانىستى تۋىنداپ وتىرعانىن ەسكەرتتى.

«ءبىرىنشى كەزەكتە قاراپايىم ادامنىڭ سودىرلار قاتارىنان تابىلماۋىن قامتاماسىز ەتەتىن شارانى قولعا الۋىمىز كەرەك. ءبىز «يسلام مەملەكەتى» سياقتى ۇيىمنان ورالعانداردى قوعامدىق ورتاعا تارتۋ ءۇشىن بەيىمدەۋ جانە اعارتۋ جۇمىستارىن جاساپ كوردىك، بىراق، ول ىسىمىزدەن ەشتەڭە ونبەدى. سوندىقتان ولاردى ەندى قايتىپ ۇيگە كىرگىزبەۋدىڭ قامىنا كىرىستىك»، - دەدى مەملەكەت باسشىسى.

«يسلام مەملەكەتى» - قازاقستاندا ءىس-ارەكەتىنە تيىم سالىنعان ءدىني ۇيىم. اتالعان ۇيىمنىڭ قۇرامىندا قازىر بۇرىنعى سوۆەتتەر وداعىنا مۇشە بولعان ەلدەردىڭ ازاماتتارى دا ءجۇر. ولاردىڭ سانى بەس مىڭنان اسادى دەگەن دەرەك بار.

Abai.kz