قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ ۇيىمداستىرۋىمەن استانا قالاسىنداعى ۇلتتىق اكادەميالىق كىتاپحانادا وسى ۆەدمستۆوعا قاراستى قوعامدىق كەڭەس توراعاسى مىرزاتاي جولداسبەكوۆتىڭ توراعالىعىمەن القالى باس قوسۋ ءوتتى، - دەپ حابارلايدى اباي-اقپارات.

بۇل جيىن «ەگەمەن قازاقستان» گازەتىنىڭ بۇگىنگى سانىندا جاريالانعان ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن تالداۋعا ارنالدى.

جيىنعا قاتىسقان اكادەميك عاريفوللا ەسىم، پروفەسسورلار قاجىعالي مۇحامبەتقالي، نامازالى وماشەۆتار ءوز ويلارىن ورتاعا سالىپ، ەلباسىنىڭ ماقالاسىن ۇلكەن ىقىلاسپەن وقىپ شىققاننان كەيىن ەداۋىر وي تۇيگەندەرىن اڭگىمەنىڭ ارقاۋىنا اينالدىردى.

اسىرەسە ەلباسى ايتقان «ۇلتتىق سالت-داستۇرلەرىمىز، ءتىلىمىز بەن مۋزىكامىز، ادەبيەتىمىز، جورالعىلارىمىز، ءبىر سوزبەن ايتقاندا ۇلتتىق رۋحىمىز بويىمىزدا ماڭگى قالۋعا ءتيىس» دەگەن دانالىق ءسوزى قاي-قايسىمىزدى بولسا دا رۋحتاندىرارى ءسوزسىز.

ەلباسىنىڭ ماقالاسىنداعى تاعى ءبىر دانا سوزىنە، ياعني «ابايدىڭ دانالىعى، اۋەزوۆتىڭ عۇلامالىعى، جامبىلدىڭ جىرلارى مەن قۇرمانعازىنىڭ كۇي­لەرى، عاسىرلار قويناۋىنان جەتكەن بابالار ءۇنى – بۇلار ءبىزدىڭ رۋحاني مادەنيەتىمىزدىڭ ءبىر پاراسى عانا» دەگەن ويىنا توقتالعان «استانا-وپەرا» تەاترىنىڭ باس ديرەكتورى عالىم احمەدياروۆ پەن «قازاق اۋەندەرى» اق-نىڭ باسشىسى اسحات مايامەروۆتەر قازاق مادەنيەتىن تىرىلتۋگە قاتىستى ءوز ويلارىن ورتاعا سالدى.

ال، تىلدەردى دامىتۋ جانە قوعامدىق ساياسي جۇمىس كوميتەتى توراعاسىنىڭ ورىنباسارى عالىمجان مەلدەشوۆ لاتىن الىبيىنە كوشۋدىڭ قاجەتتىلىگى تۋىنداعانىن تىلگە تيەك ەتىپ، ەلباسىنىڭ بۇل ۇسىنىستارىن بارىنشا قولدايتىنىن جەتكىزدى.

شىڭعىس بەردىقوجا

Aباي-اقپارات