قازاقتىڭ ءبارى تەكتى. قازاقستاننىڭ بارلىق جەرى كيەلى. تەكسىز قازاق جوق. كيەسىز جەر جوق. سەنبەسەڭىز تويعا بارىڭىز. باتىس پەن شىعىس، وڭتۇستىك پەن سولتۇستىك قۇدالاسىپ جاتسا دا، ارعىننىڭ قىزىن ادايدىڭ ۇلى السا دا، الباننىڭ قىزى كەرەيدىڭ ۇلىنا تيسە دە، ەستيتىنىمىز وسى ءسوز. اينالايىندار-اۋ، اقىر ءبارىمىز تەكتى ەكەنبىز، جەرىمىز كيەلى ەكەن، ونى قايتا-قايتا ايتا بەرىپ نە كەرەك؟.

ۇلكەن تويدا العاش بولىپ ءسوز العان جىگىتتىڭ كىشى شەشەسى ەسەبىندەگى جەڭگەسى نەمەسە اكەسىنىڭ اعاسى باستايدى. قۇدالارعا ءسال كىشىرەيە، ءسال ىڭىرانا سويلەپ:

- قىزدارىڭىز جامان جەرگە كەلگەن جوق. قۇدايا، ءتاۋبا، وسكەن ەلمىز، ونگەن اۋلەتپىز. رۋىمىز ۇلى ءجۇزدىڭ نوقتا اعاسى. جەر قورعاعان بالەنشە باتىر بابامىز بەن ەل بيلەگەن تۇگەنشە اعامىزدى ءبارىڭىز بىلەسىزدەر. سولار ءبىزدىڭ ماقتانىشىمىز. ال، مىنا قىزدارىڭىزدى الىپ وتىرعان بالامىز ۋنيۆەرسيتەتتى قىزىل ديپلومعا بىتىرگەن. قازىر بالەنباي دەگەن كومپانيادا تۇگەنباي دەگەن قىزمەتتە (ايلىعى 220 مىڭ دەمەي تۇرعاندا توقتاي قالسا ەكەن دەپ تىلەپ تۇراسىڭ) - نو تو پوشلو، قىزدارىڭدى العانىنا راحمەت ايتىڭدار،-دەي جازداپ بارىپ توقتايدى-اۋ.

كەلەسى كەزەك قىز جاققا كەلەدى. ول جاقتىڭ دا كوش باستاعان كوسەمى، ءسوز باستاعان شەشەنى ميكروفوندى قولىنا الار-الماستان كوسىلىپ تە، شەشىلىپ تە سالا بەرەدى. اۋەلگى ءسوز بەلگىلى: «ءبىزدىڭ دە قىز جامان جەردەن شىققان جوق». ال، كەپ دالەلدەيدى دەيسىڭ. وووۋ عاسىرداعى باباسى مەن كەشە عانا اياق استى بايىپ، اۋىلعا مەشىت سالعان باۋىرلارىنا جەتەم دەگەنشە ءبىراز تاريح تىلگە تيەك بولادى. ءسوز سوڭىندا:

- ايكونايدىڭ ءوزىن بىلاي قويعاندا، كىشى ءسىڭىلىسىنىڭ ءوزى كىشى ءسىڭىلىسىنىڭ ءوزى «بولاشاق» باعدارلاماسىمەن شەت ەلدە وقىپ جاتىر. كەلە المادى. قازىر تويدىڭ ورتاسىندا ۇيالى تەلەفونمەن حابارلاسىپ بارلىقتارىڭىزدىڭ كوزدەرىڭىزشە قۇتتىقتايدى دەيدى. ءسىز تۇراسىز ءبىر شەتتە، ءبىزدىڭ قانات تا «بولاشاقپەن» كەتتى عوي دەپ.

ءسويتىپ ەكى تەكتى اۋلەت تەگىن تۇگەندەيمىن دەگەنشە تەكسىز مينۋتتار تەنتىرەپ الىپ كەتەدى. قۇداي-اۋ بۇل اڭگىمەلەر قۇدالىققا دەيىنگى اڭگىمە ەمەس پە ەدى؟. جالپى رەكلاما دەگەن وتپەي تۇرعان زاتتارعا جاسالماي ما. جاقسى نارسەگە نەنىڭ جارناماسى كەرەك؟ باسقاسىن قويشى، ءبىرىن-ءبىرى قالاپ قوسىلعاننان ەكى جاستى ءبىر-بىرىنە ماقتاعانى نەسى؟

بۇل ىلعي كورەتىن كورىنىس. جاڭالىق ەمەس. ەگەر بىلاي بولسا جاڭالىق بولار ەدى.

- سىزدەرمەن قۇدا بولعالى قاتتى قۋاندىق. سىزدەردەن ۇيالعانىمىزدان وسى تويدى جاساپ جاتىرمىز. ايتپەسە توي جاساپ جىرعايتىنداي ءجونىمىز جوق. ءوزى ءۇش ۇل ەدى، ۇلكەنىمىز كىسى پىشاقتاپ التى جىلعا سوتتالىپ بىلتىر عانا شىقتى. ەكىنشى ۇل قاڭعىپ قالادا ءجۇر. تاپقانىنىڭ ءبىر تيىن بەرەكەسى جوق. مىنا بالا دا كىشكەنە تۋپويلاۋ ەدى، سىزدەردىڭ قىز قالاي تيە قويدى دەپ تاڭعالدىق. ماحاببات دەگەن وسى ەكەن عوي، - دەسە.

ءولىپ بارا جاتساق دەمەيمىز. جاساي بەرەيىك. ءبورى ارىعىن بىلدىرمەس. بالامىزدىڭ تەنتەكتىگى، قىزىمىزدىڭ ەركەلىگى بار شىعار. بىراق، ونىڭ ءبارى انشەيىن نارسە. ەڭ باستىسى بابامىز تەكتى. ماقتاۋعا تۇك تاپپاساق اسەم تابيعاتىمىز بار.

بەيبىت سارىباي

Facebook-تەگى پاراقشاسىنان