قازاقتىڭ باتىر قىزى مانشۇك مامەتوۆانىڭ رەسەيدەگى ەسكەرتكىشىن مازاق ەتكەن ءبىر توپ جاستىڭ بەينە جازباسى الەۋمەتتىك جەلىدە جاريا بولدى.

بۇل جاعداي رەسەيدىڭ پسكوۆ وبلىسىنا قاراستى نەۆەل قالاسىندا بولعان. ءبىز قۇزىرلى ورگانداردان (قر ءسىم، قر-نىڭ رەسەيدەگى ەلشىلىگى مەن رف-نىڭ قازاقستانداعى ەلشىلىگىنەن) قازاقتىڭ باتىر قىزىنىڭ "باسىنا شىققان" جەتەسىزدەردىڭ تاعىلىق (ۆانداليزم) ارەكەتىنە بەيجاي قاراماۋدى تالاپ ەتەمىز.

ويتكەنى كەڭەس وداعىنىڭ باتىرى مانشۇك مامەتوۆا سۇراپىل سوعىس جىلدارى ءدال وسى پسكوۆتاعى نەۆەل قالاسىن قورعاعانى بەلگىلى. قازاقتىڭ قارشاداي عانا قىزى اۋىر جارالانعانىنا قاراماستان پۋلەمەتتەن وق بۇركىپ، اسقان ەرلىك كورسەتتى.

ال 1978 جىلى پسكوۆتاعى نەۆەل قالاسىندا باتىر قىزعا ەسكەرتكىش ورناتىلعان-دى. ءتىپتى، قازىر قالادا مانشۇك مامەتوۆا اتىنداعى كوشە دا بار. باتىر قىزدىڭ بەيىتى دە نەۆەل توپىراعىندا جاتىر.

ال ورىس (رەسەي ازاماتتارى) جاستارىنىڭ باتىر "قىزدىڭ باسىنا شىعۋى" - ۇلتارالىق داۋدىڭ بىلتەسىن تۇتاتار ءتۇرى بار. بۇل - بۇكىل كەڭەس وداعىنا ەرلىگىمەن ورتاق مانشۇك مامەتوۆانىڭ ارۋاعىن، قازاق حالقىنىڭ تاريحي تۇلعاسىن اشىقتان-اشىق قورلاۋ.

ەكىنشى دۇنيەجۇزىلىك سوعىس ەستەلىكتەرى وڭدى-سولدى بۇرمالانىپ جاتقان قازىرگىدەي كەزدە قازاقستاننىڭ ءام رف-نىڭ قۇزىرلى بيلىگى بەتىمەن كەتكەن ءبىر توپ جاسقا شارا قولدانۋى كەرەك.

ايتا كەتەيىك، جاقىندا رەسەي پرەزيدەنتى ۆلاديمير پۋتين بۇرىنعى كسرو قۇرامىندا بولعان كەيبىر مەملەكەتتىڭ ەكىنشى دۇنيەجۇزىلىك سوعىستاعى ەرلىگىن جوققا شىعاردى. دالىرەك ايتساق، بۇگىندە ساياسي ۇستانىمدارى بولەك بالتىق ەلدەرى مەن گۇرجىستاندى سوعىس جەڭىمپازدارى ساپىنان سىزىپ تاستادى. ال كرەملدىڭ سارجاعال ساياساتكەرلەرى ء"بىز ەكىنشى دۇنيەجۇزىلىك سوعىستا ۋكرايناسىز دا جەڭەتىن ەدىك" دەپ ءبوستى.

بۋىنى بوس بۇنداي سوزدەر بۇگىنگى ساياسي احۋالدىڭ بۋىمەن ايتىلعانىمەن، تاريحي شىندىقتى پۋتين جازىپ شىقپاسى انىق. دەسەك تە، رەسەيدىڭ ۋكراينا، گرۋزيا جانە بالتىق ەلدەرىمەن باسى اراز ەكەنى تاعى دا راس.

ورىس (رەسەي ازاماتتارى) جاستارىنىڭ تاعىلىق، نەويمپەرياليستىك (باسقىنشى) ءام شوۆينيستىك ارەكەتتەرى كرەمل ساياساتىنىڭ جەمىسى ەكەنى داۋسىز. مانشۇك مامەتوۆانىڭ ەسكەرتكىشىنە شىعىپ، ويىنا كەلگەندى جاساۋ - باتىر قىزدىڭ ارۋاعىن قورلاۋ عانا ەمەس، ونىڭ ەرلىگىن دە مويىنداماۋ ەمەس پە؟

نۇرگەلدى ابدىعانيۇلى

Abai.kz