جەكسەنبى, 26 قاڭتار 2020
قۇيىلسىن كوشىڭ 4073 6 پىكىر 30 مامىر, 2017 ساعات 23:34

ءۇش جىلعا بەرىلەتىن ۆيزانى بارلىق ەتنيكالىق قازاققا ورتاق ەتۋدى سۇرايمىن!

قازاقستاننىڭ سىرتقى ىستەر ءمينيسترى

ق.ق. ابدىراحمانوۆقا

 2016 جىلدىڭ 01 قاراشاسىندا قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشەۆ استانادا ءباسپاسوز ءماسيليحاتىن وتكىزىپ، «قانداستارىمىزعا بۇعان دەيىن ۆيزا 1 جىلعا عانا بەرىلىپ كەلسە، ەندى 3 جىل ۋاقىتپەن بەرۋگە وڭ شەشىمىن تاپتى» (http://www.old.inform.kz/rus/article/2952218) - دەپ، قۋانىشتى حابار تاراتقان ەدى.

شىنىمەن دە، سول ۆيزا كەزەگىنىڭ ازابىن ءبىر كىسىدەي تارتقان قازاقتار بولسا، ول – قىتايدا تۇراتىن قانداستارىمىز ەكەنى انىق.

شاحرات نۇرىشەۆتىڭ مالىمەتى بويىنشا "قىتايدان وزگە مەملەكەتكە شىعۋعا قۇجاتتارى تولىق 800 مىڭنان استام قانداسىمىز بار ەكەن. ال، قولدا بار مالىمەت بويىنشا، قىتايدا 1 542 600 قازاق تۇرادى. قحر-دان اتاجۇرتقا كوشىپ كەلگىسى كەلەتىن قانداستارىمىزدىڭ كوپتىگىنىڭ سىرتىندا، تمد-نىڭ ەڭ دامىعان مەملەكەتتەرىنىڭ قاتارىنداعى ۇلى دالا ەلىنە ىسكەرلىك، ساياحات، ساۋدا-ساتتىق سىندى تولىپ جاتقان سەبەپپەن وزگە ۇلت وكىلدەرىنىڭ دە اعىلىپ جاتقانىن، ولارعا ۆيزا راسىمدەيتىن كونسۋلدىق قىزمەتكەرلەردىڭ سانىنىڭ تىم شەكتى ەكەنىن ەسكەرسەك، ارينە، ۆيزا كەزەگىنىڭ ۇزاققا سوزىلۋى قالىپتى قۇبىلىس.

دەمەك، وسىنداي قيىن جاعدايدا قر سىرتقى ىستەر مينيسترلىگىنىڭ ۇلت كوشباسشىسى نۇرسۇلتان نازارباەۆتىڭ تاريحي، ستراتەگيالىق ماڭىزى توتەنشە زور كوشى-قون ساياساتىنىڭ استارىن تەرەڭ ءتۇسىنىپ، شەتتەگى قانداستارىمىزدىڭ وتانىنا كوپتەپ ورالۋىنا بۇلاي جاعاداي جاساۋى، شىن مانىندە، ۇلكەن كورەگەندىك!

وكىنىشكە وراي، قىتايدان كەلىپ-كەتىپ جاتقان قازاقتاردان جەتكەن مالىمەت بويىنشا، ءۇش جىلعا كوپ مارتەلى ۆيزا بىردەن بەرىلمەي، تەك ەكىشى مارتە ۆيزا الۋعا ءوتىنىش بەرگەن قانداستارىمىزعا عانا بەرىلەدى ەكەن. ال، ەندى ءبىر حابارعا قاراعاندا، جاسى الپىستان اسقان ادامدارعا عانا راسىمدەلەدى دەيدى...

قىسقاسى، ءۇش جىلعا كوپ مارتە سۇراپ ارىز بەرگەن قانداستارىمىزدىڭ ءبارى بۇل جەڭىلدىككە يە بولا بەرمەيتىنى انىق بولدى.

سىرتقى ىستەر مينيسترلىگىنەن قازاقستان رەسپۋبليكاسىنا كەلۋگە ۆيزا سۇراعان ەتنيكالىق قازاقتاردىڭ ءبارىن قاناعاتتاندىرۋلارىڭىزدى سۇرايمىن.

سونداي-اق، وسى ماسەلەنى انىقتاپ، ول جاقتا تۇراتىن قانداستارىمىزعا تولىق اقپارات بەرۋلەرىڭىزدى ءۇمىت ەتەمىن.

قۇرمەتپەن، اۋىت مۇقيبەك

Abai.kz

6 پىكىر