ەلباسىنىڭ قىزى اكادەميك اتاندى
مەملەكەت باسشىسى نۇرسۇلتان نازارباەۆتىڭ ورتانشى قىزى دينارا قۇلىباەۆا قر ۇلتتىق عىلىم اكادەمياسىنىڭ اكادەميگى اتاندى. ءدال وسىنداي عىلىمي اتاق قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى مارات تاجينگە دە بەرىلىپ وتىر. بۇل تۋرالى عىلىم اكادەمياسىنىڭ سايتىندا جاريالانعان.
اكادەميانىڭ جاڭا مۇشەلەرى 1 ماۋسىمدا وتكەن قر ۇعا-نىڭ جالپى جيىنىنىڭ سەسسياسىندا سايلانعان. دينارا نۇرسۇلتانقىزى قۇلىباەۆا قوعامدىق جانە گۋمانيتارلىق عىلىمدار بولىمشەسىنىڭ اكادەميگى اتانسا، مارات ءتاجين الەۋمەتتانۋ سالاسىنىڭ اكادەميگى اتاعىنا يە بولدى.
سونىمەن قاتار، ەكس-ءمۇفتي ءابساتتار قاجى دەربىسالى دە "شىعىستانۋ" عىلىمىنىڭ اكادەميگى اتاندى. جالپى، عىلىمداعى ەڭ جوعارى وسىناۋ اتاق بارلىعى 69 ادامعا بەرىلگەن. ولاردىڭ قاتارىندا مەديتسينا، ادەبيەت، تاريح جانە ماتەماتيكا سالالارىنا ەلەۋلى ۇلەس قوسقان عالىمدار بار.
اباي-اقپارات
