وسىدان تۋرا ءبىر جىل بۇرىن، ياعني 2016 جىلدىڭ 5 ماۋسىمىندا تەراكت بولىپ، سونىڭ سالدارىنان ونداعان ادام قازا تاپتى.

5 ماۋسىم كۇنى استانا ۋاقىتى بويىنشا 16.00-دە الەۋمەتتىك جەلىلەردە اقتوبەنىڭ بىرنەشە اۋدانىندا اتىس بولىپ جاتقانى جايلى حابارلار تارادى. كۋاگەرلەردىڭ ايتۋىنشا، ارنايى وپەراتسيا قاتارىنان ءۇش اۋداندا ءوتىپ جاتقان - بەسىنشى ىقشاماۋدان، فيلارمونيا ماڭى جانە "پاللادا" قارۋ-جاراق دۇكەنى. زارداپ شەككەندەر جايلى ءبىر-بىرىنە قايشى مالىمەتتەر تارالا باستادى.  ىشكى ىستەر مينيسترلىگىنەن ءبىرىنشى تۇسىنىك استانا ۋاقىتى بويىنشا 18.00-دە ءتۇستى.

پوليتسياداعىلار 5 ماۋسىمدا ساعات اقتوبە ۋاقىتى بويىنشا 14.28-دە ءدىني راديكالدار توبىنىڭ قارۋ-جاراقتى يەمدەنۋ ءۇشىن "پاللادا" قارۋ-جاراق دۇكەنىنە شابۋىل جاساعانىن حابارلاعان. قىلمىسكەرلەر دابىل باتىرماسىن باسىپ ۇلگەرگەن ساتۋشىنى بىرنەشە جەرىنەن پىشاقتاپ ءولتىردى. شاقىرتۋ بويىنشا وقيعا ورنىنا "جەدەلكۇزەت" جشس جەكە كۇزەت ۇيىمىنىڭ ەكى قىزمەتكەرى ءبىرىنشى بولىپ كەلەدى، ولاردىڭ ءبىرى سول جەردە ولتىرىلگەن، ەكىنشىسى جاراقات العان.

"پاللادا" دۇكەنىنە پوليتسيا جاساعى كەلىپ جەتىپ، قىلمىسكەرلەر ولارعا قارۋلى قارسىلىق كورسەتكەن. اتىس بارىسىندا ءۇش پوليتسەيگە وق ءتيىپ، جارالانعان، ال قىلمىسكەرلەر پاترۋلدىك كولىكتى باسىپ العان.  قىلمىسكەرلەر وسى دۇكەننەن 17 قارۋ (3 ءيىر ويىقتى جانە 14 تەگىس ۇڭعىلى اڭشى مىلتىعى), 3 گاز تاپانشاسى، وقدارى مەن پىشاقتار الىپ كەتكەن.   "پاللادا" دۇكەنىنە جاسالعان شابۋىلدان ءبىر ساعات وتكەندە قارۋلانعان قىلمىسكەرلەر ەكى توپقا بولىنگەن. ءبىر توپ التى ادام بولىپ، پاترۋلدىك كولىكپەن "پانتەرا" دەپ اتالاتىن تاعى ءبىر قارۋ-جاراق دۇكەنىنە شابۋىل جاسايدى. مۇندا ولار دۇكەنگە كەلگەن ەكى ادامدى پىشاقتاعان، ولاردىڭ ءبىرى جاراقات الىپ، ەكىنشىسى قازا تاپتى.

"پانتەرا" دۇكەنىنە كەلىپ جەتكەن پوليتسيا قىزمەتكەرلەرى اتىس بارىسىندا ءۇش قىلمىسكەردىڭ كوزىن جويادى، بىرەۋى جاراقات الىپ، ۇستالادى، ەكەۋى جاسىرىنىپ ۇلگەرەدى. ولار كەيىنىرەك قالا سىرتىندا تابىلىپ، ولتىرىلەدى.  ال ەكىنشى توپ كوشەدەن اۆتوبۋستى باسىپ الىپ، سالونداعى جولاۋشىلار مەن جۇرگىزۋشىنى شىعارىپ تاستايدى. ءسويتىپ، قىلمىسكەرلەر اۆتوبۋسپەن ۇلتتىق ۇلاننىڭ № 6655 اسكەري ءبولىمىنىڭ قاقپاسىن سوعىپ، ءبولىمنىڭ تەرريتورياسىنا كىرىپ، اسكەري جاساقپەن جانە كەلىپ جەتكەن پوليتسيا قىزمەتكەرلەرىمەن اتىسقان.

تويتارىستان كەيىن قىلمىسكەرلەر توبىنا توسقاۋىل قويىلدى، ال ەكىنشى توپ قاشىپ كەتكەن. اتىس بارىسىندا قىلمىسكەرلەردىڭ ءبىرى ءولتىرىلىپ، تاعى ءبىرى جارالاندى. ۇلتتىق ۇلاننىڭ اسكەريلەرىنىڭ قاتارىندا ۇشەۋى قازا تاۋىپ، التاۋى جاراقات العان.

"17 ادامنان تۇراتىن ەكىنشى توپ اۆتوبۋستى باسىپ العاننان كەيىن قارۋ-جاراق دۇكەنىنەن الىپ شىققان قارۋمەن اسكەري بولىمگە شابۋىل جاسادى. ول جاقتا نەلىكتەن سونشالىقتى كوپ اسكەريدىڭ قازا تاپقانى مەن جاراقات العانى تۇسىنىكتى. ىشكى جاساق بولعان، بىراق ولاردىڭ قولىندا تەك سۇڭگى-پىشاق بولعان. ولاردىڭ بارلىعى قارۋسىز ەدى. ارينە قىلمىسكەرلەر كىرىپ بارىپ، ءتارتىپسىز وق اتقان، ءبىرىنشى زارداپ شەككەندەر - وتكىزۋ-باقىلاۋ بەكەتىنىڭ ماڭىندا تۇرعاندار. قىلمىسكەرلەردىڭ ماقساتى ىشكە كىرىپ، قارۋ-جاراق ساقتالعان بولمەگە ەنىپ، قارۋدى الۋ بولدى. ول جاقتا ءبىزدىڭ قارۋلى اسكەريلەر تۇردى، ولار ءبىرىنشى توسقاۋىل بولدى. سوسىن ءبىزدىڭ پوليتسەيلەر بارعاندا قىلمىسكەرلەر قويمالار ارقىلى قاشا باستادى. ءبىر توپقا توسقاۋىل قويىلدى، قالعان توپتىڭ قاقپادان ءوتىپ، جاسىرىنعانىن كەيىن بىلدىك. قالعان قىلمىسكەرلەردىڭ بىرەۋى ءولتىرىلىپ، ەكىنشىسى جاراقات الىپ، ۇستالدى", - دەدى قالمۇحانبەت قاسىموۆ كەيىن وتكەن بريفينگتە.

"پاللادا" دۇكەنىنىڭ ماڭىندا ىزدەستىرۋ شارالارىن جۇرگىزۋ بارىسىندا پوليتسيا قىزمەتكەرلەرى وسى قىلمىستارعا قاتىسى بار دەگەن كۇدىكپەن بەس ادامدى ۇستاپ، ولاردى پوليتسيا بولىمىنە جەتكىزدى.  تۇنگى جەدەل-ىزدەستىرۋ شارالارىنىڭ بارىسىندا تاعى بەس قىلمىسكەردىڭ كوزى جويىلىپ، ەكەۋى ۇستالدى. ولار ءتارتىپ ساقشىلارىنا قارسىلىق كورسەتكەن.

قارۋلى شابۋىلدارعا قاتىسى بار قىلمىسكەرلەردىڭ بارلىعىنىڭ اتى-ءجونى انىقتالدى. اقتوبە وبلىسىندا كونترتەررورلىق وپەراتسيا رەجيمى ەنگىزىلدى. ەلدىڭ ىشكى ىستەر ورگاندارىنىڭ بارلىق ىشكى قۇرامى كۇشەيتىلگەن قىزمەتكە كوشىرىلدى.  اقتوبەدە ارنايى وپەراتسيا جۇرگىزۋ بارىسىندا قوعامدىق كولىك جۇمىسى توقتاتىلدى، سونىمەن قاتار كوڭىل كوتەرۋ مەكەمەلەرى جابىلىپ، ينتەرنەت ءوشىرىلدى. اقتوبە تۇرعىندارىنا كوشەگە شىقپاۋ تۋرالى SMS حابارلاما كەلىپ جاتتى.  قازاقستاندىقتار مەسسەندجەرلەر ارقىلى ءتۇرلى فوتولار مەن ۆيدەولار تاراتا باستادى.

ايتا كەتەيىك، ءىىم وكىلدەرى ەكى ۆيدەوعا قاتىستى تۇسىنىك بەرگەن ەدى. ۆيدەولاردا بىرنەشە ادام كولىك ىشىندە وتىرىپ، پوليتسەيلەردى اتادى. الايدا بۇل قازاقستاندىق سەريالدىڭ جارناماسى بولىپ شىعىپ، مۇنىڭ اقتوبەدەگى وقيعالارعا قاتىسى جوق ەكەنى رەسمي تۇردە راستالادى.  5 ماۋسىمدا كەشكى ۋاقىتتا بيلىك وكىلدەرىنىڭ ىشىنەن اقتوبەدەگى جاعدايعا قاتىستى ءبىرىنشى بولىپ سەنات سپيكەرى قاسىم-جومارت توقاەۆ پىكىر ءبىلدىردى.

"قاسيەتتى ورازا قارساڭىندا بولعان اقتوبەدەگى تەراكت - قىلمىسكەرلەردىڭ شەكتەن تىس زۇلىمدىعى مەن كورسەتكەن قورلىعى. ولاردى جازالاۋ بويىنشا قاتاڭ شارالار قابىلدانىپ جاتىر", - دەپ جازدى توقاەۆ Twitter جەلىسىندە.

سول كەزدەگى قازاقستان ستراتەگيالىق زەرتتەۋلەر ينستيتۋىنىڭ ديرەكتورى ەرلان قارين اقتوبەدە سودىرلاردىڭ كۇش قۇرىلىمدارى مەن بيلىكتىڭ جۇمىسىن توقتاتىپ تاستاۋى مۇمكىن بولعانىن ايتتى. الايدا ساراپشى كۇش قۇرىلىمدارىنىڭ بۇل جاعدايدىڭ الدىن الا بىلگەنىن جازدى.

6 ماۋسىمدا تاڭعى ۋاقىتتا قر اقپارات جانە كوممۋنيكاتسيا ءمينيسترى داۋرەن اباەۆ 5 ماۋسىم كۇنى اقتوبەدە بولعان جاعدايعا قاتىستى پىكىر ءبىلدىردى.  قمدب-نىڭ توراعاسى، باس ءمۇفتي ەرجان قاجى مالعاجىۇلى اقتوبەدەگى وقيعالارعا بايلانىستى ۇندەۋ جاسادى.

قر ىشكى ىستەر ءمينيسترى قالمۇحانبەت قاسىموۆ اقتوبەدە بولعان وقيعانى تەررورلىق اكت دەپ اتادى. ءسويتىپ، ول ناقتى مالىمەتتەردى كەلتىردى: اتىس جونىندە: 12 قىلمىسكەردىڭ كوزى جويىلدى، التاۋى جارالاندى، 6-7 ادام ىزدەۋدە ءجۇر.

وسى جيىندا سول كەزدەگى قر پرەمەر-ءمينيسترى كارىم ءماسىموۆ مەملەكەت باسشىسىنىڭ اقتوبەدەگى جاعدايدى جەكە باقىلاۋىندا ۇستاپ وتىرعانىن ايتتى.  اقتوبە وبلىسىنىڭ اكىمى بەردىبەك ساپارباەۆ قالادا جاعدايدىڭ تۇراقتى ەكەنىن ايتىپ سەندىردى.  پوليتسيانىڭ مالىمەتىنشە، اتىس كەزىندە دۇكەن ساتۋشىسى، كۇزەت ۇيىمىنىڭ قىزمەتكەرى، قارۋ-جاراق دۇكەنىنە كەلۋشى، ءۇش اسكەري قازا تاپقان.

(ماتەريال بىلتىر kaz.tengrinews.kz سايتىندا جاريالانعان اقپارات نەگىزىندە دايىندالدى)

اباي-اقپارات