«قىتاي تاريحشىلارى قازاق جەرىنە كوزىنىڭ سۇعىن قاداپ وتىر»، «قازاق جەرىن قىتاي مەكتەپ وقۋلىقتارىندا پايدالاناتىن كارتاعا ەنگىزىپ قويىپتى» دەپ، كەشە ءبىراز كەيىپ الدىق. بۇل ءوزى كوپتەن بەرى كوتەرىلىپ كەلە جاتقان ماسەلە ەكەنىن ەلدىڭ ەسىنە سالىپ، قىتاي تاراپىنىڭ ويىندا نە بار ەكەندىگىنە بولجام جاساپ تا كوردىك. ءسويتىپ وتىرساق، ءبىزدىڭ ازىرگە اتى-جوندەرى جاريا ەتىلە قويماعان ءبىر سۋرەتشىلەرىمىز قىرىمدى الىپ رف-نىڭ تەرريتورياسىنا قوسىپ قويىپتى. سوعان بايلانىستى ۋكراينا ەلشىلىگى قازاقستاننىڭ سىرتقى ىستەر مينيسترلىگىنەن تۇسىنىك تالاپ ەتتى.

ماسەلە بىلاي بولعان. كەشە استاناداعى «نۇرلى جول» بۋلۆارىندە  Astana Art Fest فەستيۆالى ءوتىپ، وسى فەستيۆالدە قىرىمدى رەسەيدىڭ شەكارالىق اۋماعىندا بەينەلەگەن ينستاللياتسيا كورەستىلگەن. سونى بايقاپ قالعان ۋكراينا ەلشىلىگى قر سىرتقى ىستەر مينيسترلىگىندەگى ارىپتەستەرىنە حابارلاسىپ، «رف كارتاسى – ۋكراينانىڭ تۇتاستىعى مەن تاۋەلسىزدىگىنە نۇقسان كەلتىرىپ تۇر. سوندىقتان ۋكراينا تاراپى قازاقستاننىڭ سىرتقى ىستەر مينيسترلىگىنەن قانداي دا ءبىر ناقتى جاۋاپ پەن شەشىم كۇتەدى»، - دەپ حات جىبەرگەن.

الگىندەي ىڭعايسىز جاعدايعا بايلانىستى بۇگىن قر سم ۆيتسە-ءمينيسترى مۇحتار تىلەۋبەردى جۋرناليستەرمەن جۇزدەسىپ، بۇل جايتتى ساياسايلاندىرۋدىڭ قاجەتى جوق دەدى.

- بۇل جايتتى ساياسيداندىرۋدىڭ قاجەتى جوق. ءيا، ينستاللياتسيا بولدى، بىراق ول  شىعارماشىلىق ۇجىمنىڭ جۇمىسى. شىعارماشىلىق ۇجىم وزدەرىنىڭ جاڭىلىسقاندارىن، الايدا، ەشقانداي ساياسي ويلارى بولماعانىن ايتىپ، اقتالىپ وتىر. شاماسى سۋرەتشىلەر ساياسي ماسەلەدەن گورى بۇل جەردە شىعارماشىلىق شەشىمگە ءمان بەرسە كەرەك، - دەدى ۆيتسە-مينيستر.

ۋكرايندەردىڭ نە دەيتىنىن بىلمەيمىز، بۇنداي جاۋاپقا قازاق: «ءوي، سوزىڭە بولايىن!..»، - دەپ كەيىستىك تانىتار ەدى. راسىندا، سولاي ەمەس پە؟ شىعارماشىلىق شەشىمگە ءمان بەرگەن سۋرەتشىلەر رف-نىڭ كارتاسىنا اكەلىپ قىرىمدى قوسپاسا، بولمايتىن با ەدى؟ بۇنى قانشا جەردەن اقتاساڭ دا، استارىندا ارام پيعىل، اسىرە رەسەيشىل كوزقاراس جاتىر. اسىرە رەسەيشىل كوزقاراستاعى ادامدار رەسەيگە بۇيرەگى بۇرىپ تۇراتىنىن، قىرىمدى اننەكسيالاپ العان كرەملدىڭ ارەكەتىن قوس قولداپ قولدايتىنىن، بۇنداي جاعداي قازاقستاندا دا بولسا ەكەن دەپ تىلەيتىنىن استە جاسىرا الماي ارەدىك وسىلاي كورسەتىپ الادى. مىنا جايت سونىڭ بەتكە شىققان ءبىر كورىنىسى بولسا كەرەك.

شىعارماشىلىق توپتىڭ "شابىتتانىپ" كەتىپ سالعان سۋرەتى ءۇشىن قازاق ديپلوماتياسى ۋكراين ەلشىلىگەنەن كەشىرىم سۇراپ جاتىر.

Abai.kz