سەنبى, 1 قازان 2022
5066 1 پىكىر 4 شىلدە, 2017 ساعات 14:52

«تىعىرىقتان جول تاپقان» ءفيلمىنىڭ قايىرىمدىلىق كورسەتىلىمى ءوتتى

«الاتاۋ» ءداستۇرلى ونەر تەاترىنىڭ كينوزالىندا استانا كۇنىنە وراي رۇستەم ءابدراشوۆتىڭ «تىعىرىقتان جول تاپقان» ءفيلمىنىڭ قايىرىمدىلىق كورسەتىلىمى ءوتتى، - دەپ حابارلايدى اباي-اقپارات.

وتانقورعاۋشىلاردىڭ پاتريوتتىق سەزىمىن نىعايتۋ ماقساتىندا ۇيىمداستىرىلعان كورسەتىلىم قازاقستان رەسپۋبليكاسىنىڭ № 7552  ۇلتتىق ۇلان اسكەري ءبولىمىنىڭ اسكەرلەرىنە ارنالىپ قويىلدى.

وتاندىق كينو-تۋىندىلارعا باسىمدىلىق بەرەتىن «الاتاۋ» ءداستۇرلى ونەر تەاترىنىڭ كينوزالىندا بۇعان دەيىن دە مەملەكەتتىك مەرەكەلەردە قايىرىمدىلىق كورسەتىلىمدەر ۇيىمداستىرىلعان بولاتىن. قارتتار ءۇيىنىڭ قارتتارى مەن ارداگەرلەرگە، بالالار ءۇيىنىڭ تاربيەلەنۋشىلەرى مەن مۇمكىندىگى شەكتەۋلى جانە الەۋمەتتىك جاعدايى تومەن وتباسىلاردىڭ بالالارىنا تولاتىن كينوزالعا بۇل رەتتە اسكەرلەر جايعاستى. «بالالىق شاعىمنىڭ اسپانى»، «وتتى وزەن» جانە «تەمىر­تاۋ» فيلمدەرىنەن كەيىنگى «ەلباسى جولى» كينوەپوپەياسىنىڭ ءتورتىنشى ءبولىمى ەلىمىزدىڭ تۇڭعىش پرەزيدەنتىنىڭ مەملەكەتتىك قايراتكەر رەتىندە جانە پارتيا ۇيىمىنىڭ جەتەكشىلىگىنىڭ قالىپتاسۋى جولدارىن قامتيدى. مەملەكەت باسشىسىنىڭ پارتكوم حاتشىسى بولىپ سايلانىپ، ۇلكەن ساياساتقا ەندى ارالاسا باستاعان 1971-1977 جىلدارى كورىنىس تابادى.

وتانعا دەگەن سۇيىسپەنشىلىك پەن ەلدىڭ يگىلىگى، جۇرتتىڭ قامى جولىنداعى جانكەشتىلىك كورىنىس تاپقان ءفيلمدى تاماشالاعان ۇلتتىق ۇلان اسكەري ءبولىمىنىڭ اسكەرلەرى تەاتر ۇجىمىنا العىسىن ءبىلدىردى. سونىمەن قاتار، قايىرىمدىلىق كورسەتىلىمدەردىڭ الداعى ۋاقىتتا دا جالعاسىن تابۋىنا تىلەكتەس ەكەندىكتەرىن ايتتى.

Abai.kz

1 پىكىر