سۋرەتتە: پرەزيدەنت ن.نازارباەۆتىڭ ن.قويانباەۆ جۇرگىزەتىن "تۇنگى ستۋديا" باعدارلاماسىندا قوناقتا بولعان ءساتى

تانىمال تەلەجۇرگىزۋشى، ايگىلى «كۆنششيك» نۇرلان قويانباەۆ وسىدان 18 جىل بۇرىن، «جاس الاش» گازەتىنىڭ 1999 جىلعى قاراشا ايىندا شىققان «ستۋدەنت» قوسىمشاسىنا سۇحبات بەرىپ، وندا «تۇپككىلىكتى ماقساتىم – پرەزيدەنت بولۋ» دەگەن ەكەن. جانە ۇلكەن ساياساتقا 15 جىلدان كەيىن ارالاساتىنىن دا ايتىپتى. ءبىز سول گازەت قوسىمشاسىنداعى سۇحباتتان ءۇزىندىنى اينا-قاتەسىز وقىرمان نازارىنا ۇسىنىپ وتىرمىز.

ن.قويانباەۆ قازىر «قازاقستان» رترك-نىڭ باس پروديۋسەرى. ەل ىشىندە تانىمال ادامداردىڭ ءبىرى. ەگەر قويانباەۆتىڭ قازىرگى اتاق-داڭقىمەن، قوعامعا تانىمالدىلىعىن ەسكەرسەك، ول 1999 جىلى ايتقان ماقساتىنا جەتۋ جولىندا ەڭبەكتەنىپ جاتقانداي اسەر قالدىرادى.

قازاقستاندا كەز كەلگەن ادام پرەزيدەنت بولا المايدى. وتكەندە سايلاۋ تۋرالى كونستيتۋتسيالىق زاڭعا وزگەرىس ەنىپ، ول بويىنشا پرەزيدەنتتىكتەن ۇمىتكەرلەردىڭ مەملەكەتتىك قىزمەتتە نەمەسە سايلاناتىن مەملەكەتتىك لاۋازىمداردا كەمىندە 5 جىل تاجىريبەسىنىڭ بولۋى قاجەت. ال، ن.قويانباەۆتىڭ ماقساتىنا بۇل وزگەرىستەر كەدەرگى بولا ما، بولماي ما ول جاعى بىزگە بەيمالىم.

سونىمەن، ن.قويانباەۆتىڭ ون سەگىز جىل بۇرىنعى سۇحباتىنان ءۇزىندى جاريالاي وتىرىپ، نۇرلان مىرزانىڭ بۇرىنعى ايتقاندارىنا الىپ-قوسارى بولسا ونى دا جاريالاۋعا دايىن ەكەنىمىزدى ايتقىمىز كەلەدى.

Abai.kz

- تاريح فاكۋلتەتىن تامامداعان سوڭ بويىڭداعى قابىلەتىڭدى ءارى قاراي دامىتۋ ءۇشىن تەاتر ينستيتۋتىنا باراتىن شىعارسىڭ؟

- جوق، وكىنىشكە وراي، ولاي بولماي تۇر: ەندىگى كەزەكتە زاڭ-قۇقىق بىلىمىمەن «قارۋلانسام با» دەيمىن. ويتكەنى، مەنىڭ تۇپكىلىكتى ماقساتىم – پرەزيدەنت بولۋ عوي. قازىرگى ءىسىمنىڭ ءبارى سول ۇلكەن ماقسات جولىنداعى ارەكەت بولىپ تابىلادى. وسى كۇندەگى باستى ارمانىم – قازاق جاستارىن ورتاق مۇددەگە توپتاستىرۋ، ولاردىڭ ءوز وتانىنا، حالقىنا دەگەن سۇيىسپەنشىلىگىن وياتۋ. مەن وتە-موتە ۇلتجاندى جىگىتپىن. ماعان ءبىر مۇجىقتىڭ كەمپىرى «سەن ۇلتشىلسىڭ» دەگەن-ءدى. ۇلتىم ءۇشىن قاجەت بولسا، مەن مۇنداي ايىپتاۋلى اتاقتان دا باس تارتپاس ەدىم.

- ۇلكەن ساياساتقا قاشان ارالاساسىڭ؟

- 15 جىلدان كەيىن. سول كەزدە مەن 35 جاستا بولامىن.

- كەشىگىپ قالمايسىڭ با؟

- كۇتپەگەن ساۋالىم. بىراق الگى ۋاقىت ارالىعىندا «اي قاراپ، جۇلدىز ساناپ» جۇرمەسىم انىق قوي. ازىرگە بارشا تاريحي وقيعالاردى تالداپ، ساراپتاۋ ۇستىندەمىن. مۇنىڭ ءوزى كوپ پايدالى كورىنەدى. وزىندىك پىكىرىڭ، كوزقاراسىڭ قالىپتاسا باستايدى.

دايىنداعان – ءشارىپحان قايسار