قىتاي ۇكىمەتى جەرگىلىكتى مۇسىلمان ءدىنى وكىلدەرىنە قىسىم جاساپ، قاتاڭ باقىلاۋعا العاندىعى تۋرالى بىرنەشە دۇركىن جازدىق. اسىرەسە، قازاق يمامدارى مەن شاكىرتتەرىن تۇرمەگە قاماپ، تەرگەۋگە الىپ جاتقاندىعى تاعى راس.

كەشەلى-بەرى ءبىر سۇمدىق اقپار الەۋمەتتىك جەلىگە تارادى.

قىتاي بيلىگى ازان مەن تاكپىردى وزگەرتىپتى. ءتاسپىح پەن دۇعانى دا رەفورمالدى.

ازان ءماتىنىن وزگەرتكەن قىتايدىڭ شىڭجاڭ ولكەسىنىڭ حوتان ايماعىنىڭ باسشىلىعى ەكەن. الەۋمەتتىك جەلىدەن جەتكەن ءماتىننىڭ قازاق تىلىندەگى اۋدارماسى مەن مازمۇنى قىتاي بيلىگىن دارىپتەۋگە باعىتتالىپتى.

ازان:

ءبىز وتاننىڭ پەرزەنتىمىز،

ءبىز وتاننىڭ پەرزەنتىمىز.

وتانىمىز - ۇلى،

وتانىمىز - ۇلى،

وتانىمىز - ۇلى.

ناماز ۋاقىتى كەلدى،

تىلەك تىلەۋگە كەلىڭىزدەر!

وتانىمىزدىڭ بەيبىت-بەركەلى بولۋىن تىلەيىك!

وتانىمىزدىڭ گۇلدەنىپ، دامۋىن تىلەيىك!

قوسىمشا: قىتايدىڭ سولتۇستىك-باتىسىنداعى شىڭجاڭ-ۇيعىر اۆتونوميالىق اۋدانىندا "مۇسىلمان ۇيعىرلارمەن جاقىن قارىم-قاتىناستا بولعان" ونشاقتى ەتنيكالىق قازاق تۇتقىندالدى.

قىتايدىڭ شىڭجاڭ ولكەسىنىڭ جەرگىلىكتى ۇكىمەتى اياق-استىنان  بۇيرىق شىعارىپ، وتانعا ورالعىسى كەلگەن قازاقتاردىڭ قولىنداعى شەتەلگە شىعۋعا ارنالعان زاڭدى تولقۇجاتتارىن تارتىپ الىپ بەرمەي وتىر ەكەن. ال جاڭادان ءوتىنىش بەرگەندەرگە تولقۇجات جاساپ بەرمەي، ولاردىڭ قازاقستانعا كوشۋىنە اشىق كەدەرگى جاساپ وتىر.

ءتىپتى Whats App, WeChat الەۋمەتتىك جەلىلەرى ارقىلى قازاقستانداعى تۋىستارىمەن حات-حابار الماسىپ، كوشى-قون ماسەلەسىن تالقىلاعانى ءۇشىن تەرگەۋگە الىنىپ، سوتتالىپ جاتقاندارى دا بار دەيدى. ونىڭ ىشىندە كەيبىرى بۇل قاماۋدان امان قالماي، تۋىستارىنا «ءوز-وزىنە قول جۇمسادى» دەگەن سەبەپپەن مايىتتەرى تاپسىرىلىپ جاتىر.

ەڭ اشىناتىن جاعداي شىڭجاڭنىڭ جەرگىلىكتى بيلىگى ەكى ەل اراسىنداعى تەڭ دارەجەدەگى ەكونوميكالىق، ساۋدا-ساتتىق قارىم-قاتىناستارى مەن ورتاق ىنتىماقتاستىق ماقساتىنداعى كەلىسىم شارتتارعا قاراماستان، قازاقستاندى 26 تىيىم سالىنعان قاۋىپتى مەملەكەتتەر تىزىمىنە ەنگىزىپ قويعان كورىنەدى.

Abai.kz