كەزىندە "قازاق ءتىلى تولىق ۇستەمدىككە جەتپەيىنشە، لاتىن قارىپىنە كوشۋ ەرتە" دەگەن پىكىردە ەدىم. وسى تۋرالى ۇلكەن سۇقبات تا بەرگەن بولاتىنمىن. قازىر كوپ ويلانا كەلە، لاتىنعا كوشۋ قاجەتتىگىن ۇقتىم..
سەبەبى، قازاق ءتىلىنىڭ ەۆوليۋتسيالىق جولمەن ۇستەمدىككە جەتۋى تىم ۇزاققا كەتەتىن ءتۇرى بار. ال مەملەكەت پەن ونىڭ بيلىگىنىڭ ءوز جىگەرىمەن مەملەكەتتىك ءتىل ۇستەمدىگىن ورناتۋعا بارا المايتىنىنا كوزىم انىق جەتتى. ويتكەنى، حالىق سانىنىڭ كوبەيۋىن كۇتىپ وتىرعانىمىزدا  تىلدەن وزگە مەنتاليتەتتى، بولمىسىمىزدى جوعالتۋ قاۋپى ءتونىپ كەلەدى.
جاستار دا شەت ەلگە كەتۋدى كوكسەي باستادى (رەسمي تۇردە ايتىلاتىن پاتريوتيزم ناسيحاتىنا ناقتى ءومىردىڭ سايكەس كەلمەۋىنەن تۋىندايتىن پسيحولوگيالىق ديسكومفورت - وتانسۇيگىشتىك سەزىمدى جويا باستادى).
سوندىقتان، قازىردەن باستاپ، ۇلتتىق كوشتىڭ باعىتىن بۇرۋ قاجەت. سونىڭ ءبىرى - لاتىن قارپىنە كوشۋ. سوندا، ىلەسەتىندەر - ىلەسەدى، ىلەسپەيتىندەر - قالادى. ال، "ىلەسپەيتىندەردىڭ" كوبى ونسىز دا شەت ەلگە كەتسەك دەپ جوسپارلاپ جۇرگەندەر!
ءسويتىپ، كوشتى (مەملەكەتتىگىمىزدىڭ دامۋى دەپ ۇعىڭىز) ءبىر رەتكە (شىنايى قازاق مەملەكەتى باعىتىنا بۇرۋ دەپ ۇعىڭىز) كەلتىرمەسەك بولمايتىن ءتۇرى بار...

ءابدىراشيت باكىرۇلى

Facebook-تەگى پاراقشاسىنان الىندى