بەيسەنبى, 28 ناۋرىز 2024
قۇيىلسىن كوشىڭ 18577 28 پىكىر 15 تامىز, 2017 ساعات 11:21

ءسۇيىنشى، قاسىموۆتىڭ كەلىنى قازاقستانعا ورالدى!

ەستەرىڭىزدە بولسا، وسىدان ەكى اي بۇرىن «Abai.kz» اقپاراتتىق پورتالىندا «جامبىلدىق جىگىت مينيستر قاسىموۆتى ۇيلەنۋ تويىنا شاقىردى» (http://abai.kz/post/54250 ) دەگەن اتپەن تۇرسىن ءبورىباي ەسىمدى ازاماتتىڭ قازاقستان رەسپۋبليكاسىنىڭ ىشكى ىستەر ءمينيسترى، پوليتسيا گەنەرال-لەيتەنانتى ق.ن.قاسىموۆقا جازعان حاتى باسىلعان بولاتىن. سايتىمىزعا باسىلعان وسىناۋ حات باق-تا قىزۋ تالقىعا ءتۇسىپ، جۋرناليستەردىڭ قويعان سۇراعىنا مينيستر «ارينە، ءبىز بارا المايمىز. بىراق ول جىگىتتىڭ ماسەلەسىن شەشكەلى جاتىرمىز» (http://abai.kz/post/54720 ) دەپ جاۋاپ بەرگەنى دە ءبىراز اڭگىمەنىڭ كورىگىن قىزدىرعانى بەلگىلى.

قاسىموۆتىڭ كەلىنى جازيرا ءيمانالى مەن كۇيەۋ جىگىت تۇرسىن ءبورىباي

قالمۇحانبەت نۇرمۇحانبەتۇلى ۋادەسىندە تۇرىپ، سول ماسەلەنى شەشتى. مىنە، بۇگىن قالمۇحانبەت قاسىموۆتىڭ كەلىنى جازيرا ءيمانالى قازاقستانعا ورالدى. كۇيەۋ جىگىت تۇرسىن ءبورىباي ءبىر قۇشاق گۇلمەن قالىڭدىعىن جاركەنتتەن قارسى العان قۋانىشىن جەتكىزدى.

گۇل دەگەننەن شىعادى، مەن مينيستر قالمۇحانبەت اعا نۇرمۇحانبەتۇلىنا كادىمگىدەي وكپەلەپ قالدىم. سەبەبى، مەن قىتايدان كەلىپ، اناۋ جىلى قازاقستان رەسپۋبليكاسىنىڭ ازاماتتىعىن الاردا قالەكەڭ الماتى قالالىق ءىىد-ءنى باسقاراتىن. ءبىر ءوتىنىشتى سول كىسىنىڭ اتىنا جازعانىم ەسىمدە. سودان بەرى قالمۇحانبەت نۇرمۇحانبەتۇلى كوزىمە ىستىق كورىنەدى، ۇنەمى كوڭىلىمنىڭ تورىندە جۇرەدى. كىسى جاقسى كورگەن ادامىنا وكپەلەيدى عوي، تۇرسىن ءبورىباي ءبىر تەلەارناعا بەرگەن سۇحباتىندا: «قالىڭدىعىم امان-ەسەن ورالسا، ىشكى ىستەر ءمينيسترى قالمۇحانبەت اعا قاسىموۆتى، «نۇر وتان» پارتياسى رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى جۇماجان اعا جۇكەنوۆتى، «Abai.kz» اقپاراتتىق پورتالىنىڭ باسشىسى داۋرەن قۋاتتى تويما شاقىرام!» دەگەنى بار. ويتكەنى، «بەس جىلعا كەتكەن» قالىڭدىقتىڭ قايتا ورالۋىنا وسى ءۇش اعاسىنىڭ، ولار باسقارىپ وتىرعان ءۇش مەكەمەنىڭ ەڭبەگى زور. سودان بەرى داۋرەن حاسەنۇلى «كەلىنىم قاشان كەلەدى؟» دەپ، كاستوم-شالبارىن ۇتىكتەپ، تويعا دايىندالعالى ەكى ايدىڭ ءجۇزى بولدى. جۇماجان اعامىز دا «كەلىن كەلدى مە، اۋىتجان؟!» دەپ، كۇندە ءبىر مارتە سۇراپ قويادى مەنەن. ال، قالەكەڭ بىراق كەستى، «ارينە، ءبىز بارا المايمىز!» – دەدى!

جوق، بارۋى كەرەك ەدى، قالەكەڭ! ەڭ قۇرىعاندا «الدىمەن كەلىنىم كەلسىن، تويدىڭ شاقىرتۋى قولىمىزعا ءتيسىن، سوسىن كورەمىز!» دەسە، دۇرىس بولار ەدى. وندا تۇرعان نە بار، ءوزى بارا الماسا، جامبىل وبلىسىنداعى ءبىر پوليتسەيىنەن ءبىر بۋدا گۇل جىبەرىپ، «قۇتتى بولسىن!» ايتقىزا سالسا، جەتىپ جاتىر. داۋرەن قۋات ەكەۋمىز قالەكەڭنىڭ ول كىسىلىگى مەن كىشىلىگىن جالپاق الەمگە تاعى سۇيىنشىلەپ جەتكىزەر ەدىك!

قازىر ۇلتتىڭ ساناسىندا جاڭعىرۋ، ۇلتتىق سالت-ساناعا ورالۋ  پروتسەسسى ءجۇرىپ جاتقان تۇس. «بۇل – زاماناۋي الەمدەگى بىردەن-ءبىر تابىستى ۇلگى. ۇلت نەمەسە جەكە ادام ناقتى ءبىر مەجەگە بەت تۇزەپ، سوعان ماقساتتى تۇردە ۇمتىلماسا، ەرتەڭ ىسكە اسپاق تۇگىلى، ەلدى قۇردىمعا باستايتىن پوپۋليستىك يدەولوگيالار پايدا بولادى» – دەدى ەلباسىمىز ءوز ماقالاسىندا.

ءبىزدىڭ ۇلى ماقساتتىڭ ءبىرى ءارى بىرەگەيى – الەمدە شاشىراپ جۇرگەن الاش بالاسىنىڭ باسىن اتاجۇرتى قازاقستاندا قوسۋ! ونىڭ ءبىر تۇتقاسى وسى قالەكەڭنىڭ – قالمۇحانبەت اعا نۇرمۇحانبەتۇلىنىڭ قولىندا تۇر.

توعىز جاسار مەيىرگۇل وتباسىمەن...

ايتپاقشى، ءدال وسى جازيرا ءيمانالىنىڭ كەبىن كيگەن قالەكەڭنىڭ تاعى ءبىر ءىنىسى مەن كەلىنىن – الماتىدا جالعىز قالعان توعىز جاسار مەيىرگۇلدىڭ اتا-اناسى سامەت ۇلاربەك پەن تۇرسىن ورالحاندى دا باق-تى شۋلاتىپ ءجۇرىپ وتانىمەن قاۋىشتىرىپ ەدىك (http://abai.kz/post/47512 ). ۇلكەن كەلىن تۇرسىن ورالحان الماتىعا ورالا سالىپ، امىربەك اتتى شەكەسى تورسىقتاي ۇل تۋىپتى!

بۇرىنعى سابەتتىك جۇيەنىڭ، ودان بەرگى نارىقتىق قوعامنىڭ اسەرى بولۋى كەرەك، ءبىزدىڭ قازاقتىڭ جۇرەگىندەگى باۋىرمالدىق، سۇيىسپەنشىلىك ءوشىپ كەتكەن. بولماسا، مۇنداي سوراقىلىق بولماس ەدى عوي!

مىسالى، 2016 جىلدىڭ العاشقى توعىز ايىندا 199 قانداسىمىز جازاعا تارتىلىپ، ءوز ەلىنە قايتارىلىپتى. بۇل – ىشكى ىستەر ءمينيسترى ق.قاسىموۆتىڭ سەناتور مۇرات باقتيارۇلىنا ءوز قولىمەن بەرگەن جاۋابى. حاتتىڭ كوشىرمەسى مەنىڭ قولىمدا تۇر.

سوندا، ءبىر نەمەسە ەكى مارتە اكىمشىلىك قۇقىق بۇزعان قانداستارىن قالەكەڭنىڭ كوشى-قون پوليتسەيلەرى «حالىقتىڭ كوشى-قونى تۋرالى» زاڭىنىڭ 49-بابىنىڭ 5) تارماعىنداعى «قازاقستان رەسپۋبليكاسىنىڭ شەتەلدىكتەردىڭ قۇقىقتىق جاعدايى تۋرالى زاڭناماسىن بىرنەشە رەت بۇزعان;» دەگەن نورماعا قاراماستان، حاتتاما تولتىرىپ، سوتقا جونەلتە بەرگەن. قايرات اعا ءماميدىڭ تومەندەگى سۋديالارى ولاردىڭ ۇستىنەن اكىمشىلىك ءىس قوزعاپ، سوتتاپ، اپپەلياتسيالىق تارتىپكە قاراتپاستان «اتاڭا نالەت، يت جاڭگىر، قارا قازاق بالاسىن، شەتىنەن ءتىزىپ ايدادى-اۋ، ورىنبور دەگەن قالاعا!»-نىڭ كەبىن كەلتىرىپ، كەلگەن ەلىنە كەرى قايتارىپ وتىرعان عوي. بۇلارعا قاراعاندا جوعارىنىڭ اتى – جوعارى ەمەس پە، تۇرسىن ءبورىبايدىڭ زارىن ەستي سالعان بەتتە جازيرا يمانالىگە تاعايىندالعان «اكىمشىلىك قۇقىق بۇزۋشىلىق تۋرالى» كودەكستىڭ 517-بابىنىڭ 2-بولىگى بويىنشا تاعايىندالعان قازاقستان رەسپۋبليكاسى شەگىنەن شىعارىپ جىبەرۋ تۋرالى جازانى قازاقستان رەسپۋبليكاسىنىڭ جوعارى سوتى ون بەس ايلىق ەسەپتىك كورسەتكىش مولشەرىندەگى ايىپپۇلعا اۋىستىرىپ، كەلىنىمىزدىڭ قايتا ورالۋىنا مۇمكىندىك جاسادى.

مەن جوعارىدا ەلباسىمىزدىڭ رۋحاني جاڭعىرۋ تۋرالى ۇندەۋىن تەگىن ەسكە العام جوق. بۇگىن ۇلت كوشباسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسى جاريالانعالى، مىنە، تۇپ-تۋرا 3 اي، 20 كۇن بولدى. ءۇش اي، جيىرما كۇندە جاڭا تۋعان بالا اتا-اناسىن تولىق تانىپ، ارى قاراي، باسقا جاقىندارىن دا تانۋعا تالپىنا باستايدى ەكەن.

بىراق، تاۋەلسىزدىك العانىمىزعا 26 جىل بولدى، ءبىز ءوز ۇلتىمىزدى ءالى تانىپ بولعامىز جوق! بيلىك بۇتاعىنداعىلاردىڭ كوبىندە، اسىرەسە، قۇقىق قورعاۋ سالاسىندا تانيىن دەگەن نيەت وتە از بولىپ تۇر!

تەك، شەتتەگەن ورالىپ، وسىنداي جاعدايعا ۇشىراعان ءار قازاقتى ءار پوليتسەي ەسكەرتۋ جاساپ، ايىپپۇل سالىپ، ءار سۋديا مەن پروكۋرور قىزعىشتاي قورعاپ الىپ قالعان كەزدە، ءار اكىم اۋىلىنا كوشىپ كەلگەن ءار قازاقتىڭ زاڭ اياسىندا بەلگىلەنگەن جەڭىلدىكتەرى مەن سىباعالارىن كەلگەن كۇننىڭ ەرتەسىندە شاشپاي-توكپەي قولىنا ۇستاتقان كەزدە عانا بارىپ ۇلت كوشباسشىسى العا قويعان رۋحاني جاڭعىرۋدىڭ ناتيجە بەرگەنىن، ۇلى ماقساتتىڭ ورىندالعانىن  كورۋگە بولادى. اللا قالاسا، ول كۇن دە الىس ەمەس...

ءجا، قالەكەڭنىڭ سۇلۋ كەلىنى، قازاقتىڭ ءبىر ايداي ارۋى عاشىعىمەن قايتا قاۋىشىپ جاتقان قۋانىشتى ساتتە سىندى دوعارا تۇرىپ، الدىمەن قۇتتى بولسىن ايتالىق!

– كەلىنىڭىز قۇتتى بولسىن، قۇرمەتتى قالمۇحانبەت اعا!

امان-ەسەن تارازداعى تويدا كەزدەسەيىك!

اۋىت مۇقيبەك

Abai.kz

 

28 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1559
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2247
عيبىرات

قايسار رۋحتى عازيز جان

مۇحتار قۇل-مۇحاممەد 3495