قىرعىز پرەزيدەنتىنىڭ ءباسپاسوز قىزمەتى حابارلاعانداي، جەەنبەكوۆ قىرعىزستاننىڭ سوتسيال دەموكراتيالىق پارتياسى (قسدپ) اتىنان پرەزيدەنتتىك سايلاۋعا تۇسەتىندىكتەن، قىزمەتىنەن كەتتى.

جەەنبەكوۆ ۇكىمەت وتىرىسىندا سايلاۋعا قاتىساتىن بارلىق ۇمىتكەرلەر زاڭ الدىندا تەڭ بولۋى كەرەك دەگەن. ول سونىمەن بىرگە وزىنە قارسى ءتۇرلى ارانداتۋشىلىق بولۋى مۇمكىن دەگەن كۇمانمەن وتستاۆكاعا كەتكەنىن دە ايتقان.

16 شىلدەدە قسدپ قۇرىلتايىندا جەەنبەكوۆتى پرەزيدەنتتىك سايلاۋعا ۇمىتكەر رەتىندە تاڭدادى. ورتالىق سايلاۋ كوميسسياسى 21 تامىزدا رەسمي كانديدات كۋالىگىن بەردى. ول مەملەكەتتىك ءتىل ەمتيحانىنان 94,6 ۇپاي العان.

جەەنبەكوۆ پرەمەر-مينيسترلىككە بيىل 13 ساۋىردە كەلگەن.

قىرعىزستاندا پرەزيدەنت سايلاۋى 15 قازاندا وتەدى.

Abai.kz