تۋعان جەردءىڭ كوركەيىپ، گۇلدەنۋىنە ات سالىسۋ – ءار ازاماتتىڭ مىندەتى دەپ بىلەم ءوز باسىم. جالپى، تاربيەلى، سانالى كەز كەلگەن ادام تيتتەي دە بولسا، ەلىنە جاقسىلىق جاسايدى عوي. ەلىم، جەرىم دەپ ماقتانۋ ءبىر بولەك، كىندىك قانىڭ تامعان ولكەگە دەگەن سۇيىسپەنشىلىكتى ارتتىرۋ ءۇشىن ءوزىڭ باس بولىپ، وزگەگە ۇلگى بولىپ، ناقتى ءىس تىندىرۋ بولەك اڭگىمە.

قوستانايدىڭ ىرگەسىندە التىن دالا اۋىلى سوڭعى جىلدارى قازاقىلىعىمەن ەرەكشەلەنىپ كەلەدى. قازاقى دەپ ەكپىن ءتۇسىرىپ ايتۋىمىز بەكەر ەمەس. كەڭەس كەزىندەگى اتاۋىن تاۋەلسىزدىك العان جىلدارى العاشقى بولىپ وزگەرتكەندەردىڭ ءبىرى دە وسى التىندالالىقتار.

يماندىلىققا بەت بۇرىپ ەلدى مەكەندە ەڭسەلى مەشىت بوي كوتەردى. اۋىلداعى 11 جىلدىق مەكتەپ مەملەكەتتىك تىلدە. ءتىپتى، بۇل ءبىلىم ورداسىندا وزگە ۇلت وكىلدەرىنىڭ ءوزى قازاقشا ءبىلىم الادى. مەملەكەتتىك ءتىلدى ەركىن مەڭگەرگەن ولاردىڭ وبلىستىق ءتىل جارىستارىندا توپ جارىپ جۇرگەنىنە ءوز باسىمىز كۋامىز.

التىن دالاداعى الەۋمەتتىك نىساندار قيىن ۋاقىتتاردا دا جۇمىسىن توقتاتپاعان. ونىڭ ءبارىن اۋىلداعى مەتسەنات-كاسىپكەر ساعىندىق ەسمەنتاەۆتىڭ ەسىمىمەن بايلانىستىرادى جۇرتشىلىق. بۇگىندە مەكتەبى مەن كلۋبىنىڭ، كىتاپحاناسى مەن مەشىتىنىڭ قاشان بارساڭ دا ەسىگى ايقارا اشىق.

سەلولىق كلۋبتا مەملەكەتتىك مەيرامداردا، باسقا دا مەرەكەلەردە ءىس-شارالار ءجيى وتەدى. بۇقارالىق شارالارعا دەمەۋشىلىك تانىتۋدان ساعىندىق ەسمەنتاەۆ ەشقاشان باس تارتقان ەمەس.

ايتسا ايتقانداي، قولى اشىق كاسىپكەر كلۋب پەن كىتاپحاناعا ءوز قاراجاتىمەن جىلۋ جۇيەسىن ىسكە قوستى. اۋىلدا ونەرلى ورەندەر كوپ. سولارعا ارناپ ارنايى تاپسىرىسپەن مۋزىكالىق اسپاپتار الدىرىپتى. ەندى التىندالالىق بالعىندار، جاستار دومبىرا ۇيىرمەسىنە قاتىسام دەسە ولارعا قولبايلاۋ بولار قيىندىق جوق. تالاپتى بالانىڭ ءبىرى يسا ابىلايحان ەدى. ساعىندىق اعاسىنىڭ ارقاسىندا «بولاشاقتا دومبىراشى بولام» دەگەن بالانىڭ تىلەگى ورىندالدى.

الەۋمەتتىك نىساندارمەن قوسا ءبىز ءسوز ەتكەن كاسىپكەر اللانىڭ ءۇيى – مەشىتكە دە كوپ كومەك كورسەتەدى. وتىن-سۋى، وزگە دە مۇقتاجدىقتارىنا قول ۇشىن ايامايتىنىنا حالقى كۋا.

ادال ەڭبەكتى باعالايتىن ساعىندىق اعانىڭ ەگىستىك القابى بيىل دا مول ءونىم بەرەتىن ءتۇرى بار. كاسىپكەردىڭ بەدەلىن سىيلايتىن جۇمىسشىلار دا اۋىزبىرشىلىك تانىتۋدا. ويتكەنى ناۋقان ۋاقىتىندا بەل شەشپەي ەڭبەك ەتەتىن مەحانيزاتورلار جىل سايىن سىي-سىياپاتقا يە بولادى. ولاردىڭ قۇرمەتىنە كلۋب ۇجىمى ەستە قالارلىق اسەرلى كونتسەرت ۇيىمداستىرۋدى داستۇرگە اينالدىرعان.

«بەتەگە كەتسە بەل قالار، بەكتەر كەتسە ەل قالار، بەرەكەڭ كەتسە نەڭ قالار» دەگەن ەمەس پە؟! التىن دالاداعى كوپكە ۇلگى بولار ءىستىڭ ءبارى — اۋىلدىڭ اجارىن تايدىرماي، بەرەكەسىن ساقتاپ وتىرعان  ازاماتتاردىڭ جىگەرىلى ەڭبەگىنىڭ جەمىسى. بيزنەستىڭ الەۋمەتتىك جاۋاپكەرشىلىگىن ايقىن سەزىنىپ، ەلگە شىنايى كومەك كورسەتىپ كەلە جاتقان ازامات بيىلعى جىلعى مەملەكەت باسشىسىنىڭ «رۋحاني جاڭعىرۋ-بولاشاققا باعدار» جولداۋىنداعى تۋعان جەرگە، ەلگە دەگەن قامقورلىق، كومەك تۋراسىندا دا ايانىپ جاتقان جوق.

قانات كارىموۆ

Abai.kz