قازاق قوعامىن دۇرلىكتىرگەن جايلاردىڭ ءبىرى – قىرعىز رەسپۋبليكاسىنىڭ قازىرگى پرەزيدەنتى اتامباەۆتىڭ سايلاۋ الدىندا ءار جەردە سويلەگەن سوزدەرى. باق پەن الەۋمەتتىك جەلىلەردە جان-جاقتى تالقىلانىپ جاتقاندىقتان، ونىڭ ايتقان سوزدەرىن قايتالاپ جاتۋدىڭ قاجەتى بولا قويماس. كوپتىڭ كوكەيىنە كەلىپ تىرەلگەن سۇراقتاردىڭ ءبىرى – كورشى ەل پرەزيدەنتىنىڭ ءبىزدىڭ جاققا قاراپ نەگە سونشالىقتى شۇيلىگە قالعاندىعى؟ قاراپ وتىرساڭ، سونداي شۇيلىگۋدىڭ تاريحي-ساياسي نەگىزى دە بولۋى كەرەك  ەمەس پە؟

وسىدان ءبىر اي شاماسى بۇرىن قىرعىزستاندا ەلەكتر توگىن تاراتاتىن گەس پە، گرەس پە، سونداي تاعى ءبىر قۋات كوزى اشىلىپتى. سول اشىلۋدا سويلەگەن سوزىندە ول «ەندى ءبىزدىڭ ءوز قۋات كوزىمىز بار. كەرەك  بولسا، كورشى ەلدەردى ەلەكتر قۋاتىنان تارىقتىرۋعا دا شامامىز جەتەدى» دەگەن سىڭايدا پىكىر ءبىلدىردى. سونى ەستىگەننەن كەيىن، «نەگە تارىقتىرۋعا؟ كەرىسىنشە، كورشى مەملەكەتتەرگە دە كومەك بەرە الامىز؟» دەپ نەگە ايتپايدى دەگەن سۇراق تۋىنداعان بولاتىن. مەملەكەت بەلگىلى ءبىر جەتىستىككە جەتكەندە مىندەتتى تۇردە باسقا بىرەۋگە قىسىم جاساۋ ءۇشىن، كورشىگە قىر كورسەتۋ ءۇشىن جەتە مە؟

ەندى سوڭعى ايتقان پىكىرلەرىنە قازاق جۇرتىنىڭ ەداۋىر بولىگى نارازىلىق تانىتۋدا. ول زاڭدى دا. ويتكەنى اتامباەۆتىڭ اۋىزدان شىققان لەبىزىنەن قازاق حالقىنا دەگەن ءبىر جەككورىنىشتىلىك سەزىلدى. سايلاۋ الدىندا بولسىن، باسقا كەز كەلگەن جاعدايدا بولسىن، ەل باسشىسىنا ۇستامدىلىق، بايسالدىلىق كەرەك ەمەس پە. قازاقتاردىڭ اشۋىن تۋعىزعان تاعى ءبىر ءسوزى «بىزگە كەلگەندەر باسىن قالدىرىپ كەتەدى» دەپ،  كەنەسارىنىڭ تاعدىرىن نۇسقاي ايتۋى. ەكى حالىقتىڭ اراسىنا وت جاعىپ، ۇلت ارازدىعىن قوزدىرۋ ءۇشىن وسىنىڭ ءوزى جەتىپ جاتىر ەمەس پە؟

قازاقستان كومەك قولىن ۇسىنسا، «بىزگە كومەك كەرەك ەمەس» دەپ تاعى باس تارتادى. ەڭ قۇرىعاندا مىڭداعان قىرعىزداردىڭ قازاق جەرىندە ءوز نانىن تاۋىپ جەپ جۇرگەنىن ەسكەرۋ كەرەك قوي.

ءسوزدىڭ قىسقاسى، اتامباەۆتىڭ نەگە قازاققا قارسى بولا قالعانىن تۇسىنە الماي دالمىز. شۇكىرشىلىك ەتەتىنىمىز – قىرعىزستاننىڭ جاڭا پرەزيدەنتى مۇنداي جاڭساق قادامعا بارماس دەگەن ءۇمىت.

نۇرداۋلەت اقىش، م.و.اۋەزوۆ اتىنداعى

ادەبيەت جانە ونەر ينستيتۋىنىڭ باس عىلىمي

قىزمەتكەرى، جازۋشى

Abai.kz