پوليتسيانىڭ 23 قازان كۇنى تاراتقان مالىمەتىنشە،ولار رەيد كەزىندە جۇزدەگەن قالتا تەلەفونىن تەكسەرىپ، ولاردىڭ اراسىنان ۇرلانعان تەلەفونداردى تاپپاعان. بىراق «رۇقسات ەتىلمەگەن جەردە ساۋدا جاساعان» 12 ادامنىڭ، «تىركەۋسىز تۇرىپ جاتقان» 30 ادامنىڭ ۇستىنەن اكىمشىلىك ءىس قوزعالعان. بۇل ازاماتتاردىڭ بارلىعى كەشە «استانا» ساۋدا ۇيىندەگى جۇمىستارىنا قايتا كىرىسكەن.

«استانا» - اقتوبەنىڭ ءۋاليحانوۆ كوشەسى بويىنداعى كيىم-كەشەك ساتاتىن ورتالىق. سەنبى كۇنگى وقيعا كۋاگەرلەرىنىڭ ايتۋىنشا، ۇستالعان ازاماتتاردىڭ بارلىعى وسى ورتالىقتا قالتا تەلەفونى مەن وعان قاجەتتى اكسەسسۋارلاردى ساتادى. بىرقاتارىنىڭ «استانا» ساۋدا ۇيىندە تەلەفون جوندەيتىن ورىندارى بار.

سولاردىڭ ءبىرى-قالتا تەلەفونىن ساتۋشى ايباتتى وتكەن سەنبى كۇنى ارنايى جاساق اناسىنىڭ كوزىنشە اۆتوبۋسقا سالىپ اكەتكەن.

- بەسىن نامازى شىقپاعان كەز ەدى. ساعات تۇسكى بىرلەردىڭ شاماسى. «استاناداعى» مۇسىلمان بالداردىڭ ءبارىن ەكى اۆتوبۋسقا تيەپ اكەتتى. قالاي اكەتىپ بارا جاتقاندارىن كوزىممەن كوردىم. ءتىپتى بالالاردى ۇرىپ جاتقانىن دا كورىپ، «ۇرماڭدار» دەپ ايعايلادىم، -دەيدى نۇرسۇلۋ گافاروۆا.

اناسىنىڭ سوزىنە قاراعاندا، وتباسىنداعى بەس بالانىڭ ءبىرى ءبىرازدان بەرى ايبات ءدىن جولىن ۇستانادى. «ءوز كۇنىن ءوزى كورىپ» ، «بەس تەڭگەنى ون تەڭگە قىلامىن» دەپ جۇرگەن ۇلىن نۇرسۇلۋ گافاروۆا ساقالىنا بولا ەشبىر مەكەمە جۇمىسقا المايتىنىن ايتادى. سوندىقتان ايبات ساتۋشىلىققا جالدانىپ، جۇكتى كەلىنشەگى مەن باۋىرلارىن اسىراپ جۇرگەن كورىنەدى.

وتكەن سەنبى كۇنى جۇمىس ورنىنان پوليتسيا الىپ كەتكەن ەسەت «استانا» ساۋدا ۇيىندە قالتا تەلەفونىن جوندەيدى. ەسەتتىڭ اناسى جاڭاگۇل ابدىعاليەۆانىڭ سوزىنە قاراعاندا، پوليتسيا ۇلىن وسىعان دەيىن دە ءبىر رەت جۇمىس ورنىنان الدى-ارتىنا قاراتپاي الىپ كەتكەن.

قالتا تەلەفونىن ساتۋشىلاردىڭ انالارىن ازاتتىق ءتىلشىسى 21 قازان كۇنى ءتۇس الپەتىندە اقتوبەنىڭ ەسكى بولىگىندەگى ەلەك پوليتسيا ءبولىمىنىڭ جانىنان كەزدەستىرگەن بولاتىن. باسىم كوپشىلىگىنىڭ سىرت كەيپى ءدىن ۇستاناتىندىعىن اڭعارتاتىن ون شاقتى ايەل ەلەك پوليتسيا ءبولىمىنىڭ قارا قۇلىپ سالىنعان قاقپاسىنان ىشكە قاراي وتە الماي تۇردى.

ازاتتىق تىلشىسىنە سول كۇنى كەشكىلىك حابارلاسقان الفيا ەسىمدى ايەل ابدەن جاۋراعاندارىنا قاراماستان پوليتسيا ءبولىمىنىڭ قاسىندا التى ساعات بويى تۇرعاندارىن ايتتى. «ءىنىم كەشكى التى جارىمدار شاماسىندا عانا شىقتى» دەيدى الفيا.

پوليتسيانىڭ بۇل ارەكەتىن اقتوبە وبلىستىق پروكۋراتۋراسىنىڭ اپپارات جەتەكشىسى جاسۇلان داۋلەمباەۆ «تەلەفون ۇرلىعىن اشۋعا باعىتتالعان ءىس-شارا» دەپ ءتۇسىندىردى. داۋلەمباەۆتىڭ ايتۋىنشا، كۇشتىك قۇرىلىمداردىڭ قولىندا ۇرلانعان تەلەفونداردىڭ بارلىعى «استانا» ساۋدا ۇيىنە وتكىزىلەتىندىگى تۋرالى مالىمەت بولعان.

اقتوبە قالالىق اكىمدىگى الەۋمەتتىك جەلىلەر ارقىلى تاراتقان اقپاراتتا سوڭعى كەزدەردى اقتوبەدە قالتا تەلەفوندارى مەن پلانشەتتەردىڭ قولدى بولۋى جيىلەپ كەتكەندىگى تۋرالى ايتىلادى. سوندىقتان كۇشتىك قۇرىلىمدار ۇرلانعان ەلەكتروندى تەحنيكانى ساتىپ الىپ، ساۋدالايتىن جەرلەردى جاپپاي تەكسەرە باستاپتى.

ال اقتوبە وبلىستىق ءىىد ءباسپاسوز قىزمەتى تەلەفون ۇرلىعىنا قاتىستى ستاتيستيكا مەن «استانا» ساۋدا ۇيىنەن سەنبى كۇنى قانشا ادامنىڭ اكەتىلگەنى تۋرالى مالىمەت بەرۋدەن باس تارتتى. تەلەفون ساتۋشىلاردىڭ تۋىستارى قىرىقتان استام ازاماتتىڭ التى ساعات بويى ەلەك پوليتسيا بولىمىندە بولعانىن ايتادى. پوليتسيا بۇل ارالىقتا "ولارمەن پروفيلاكتيكالىق اڭگىمە جۇرگىزىلىپ، كاسىپكەر-سالىق تولەۋشى رەتىندە تىركەلۋدىڭ قاجەتتىگى تۋرالى ايتىلدى" دەپ حابارلايدى.

Abai.kz