شارانى قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ تاپسىرماسىمەن «ش. شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى» رمقك ۇيىمداستىردى.

سەمينار-ترەنينگ باق وكىلدەرىنىڭ قازاق تىلىندەگى سوزدىك قورىن جەتىلدىرىپ، ءسوز ساپتاۋىن، ءتىل مادەنيەتىن تۇزەتۋگە ارنالادى. شاراعا ءتىل ءبىلىمى جانە جۋرناليستيكا سالاسىنىڭ بىلىكتى ماماندارىمەن قاتار تەلەارنا، راديو، گازەت، سايت تىلشىلەرى مەن سمم مەنەدجەرلەر قاتىستى.

تىڭداۋشىلارعا كاسىبي ماماندار ءدارىس وقىپ، بۇقارالىق اقپارات قۇرالدارىنىڭ مەملەكەتتىك تىلدە اقپارات تاراتۋى،  سونىڭ ىشىندە ءتىل نورماسىنىڭ ساقتالۋى، سويلەۋ مادەنيەتى، تەرميندەردىڭ رەتتى قولدانىلۋ ماسەلەلەرى بويىنشا شەبەرلىك ساباقتارىن كورسەتىپ، پراكتيكالىق تاپسىرمالار بەرىلدى.

ەلىمىزگە بەلگىلى تەرمينولوگ شەرۋباي قۇرمانبايۇلى «بۇقارالىق اقپارات قۇرالدارىنداعى ءسوز قولدانىسى» تاقىرىبىندا ترەنينگ وتكىزىپ، قازاق ءتىلىنىڭ باسپا بەتىندەگى بەينەسىن كورسەتتى. ديكتورلاردىڭ ورفوەپيالىق نورمانى ساقتاماۋى، رەداكتورلاردىڭ تۇراقتى ءسوز تىركەستەرىن دۇرىس قولدانباۋى، اۋدارماشىلاردىڭ كالكا تاسىلىنە «توسەلىپ العاندىعىن» مىسالدارمەن دالەلدەپ، ءتىل مادەنيەتىن ساقتاۋدى جانە قازاق ءتىلىنىڭ ەرەجەسىن قاتاڭ ۇستانۋدى ۇيرەتتى.

سونداي-اق، ۇلتتىق اۋدارما بيۋروسىنىڭ ۇيلەستىرۋشىسى، «جاس الاش» گازەتى باس رەداكتورىنىڭ ورىنباسارى ەسەي جەڭىسۇلى «اقپارات ايدىنىنداعى قازاق ءتىلى: قانداي قاتەلىك جىبەرىپ ءجۇرمىز؟» تاقىرىبىندا ءسوز قوزعاسا، قازاق راديوسىنىڭ جەتەكشىسى سەرىك سەيىتمان ەفيرگە قوناق تاڭداۋدا تەلە-راديو جۋرناليستەرى ەسكەرۋگە ءتيىس ماڭىزدى تۇستاردى ءتۇسىندىردى. سونداي-اق، «Til-audit.kz» سايتىنىڭ رەداكتورى جاسۇلان اسقارۇلى ورتالىق جانە جەرگىلىكتى اتقارۋشى ورگانداردىڭ رەسمي ينتەرنەت-رەسۋرسىنداعى مەملەكەتتىك ءتىلدىڭ احۋالى جايىن باياندادى.

اباي-اقپارات