قازاقستان رەسپۋبليكاسى

                                            جوعارعى سوت توراعاسى ق.ءا. ماميگە

قۇرمەتتى قايرات ابدرازاقۇلى!

مەن، داناەۆا نازگۇل مەدەرقىزى، باتىس قازاقستان وبلىسى ورال قالالىق سوتى قۇرامىندا توراعالىق ەتۋشى سۋديا ق.ت.وتەشەۆتىڭ 2017 جىلى 18 قىركۇيەكتەگى №2710-17-00-1/6 19 شىعارعان ۇكىمىنە، سوتتالۋشى س.ۋ.تەمىرعاليەۆتىڭ ءىسى بويىنشا قارسىلىق بىلدىرگىم كەلەدى. سول سەبەپتى دە سىزگە حات جازىپ، باسىمداعى اۋىر جاعداي مەن ادىلەتسىز سوت ۇكىمى تۋرالى بايانداپ، ءادىل شەشىم شىعارۋعا ىقپال ەتۋىڭىزدى سۇرايمىن.

جولداسىم سالامات تەمىرعاليەۆ ءبىلىمى جوعارى، اۋىل شارۋاشىلىعى عىلىمدارىنىڭ كانديداتى، وتباسى جاعدايى – زاڭدى-نەكەلىمىز، كامەلەتكە جەتپەگەن ءۇش بالامىز بار. ولاردىڭ بىرەۋى بالا كەزىنەن مۇگەدەك (دتسپ), جۇرە المايدى.

جولداسىم باتىس قازاقستان وبلىسى بويىنشا اۋىل شارۋاشىلىعى مينيسترلىگىنىڭ اۋماقتىق ينسپەكتسياسىندا 2010 جىلدان باستاپ كەشەگى سوت ۇكىمى شىققان كۇنگە دەيىن باس مامان بولىپ جۇمىس جاساپ كەلگەن. مەملەكەتتىك قىزمەتشى، «نۇر وتان» پارتياسىنىڭ مۇشەسى.

جولداسىمدى ادىلەتسىز سوتتاپ جاتىر، 277 باپتىڭ 2 بولىگىنەن قورعالىپ، 279-1 بابىنا اۋىستىرعان، ياعني ادىلەتسىزدىك جاسالدى دەپ ەسەپتەيمىن. نەگىزى كىنالى ادام التاي قوبىلانوۆ (استىنعى پاتەردە تۇراتىن جىگىت) جولداسىمنان مۇرجانىڭ وتكىزۋىن، جاساۋعا كومەكتەسۋىن رۇقسات سۇراپ وتىنگەن ەدى. بىراق ول سوتقا كەلگەندە سوزىنەن اينىپ، باسىن الىپ قاشتى، ول بىزدەردەن كومەك سۇراماعانىن جانە ءبىزدىڭ ۇيگە كىرمەدىم دەپ ايتقان، ياعني جولداسىمدى ساتىپ كەتىپ وتىر. وعان ايعاق تا بار، ياعني كۋاگەر. مەن بۇل جاعدايمەن كەلىسە المايمىن. سەبەبى جانۇيادا ءۇش بالامىز بار. بىرەۋى دتسپ جۇرە المايدى. قىزىم دايارلىقتا مەكتەپتە وقيدى، كىشى ۇلىم ءۇش جاستا بالا-باقشاعا بارادى، ءوزىم جۇمىسسىزبىن. مۇگەدەك ۇلىممەن ۇيدە وتىرامىن. ەندى كىشى ۇلىمدى بالاباقشاعا، قىزىمدى ساباققا كىم تاسيدى؟ جولداسىمسىز مەنىڭ ءبىر وزىمە ءومىر ءسۇرۋ جاعدايىم قيىن. جولداسىمنىڭ اي سايىن تاباتىن 70-80 مىڭ اقشاسىنا كۇنەلتەتىنبىز. ۇلكەن ۇلىم ءجيى اۋىرادى. جالعىز ادامعا جۋىندىرۋ دا وڭاي ەمەس. ەندى قالاي كۇنەلتەمىن، ءبىزدىڭ جاعدايدى كىم ويلايدى؟ پاتەردىڭ جاعدايى دا مىناۋ، توگى تارتىلماعان، بىتپەگەن ءۇي، توبەسى جابىلماعان، قىسقا جارامىسىز، اتا-انامىز ءۇيدىڭ قورابىن تۇرعىزىپ بەرگەن، قىستا جالدامالى ۇيدە تۇردىق، بۇدان بۇرىن دا جالدامالى ۇيدە تۇرىپ جۇردىك. ەندى الداعى ۋاقىتتا كۇن كورىسىم قالاي بولاتىنىن بىلمەيمىن. ونى كىم ويلايدى. بالالارىما اكە كەرەك، كۇندە اكەلەرىن سۇرايدى، كۇتەدى.

وسى جاعداي بولعالى ۇيقىمىز قاشتى، ۇيدە تىنىشتىق كەتتى. جاعدايىم وتە قيىندادى. ەندى مىنە، قايرات مىرزا ءسىز ءبارىن كورىپ، ەستىپ-ءبىلىپ وتىرسىز. ەندى ءادىل شەشىمدى قابىلدايدى دەپ سەنگىمىز كەلەدى. جازىقسىز ادامدى بوساتۋىڭىزدى سۇرايمىن. قازىرگى جاعدايىم وتە ناشار، سوتتان ءادىل شەشىم كۇتكەن ەدىك، الايدا، ءبارى كەرىسىنشە بولىپ شىقتى. جولداسىم اۋىلشارۋاشىلىعى سالاسىن ۇزاق جىلدار زەرتتەپ، كانديداتتىق ديسسەرتاتسياسىن ءساتتى قورعاپ شىققان. ورال قالاسىندا جوعارى وقۋ ورنىندا ساباق بەرگەن. وسى ۋاقىتقا دەيىن بىرەۋدىڭ الا ءجىبىن اتتاماعان، ءوزىنىڭ ءۇش بالاسىمەن قوسا، قارت اكە-شەشەسىن اسىراپ-باعىپ وتىرعان جالعىزى ەدى. بار ءۇمىتىم سىزدە، ءىستى قايتا قاراپ،ورىن العان جاعدايدا كۇيەۋىمنىڭ كىناسىزدىگى دالەلدەنسە دەيمىن. ءوزىمنىڭ دە، كۇيەۋىمنىڭ دە زاڭ جاعىنان ساۋاتىمىز جوق. تەرگەۋشىنىڭ قول قوي دەگەن قۇجاتتارىنا قول قويا بەرىپپىز. سوڭىندا ونىڭ بارلىعى بىزگە قارسى جازىلعان قۇجات ەكەنىن بىلدىك.

قۇرمەتتى قايرات ابدرازاقۇلى! مەنىڭ جانە ءۇش بالامنىڭ كوز جاسىمەن جازىلعان ءوتىنىش حاتىمدى نازاردان تىس قالدىرمايسىز دەپ سەنەمىن سىزگە! مەن سوڭعى مۇمكىندىك دەپ وزىڭىزگە حات جازۋعا بەل بۋدىم، سەبەبى الداعى كۇنىمىز بۇلىڭعىر. مۇگەدەك شيەتتەي بالالارمەن قازىر دالادا قالىپ وتىرمىن. جالعىز اسىراۋشى جولداسىم تەمىر توردىڭ ار جاعىندا. ەگەر دە ول قىلمىس ىستەگەن بولسا، امالسىز جازاسىن تارتسىن دەپ كونەر ەدىك. بىراق ول وسى ۋاقىتقا دەيىن ءومىرىن عىلىمعا ارناعان ادام عوي! ونى جازىقسىز سوتتاپ وتىر! ونىڭ مىڭداعان شاكىرتى مەن ارىپەستەرى دە زور ۇمىتپەن اقتالىپ شىعاتىنىنا ۇمىتتەرىن ۇزبەي كۇتىپ وتىر. مەن دە سول سەنىممەن وسى حاتتى جازىپ وتىرمىن...

سالەمنەن نازگۇل مەدەرقىزى

Abai.kz