جۇما, 15 قاراشا 2019
الەۋمەت 3110 2 پىكىر 15 قاراشا, 2017 ساعات 08:24

زەينەتاقى قورىنداعى اقشانىڭ نەگە ءوسىمى از؟

بجزق-عا (زەينەتاقى قورى) سالىنعان ازاماتتاردىڭ جيىنتىق اقشاسىنىڭ ءوسىمى تۇتىنۋ تاۋارلارى باعاسىنىڭ وسىمىنەن تومەن بولىپ وتىر. ناقتى ايتقاندا، ۇستىمىزدەگى جىلدىڭ ءۇش توقسانىندا بجزق-عا 7 ترلن. 539 ملرد. تەڭگە جيناقتالسا، سولاردىڭ ءۇش توقسانداعى ءوسىمى 462 ملرد. تەڭگە، ياعني 6,1%  بولعان. ال وسى ۋاقىتتاعى ينفلياتسيانىڭ ءوسىمى 7,1% بولدى. دەمەك، بجزق سالىمىنىڭ ءوسىمىن ينفلياتسيا تۇگەل جەپ قويۋمەن قاتار جيناقتالعان قاراجاتقا دا اۋىز سالعان... جانار-جاعار ماي باعاسىنىڭ ارتۋىمەن، تەڭگەنىڭ السىزدەنە تۇسۋىنەن ينفلياتسيا كۇشەيىپ، جيناقتالعان قاراجات ءوسىمىنىڭ تومەندەي ءتۇسۋىن بولجاۋ قيىن ەمەس. قابىلدانعان زاڭدارىمىز جيناقتالعان قاراجاتتىڭ ينفلياتسيادان ساقتالۋىنا كەپىلدىك بەرەدى. بىراق تولەنەتىن وتەماقى ءتۇسىم مەن ينفلياتسيانىڭ ايىرماسىنان اسپايدى. سوندىقتان بجزق سالىمىنا ەشقانداي ءوسىم بولمايدى دەگەن ءسوز.

ونىڭ ءوسىمى ءتىپتى بانكتەردەگى قاتارداعى دەپوزيتتەردەن دە كەم. ولار بجزق وسىمىنە قاراعاندا ەكى ەسە ارتىق ءوسىم بەرە الادى.  وسىنىڭ ءوزى بجزق قاراجاتى كىرىستەرى تومەن جەرلەرگە قۇيىلىپ جاتقانىن كورسەتىپ تۇر. بۇگىنگى تاڭدا ونىڭ قاراجاتى مەملەكەتتىك، كۆازيمەملەكەتتىك قۇرىلىمدار جانە ەكىنشى دەڭگەيدەگى بانكتەردىڭ وبليگاتسيالارىن، سونىمەن قاتار شەت مەملەكەتتەردىڭ قۇندى قاعازدارىن ساتىپ الۋعا جۇمسالىپ وتىر. تاعى ءبىر بولىگى وتاندىق جانە شەتەلدىك بانكتەرگە دەپوزيت رەتىندە سالىنۋدا.

ماجىلىستەگى «حالىقتىق كوممۋنيستەر» فراكتسياسى اتىنان دەپۋتات ايقىن قوڭىروۆ پالاتانىڭ جالپى وتىرىسىندا وسى ماسەلەلەردى ايتىپ، ازاماتتارىمىزدىڭ زەينەتاقىعا جيناقتاپ وتىرعان قاراجاتىنىڭ ءوسىمى بولماعانىنا جانە وسى قاراجاتتىڭ كىرىسى تومەن بيزنەستەردى ەشكىمگە بىلدىرمەي ءىشىنارا قارجىلاندىرىپ وتىرۋعا جۇمسالاتىنىنا الاڭداۋشىلىق ءبىلدىرىپ، ۇلتتىق بانك توراعاسى د.اقىشەۆ پەن قارجى ءمينيسترى ب.سۇلتانوۆتىڭ تومەندەگى سۇراقتارعا جاۋاپ بەرۋىن تالاپ ەتىپ وتىر:

1. 2014-2017 جىلدار ارالىعىندا بجزق ينۆەستيتسيالىق كىرىسى ءاربىر جىل بويىنشا قانشا بولعاندىعى تۋرالى دەرەك بەرۋدى;

2. زەينەتاقىلىق جيناق قاراجاتىنىڭ كىرىسى بۇگىنگى كۇنى قالاي ەسەپتەلەتىنىن كورسەتۋدى;

3. وسى 2014-2017 جىلدار ارالىعىندا جيناقتالعان زەينەتاقى سوماسىنا ينفلياتسياعا بايلانىستى بيۋدجەتتەن تولەنەتىن وتەماقى كولەمى قانشا بولعاندىعىن ايتۋدى;

4. تازا ينۆەستيتسيالىق كىرىس دەڭگەيى بويىنشا ورتا كەزەڭگە ارنالعان ماقساتتى باعدار تۋرالى حابارلاۋدى;

بۇل ماسەلەلەر حالىق قالاۋلىلارىنىڭ بجزق قاراجاتىنىڭ امان ساقتالۋىنا ازدى-كوپ باقىلاۋ جاساۋدىڭ امالدارى ەكەنى ءسوزسىز.

س.ەلەۋ، ساراپشى

 

2 پىكىر