پرەزيدەنت اكىمشىلىگى – جوعارى مەملەكەتتىك ساياسي اپپارات. ىشكى ساياساتتان باستاپ، قۇپيا-قاۋىپسىزدىك، مادەني-رۋحاني ءھام الەۋمەتتىك-ەكونوميكالىق باعىت ت.س.س. ستراتەگيالىق ويلار تالقىلانىپ، شەشىمدەرى شىعارىلاتىن ساياسي ۇستاحانا. بەينەلەپ ايتقاندا، وسىلاي. مىسالى، ەلباسىمىزدىڭ مەملەكەتتىك، ستراتەگيالىق جوسپارلارىنىڭ نەگىزگى كارتاسى دا سوندا سىزىلىپ، دايىندالاتىنى جاسىرىن ەمەس.

ەلىمىزدە سوڭعى بىرەر جىلدىڭ ىشىندە ساياسي كليمات اجەپتاۋىر وزگەردى. بار ماقساتى بيلىكتى «ۇلىقتاۋدان» ءارى اسپايتىن ساياسي تەحنولوگتار مەن مەملەكەتتىك باق­-تىڭ ءوزى جاڭعىرا باستادى. ماسەلەنكي، «Qazagstan» ۇلتتىق ارناسىنىڭ ەفيرىنەن ساياسي وپپوزيتسيا وكىلدەرىنە ورىن بەرىلدى: ءامىرجان قوسانوۆ، مۇحتار تايجان، ەرمۇرات باپي ت.ب. بۇرىنىراقتا ولاردى ەفيرگە شاقىرماق تۇگىلى، اتىن اتاۋدان قورقاتىن-تۇعىن. ال،   «ازاتتىق» راديوسىنىڭ جۋرناليستەرى مەن «جاڭاوزەن» وقيعاسىنىڭ باسى-قاسىندا جۇرگەن ازاماتتاردى رەسمي اقپارات قۇرالدارىنان كورەتىن بولدىق. قۋانتارلىق جايت.

وسىنىڭ ءبارى مارات ءتاجيننىڭ پرەزيدەنت اكىمشىلىگى جەتەكشىسىنىڭ ورىنباسارى قىزمەتىنە تاعايىندالعالى ورىن العان وقيعالار. بەينەلەي ايتساق، جوعارى بيلىك اربيتراجىنىڭ كەي «بۇراندالارى» بوساعانداي كورىنەدى.  بايقاعانىمىز، ءتاجينىڭ ساياسي تەحنولوگيا سالاسىندا ابدەن ماشىقتانىپ، ىسىلعانى بايقالادى. قر مەملەكەتتىك حاتشىسى كەزىندە «ماڭگىلىك ەل» يدەياسىن كوتەرىپ، ەلدى ءبىر سەرپىلتىپ تاستاعان  م. ءتاجين مەملەكەتشىل ازامات ءارى   پرەزيدەنتتىڭ ەڭ سەنىمدى سەرىكتەرىنىڭ ءبىرى ەكەنىن ىسىمەن دە، سوزىمەن دە دالەلدەۋمەن كەلەدى. مارات ءتاجين وسى كۇندەرى  قازاق قوعامىنداعى بەلسەندى، پىكىرلى ازاماتتارمەن بايلانىس ورناتۋ ىسىنە دە جاۋاپتى مىندەت ارقالاپ، ساياسي بىتىمگەر ءرولىن اتقارىپ جۇرگەنگە ۇقسايدى. قىسقاسىنان قايىرساق، ءتاجين -  بۇگىنگى ساياسي جۇيدەگى تازا ادام. بۇنداي مەملەكەتشىل تۇلعانى ەل ءىشىنىڭ بىلە جۇرگەنى ابزال.

قۇءرمانالى قالماحان،

قازاقستان جۋرناليستەر وداعىنىڭ مۇشەسى, تاريح ماگيسترى

Abai.kz