ءماجىلىستىڭ پلەنارلىق وتىرىس بارىسىندا بەرىك دۇيسەنبينوۆ بيىلعى «رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنتسياسىندا ەلباسىنىڭ ايتقان ءسوزىن قولداپ، الاش ۇلت-ازاتتىق قوزعالىسى الاشتىڭ 100 جىلدىق مەرەيتويى كەلەسى جىلى ماعجان وقۋلارىمەن جالعاسىن تاپسا دەگەن ۇسىنىس جاسادى. ءبىز دەپۋتاتتىڭ ايتقاندارىن قالىڭ وقىرمانعا جەتكىزۋدى ءجون سانادىق.

قۇرمەتتى ارىستانبەك مۇحامەديۇلى!

بارشامىزعا ءمالىم، بيىل «الاش» اۆتونومياسى مەن «الاش» پارتياسىنىڭ قۇرىلعانىنا  100 جىل تولۋىنا ارنالعان مەرەيتويلىق ءىس-شارالار وتكىزىلىپ جاتىر. استانادا، الماتىدا، ەلىمىزدىڭ باسقا دا وڭىرلەرىندە حالىقارالىق، رەسپۋبليكالىق دەڭگەيدەگى عىلىمي-تاجىريبەلىك كونفەرەنتسيالار بولىپ ءوتتى. كەزىندە الاش قالاسى اتانعان سەمەيدە ءاليحان بوكەيحانعا ەڭسەلى ەسكەرتكىش ورناتىلدى، استانادا الاش كوسەمىنىڭ ەسىمى ۇلكەن داڭعىلداردىڭ بىرىنە بەرىلدى، باتىس قازاقستاندا الاش مۇراجايى اشىلدى. «اق جول» پارتياسى دا ءوز مۇمكىندىگىنشە بۇل ۇلكەن شارالارعا ءوز ۇلەسىن قوسىپ كەلە جاتىر.قورىتا ايتقاندا، الاش مۇراسىن، ونىڭ ارىستارىن ۇلىقتاۋدا قوعامدىق ۇيىمدار مەن مەن مەملەكەتتىك ورگاندار ۇيىمداسا وتىرىپ ءبىرشاما شارالار اتقارۋدا.

بىراق، الاشتىڭ ماڭىزدىلىعى بيىلعى ءجۇز جىلدىقتى اتاپ وتۋمەن عانا شەكتەلمەيدى. الاشتىڭ ءمانى مەن قۇدىرەتى-ۇلتتىڭ رۋحى مەن ەلىمىزدىڭ قانىنا سىڭگەن تەمىرقازىقتاي بيىك تە بەرىك ۇعىم.

جاقىندا عانا استانادا وتكەن «رۋحاني جاڭعىرۋ: الاش جانە ازاتتىق يدەياسىنىڭ ساباقتاستىعى» اتتى حالىقارالىق عىلىمي-تاجىريبەلىك كونفەرەنتسياسىنىڭ قاتىسۋشىلارىنا جولداعان قۇتتىقتاۋىندا ەلباسى الاش ۇلت-ازاتتىق قوزعالىسىنىڭ سيپاتىنا: «الاش قوزعالىسىنىڭ حح عاسىردىڭ باسىنداعى قازاق حالقىنىڭ ساياسي-الەۋمەتتىك قۇقىقتارىن قورعاۋ، ۇلتتىق بەت-بەينەسىن ساقتاپ قالۋ جولىنداعى كۇرەسى، ازاتتىق ءۇشىن كۇرەستىڭ جارقىن بەتى بولىپ تابىلادى» دەپ باعا بەردى. ەندەشە، الاش جولىن ەلىمىزدە دە، حالىقارالىق دەڭگەيدە دە زەردەلەي ءتۇسۋدىڭ، الاش يدەيالارىن، اسىرەسە، جاس ۇرپاققا تاراتۋدىڭ ماڭىزى زور.

ونىڭ ۇستىنە الاشتىڭ تۋىنىڭ استىنا تەك ساياساتكەرلەر عانا ەمەس،كوزى اشىق كوكىرەگى وياۋ تالانتتى، دارىندى، كوكجيەگى كەڭ ازاماتتار باس قوسقاننان كەيىن، الاشتىڭ اسەرى تەك ساياساتقا قانا ەمەس، سونىمەن قاتار بىلىمگە،اعارتۋشىلىققا،مادەنيەتكە،ادەبيەتكە زور ىقپال ەتتى.

كوزىڭدى اش،ويان قازاق،كوتەر باستى،

وتكىزبەي قاراڭعىدا بەكەر جاستى،

دەپ جىرلاعان الاش ارىسى مىرجاقىپ دۋلاتۇلىنىڭ جىگەرگە تولى جولداۋى بۇگىنگى رۋحاني جاڭعىرۋمەن جالعاسىپ جاتىر ەمەس پە!

قازاقستاننىڭ ازاتتىعى جولىنا بار ءومىرىن ارناپ، سانالى تۇردە قۇرباندىققا بارعان الاش ارىستارىنىڭ ماڭگى وشپەس ىستەرىنىڭ قۇندىلىعى،ءجۇز جىلدا ءبىر اتالىپ وتەتىن شارا بولىپ قالماۋى كەرەك!. ماسەلەن، كەلەسى - 2018 جىلى:

 «نە كورسەمدە الاش ءۇشىن كورگەنىم،

ماعان اتاق ۇلتىم ءۇشىن ولگەنىم!

مەن ولسەم دە، الاش ولمەس، كوركەيەر،

ىستەي بەرسىن، قولدارىنان كەلگەنىن –

دەپ حالقىنا دەگەن شەكسىز ماحابباتىن جىرلاعان، ءوزى «حاكىم» دەپ اتاپ، ۇستاز تۇتقان اباي سالعان داڭعىل جولدى جالعاعان, الاشتىڭ باس اقىنى اتانعان, قازاق پوەزياسىنىڭ حاس شەبەرى ماعجان جۇماباەۆتىڭ تۋعانىنا 125 جىل تولادى.

الاش ايبىندى ۇرانى،

قاسيەتتى قۇرانى،

الاشتىڭ ولار قۇربانى،

مەن جاستارعا سەنەمىن.

مەن سەنەمىن جاستارعا،

الاش اتىن اسپانعا،

شىعارار ولار ءبىر تاڭدا،

مەن جاستارعا سەنەمىن!

مەن جاستارعا سەنەمىن !

ەل تاريحىنداعى تىعىرىققا تىرەلگەن تۇستا ايتىلعان اقيىق اقىن ماعجاننىڭ جىرلارىنىڭ جاڭعىرىعى ءبىزدىڭ زامانعا جەتىپ، ەگەمەن ەلىمىزدىڭ ەركىن ويلى جاستارىن ەلشىلدىككە، پاتريوتتىققا شاقىرىپ تۇر ەمەس پە؟!

ءبىز بۇگىن، اقىننىڭ ءوز سوزىمەن ايتساق، «ارىستانداي ايباتتى»، «جولبارىستاي قايراتتى»، «قىرانداي كۇشتى» جاستارعا سەنگەن ءبىرتۋار تۇلعا ماعجان سەنىمىنىڭ اماناتىن اقتاۋىمىز ءۇشىن بيىلعى الاشتىڭ 100 جىلدىق مەرەيتويى كەلەسى جىلى ماعجان وقۋلارىمەن جالعاسىن تاپسا دەگەن ۇسىنىسىمىزدى مادەنيەت مينيسترلىگىنە جولدايمىز. ماعجان وقۋلارى الداعى جىلى بۇكىل رەسپۋبليكا اۋماعىندا وتكىزىلىپ، ال ونىڭ قورىتىندىسى ماعجان جۇماباەۆ تۋعان ولكەسى قىزىلجاردا (ورىسشا پەتروپاۆل) جاسالعانى  جون. ال بولاشاقتا ماعجان وقۋلارى، اتاۋلى داتالاردا عانا ەمەس، جىل سايىن تۇراقتى وتكىزىلىپ تۇرسا نۇر ۇستىنە نۇر بولار ەدى.

ەلباسىمىزدىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ باستى باعىتىنا ساي كەلەتىن بۇل ۇسىنىسىمىزدى مادەنيەت جانە سپورت مينيسترلىگى قولداپ، قولعا الۋىن سۇرايمىز.

Abai.kz