وتكەندە كورشى رەسەيدىڭ سوچي دەيتىن قالاسىندا سامبودان الەم چيمپيوناتى ءوتتى. وعان 90 مەملەكەتتىڭ 500-دەن اسا سپورتشىسى قاتىستى. قاراشانىڭ 9-ى مەن 13-ءى ارالىعىندا وتكەن شارادا قازاق پالۋاندارى دا باق سىنادى.

سول ءبىر ايدىك شارادا اۋەلى گۇرجى پالۋانىنان، سوسىن، اق ورىس پەن سارى ورىستىڭ ۇكىلەگەن ۇمىتكەرلەرىنەن ايلاسىن اسىرعان ءبىزدىڭ پالۋان ەسەت قۋانوۆ (قازاق پالۋانى) التىن جۇلدەنى قانجىعاسىنا بايلادى. ەسەت قۋانوۆ 62 كەلىگە دەيىنگى سالماقتا كۇرەستى.

وكىنىشكە وراي، قۋانوۆتىڭ قۋانىشىن كوپ كوردى مە، الدە ادەيى ىستەدى مە، ايتەۋىر شارانى ۇيىمداستىرۋشلار قازاقستاننىڭ مەملەكەتتىك گيمنىن شاتاستىردى.

جۇلدەگەرلەردى ماراپاتتاۋ ءراسىمى كەزىندە تاعى دا ەسكى گيمن وينادى. بۇل بەينە جازبا الەۋمەتتىك جەلىدە جاريا بولدى. قىرعىز كوممەنتاتورلارىنىڭ كەكەسىن كۇلكىسى جۇلدەگەردىڭ جەڭىسىن قىزعانعانداي كورىندى دەسەك تە، ايىپتى - ورگكوميتەت.

باسقا باسقا ەمەس، قوس بىردەي وداقتا ورتاق ەكونوميكالىق ساياسات جۇرگىزىپ كەلە جاتقان قۇدايى كورشىمىزدىڭ شيرەك عاسىردان بەرگى ستراتەگيالىق سەرىكتەسىنىڭ گيمنىن شاتاستىرىپ الۋى قانشالىقتى شىنايى؟

گەوساياسي كارتادا قۇرلىقتىق شەكارانىڭ رەكوردتتىق كولەمىنە يە بولىپ وتىرعان، ەسكى ءام جاڭا وداقتاس ورىس جاراندارىنىڭ مۇنىسى قالاي؟

بىلمەي قالدى دەپ اقتاۋعا كەلمەيدى. ءبىلدى. ءتىپتى، بەينە جازبادا پىكىر ايتىپ وتىرعان قىرعىز كوممەنتاتورلارىنىڭ ءوزى قازاق ءانۇرانىن سوزدەرىن سۋدىراتىپ وتىر.

ءيا، تاجىربيەدە بار دۇنيە بۇل. ءبىر مەملەكەتتىڭ ءانۇرانىن شاتاستىرىپ الۋدى بۇرىن دا كوردىك. اسىرەسە قازاقستاننىڭ ءانۇرانىن الەمدىك مىنبەرلەردە شاتاستىرۋ جيىلەپ كەتتى.

مىسالى، 2011 فرانتسيادا وتكەن اۋىر اتلەتيكادان الەم چەمپيوناتىندا ەسكى ءانۇراندى ەستىدىك. بۇل ءزۇلپيا شينشانلو التىن العان كەز ەدى.

سوسىن، 2012 جىلى كۋۆەيتتە قازاقستان سپورتشىسى ساداق اتۋدان ەشكىمگە دەس بەرمەي، ءبىرىنشى جۇلدەنى يەمدەندى. ال ۇيىمداستىرۋشىلار "بورات" دەيتىن بەيساۋات فيلمدەگى "قازاقستاننىڭ پسەۆدوگيمنىن" قويىپ ماسقارالاعان ەدى.

ودان كەيىن، 2013 جىلى رەسەيدەگى حوككەي ليگاسىندا قازاقستاننىڭ ەسكى ءانۇرانىن ءبىر ەمەس، ەكى مارتە قايتالاپ قويدى. اۋەلى، تۆەر قالاسىندا وتكەن جكح ليگاسىندا قاراعاندىلىق "سارىارقا" مەن "تۆەرلىك حوككەي كلۋبى" اراسىندا وتكەن ويىندا، سوسىن ماسكەۋدە وتكەن "بارىس" پەن "تسسكا" ويىنىندا ەسكى گيمن قويىلدى.

سودان سوڭ، 2014 جىلى وڭتۇستىك كورەيانىڭ چەدجۋ شاھارىندا وتكەن  بوكستان الەم چەمپيوناتىندا قازاقستاننىڭ ەسكى ءانۇرانى شىرقالدى.

2015 جىلى فينليانديادا وتكەن حوككەي ليگاسىندا "بارىس،"- "يوكەريت" ماچتىندا قازاقستاننىڭ 1992-2006 جىلعا دەيىن قولدانىلعان ەسكى ءانۇرانى ورىندالدى.

ءدال سول 2015 جىلى فيگۋريست دەنيس تەن حورۆاتيادا توپ جاردى. "Golden Spin" تۋرنيرىندە توپ جارعان تەندى ماراپاتتاۋ كەزىندە ەسكى ءانۇراندى تاعى تىڭدادىق.

2015 جىلى اۋىر اتلەتيكادان رەسەي فەدەراتسياسى پرەزيدەنتى كۋبوگى كەزىندە قازاقستاندىق زىلتەمىرشى يليا ءيليندى ماراپاتتاۋ كەزىندە دە ءدال وسىنداي جاعداي ورىن الدى. تاعى دا كورشى ورىس جاراندارى ءبىزدىڭ ءانۇراندى بىلمەي شاتاستى.

مىنە، سولاي. رەسەيلىكتەر وسىمەن ءتورتىنشى رەت ءبىزدىڭ گيمندى شاتاستىرىپ وتىر. بۇل قالاي؟ ادەت پە، ادەتتەگى كەلەڭسىزدىك پە؟ جوق الدە ساياسي تۇقىرتۋدىڭ تۇرە مە بۇل؟

P.S. وزگەگە وكپەلەپ جۇرگەنىمىزبەن، ءوزىمىزدىڭ اكىم-قارالاردىڭ ءوزى ءانۇراندى ءاجۋالاپ تۇرسا، سول وزگەدەن نە سۇرايمىز... مىناۋ، 2012 جىلى بولعان ماسقارا جاعداي. قوستاناي وبلىسىنىڭ اكىمى نۇرلان سادۋاقاسوۆ قاتىسقان جيىندا مەملەكەتتىك گيمندى ريككي ءمارتيننىڭ "Livin' la vida loca" دەيتىن ايگىلى حيت انىمەن شاتاستىرىپ الدى عوي.

نۇرزات توعجان

Abai.kz