«ءوز قاعىنان جەرىگەن قۇلان وڭبايدى»  دەيتىن دانالىق ءسوزى تەكسىزدىكتىڭ ءتۇبى نەگە دۋشار ەتەتىنىن مەڭزەگەن. وكىنىشتىسى سول، سوڭعى كەزدە قازاعىمنىڭ، ءوز ۇلتىنان، ءوز اسىلدارىنان جيىركەنۋ كوبەيىپ كەلەدى. كەيبىر اعايىندار ارابعا ەلىكتەپ، سالتىن ۇستانىپ، سولاردىڭ كيىمدەرىن كيىپ əلەك بولىپ ءجۇر. قۇدايىم-اۋ، مىڭجىلدىق تاريحى بار اتا-باباڭنىڭ سالت-ءدəستۇرى مەن əدەت-عۇرپىنان نەگە جيىركەنەسىزدەر؟! ءبىر اللاعا سەنەيىك، بىراق  قازاق بولايىقشى. ك

ەي جەكەلەگەن ادامدار جاۋىز گيتلەر "ۇلتشىل بولدى" دەپ ءپىر تۇتىپ، فاشيزم يدەياسىن ناسيحاتتاۋدا.  وداندا  گيتلەردەن 100 ەسە ۇلتشىل بولعان، ءوز قازاعىڭنىڭ ۇلت ارداقتىلارى مەن الاش زيالىلارىن (م.شوقايدى، Ə.بوكەيحانوۆ ت.ب.) نەگە كەڭىنەن ناسيحاتتاپ، ءپىر تۇتپايمىز. بيلىكتىڭ جاعىمپازدارى (زومبيلانىپ قالعان)  بىر ادامدى عانا ۇلى ساناپ، پايعامبارعا تەڭەپ تاڭنان كەشكە دەيىن ايتا بەرگەنشە،  نەگە ءبىر ۋاقىت قازاقتىڭ تاريحى ءۇشىن باسىن قاتەرگە تىگىپ، 25 جىل تۇرمەگە سوتتالعان ە.بەكماحانوۆتىڭ ۇلت الدىنداعى وراسان زور ەڭبەگىن ايتپايسىزدار.

تىڭ يگەرۋ جىلدارى  كەڭەس وداعى باسشىلارى  قازاق ەلىنىڭ جەرىن (سولتۇستىك قازاقستان وبلىسىن) رەسەيگە قوسامىز دەگەندە قازاق كسر مينيسترلەر كەڭەسىنىڭ توراعاسى (قازىرگى پرەمەر-مينيستر قىزمەتى) جۇمابەك تəشەنوۆ ەلدىڭ تۇتاستىعىن ءوزىنىڭ لاۋازىمىنان جوعارى قويىپ،  باسىن قاتەرگە تىگە كومپارتيا باسشىسى ن.حرۋشەۆكە قارسى شىعىپ، جەرىمىزدى بەرگىزبەي، ەلدىڭ تۇتاستىعىن ساقتاپ قالعان  ۇلت قايراتكەرى. وسىنداي ۇلتىمىزدىڭ اسىلدارىن ماقتان تۇتىپ، دارىپتەپ،  نەگە باسىمىزعا كوتەرىپ ماقتامايمىز؟!

شەتەلدىڭ داڭعىرلاق، مəن-ماعىناسى جوق مۋزىكاسىن تىڭداعانشا، رۋحاني قۇندىلىعى مول حالىقتىق، ءداستۇرلى əندەرىمىزدى نەگە تىڭدامايمىز؟! وزگە تىلدە شۇلدىرلەگەنشە، اناڭ سۇتىمەن بويىڭعا دارىعان ءوز انا تىلىڭدە سويلەپ، قازاق ءتىلىنىڭ مارتەبەسىن نەگە بيىك ۇستامايسىزدار!

تالعات قاتاۋوۆ، قوعام بەلسەندىسى، ورال قالاسى

Abai.kz