تۇرىكمەنباشى قالاسىندا ورتالىق ازيا مەملەكەتتەرىنىڭ مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ (مسشۇك) 95-ءىنشى وتىرىسى ءوتتى، دەپ حابارلايدى Egemen.kz

جيىنعا قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ، تاجىكستان رەسپۋبليكاسى ەنەرگەتيكا جانە سۋ رەسۋرستارى مينيسترلىگىنىڭ سۋ-ەنەرگەتيكالىق ساياسات باس باسقارماسىنىڭ باستىعى دالەر ابدۋحالوك، تۇرىكمەنستان مەملەكەتتىك سۋ شارۋاشىلىعى كوميتەتىنىڭ توراعاسى دۋردى گەندجيەۆ جانە وزبەكستان رەسپۋبليكاسىنىڭ سۋ شارۋاشىلىعى ءمينيسترى شاۆكات حامراەۆ قاتىستى.

تاراپتار سىرداريا جانە ءامۋداريا وزەندەرى باسسەيندەرىندەگى 2026 جىلعى ۆەگەتاتسيا كەزەڭىنىڭ قورىتىندىسىن شىعارىپ، 2026-2027 جىلدارداعى ۆەگەتاتسياارالىق كەزەڭگە ارنالعان سۋ الۋ ليميتتەرى مەن سۋ قويمالارىنىڭ جۇمىس رەجيمدەرىنىڭ بولجامىن بەكىتتى.

سىرداريا وزەنى باسسەينىندەگى ۆەگەتاتسيا كەزەڭى تۇراقتى رەجيمدە وتكەنى اتاپ ءوتىلدى. تۇركىستان وبلىسىنىڭ اۋماعىنداعى شاردارا سۋ قويماسىنا شامامەن 3,69 ملرد تەكشە مەتر سۋ كەلىپ ءتۇستى. بۇل بولجامدى كولەمنەن 840 ملن تەكشە مەترگە ارتىق. ۆەگەتاتسياارالىق كەزەڭدە سۋ قويماسىنا كەلەتىن سۋ كولەمى شامامەن 10 ملرد تەكشە مەتر بولادى دەپ كۇتىلىپ وتىر.

وتىرىسقا قاتىسۋشىلار سۋ رەسۋرستارىن ەسەپكە الۋ جانە مونيتورينگ جۇرگىزۋ جۇيەسىن جەتىلدىرۋ ماسەلەسىنە ەرەكشە نازار اۋداردى. تاراپتار سىرداريا وزەنى باسسەينىندە سۋ رەسۋرستارىن ەسەپكە الۋدىڭ اۆتوماتتاندىرىلعان جۇيەسىن ەنگىزۋ جوسپارىنىڭ جوباسىن ازىرلەۋ جونىندەگى جۇمىس توبىنىڭ وتىرىسىن وتكىزۋ تۋرالى كەلىسىمگە كەلدى.

سونىمەن قاتار حالىقارالىق ارالدى قۇتقارۋ قورىنىڭ قۇرىلتايشى مەملەكەتتەرى باسشىلارىنىڭ سامميتتەرىنەن تۋىندايتىن مىندەتتەردىڭ ورىندالۋ بارىسى قارالدى.

بۇدان كەيىن ءامۋداريا جانە سىرداريا وزەندەرىنىڭ سۋ رەسۋرستارىن ۇتىمدى پايدالانۋ ماسەلەلەرى بويىنشا ورتالىق ازيا مەملەكەتتەرىنىڭ جوعارى دەڭگەيدەگى كەزدەسۋى ءوتتى. ءىس-شاراعا قازاقستان، تاجىكستان، تۇرىكمەنستان جانە وزبەكستان وكىلدەرىمەن قاتار، قىرعىز رەسپۋبليكاسىنىڭ تۇرىكمەنستانداعى توتەنشە جانە وكىلەتتى ەلشىسى ازيزبەك مادماروۆ قاتىستى.

كەزدەسۋدە تاراپتار ءامۋداريا مەن سىرداريا وزەندەرىنىڭ سۋ رەسۋرستارىن ۇتىمدى ءارى تۇراقتى پايدالانۋ ماسەلەلەرى بويىنشا پىكىر الماستى. سونداي-اق ءوڭىردىڭ سۋ سالاسىنداعى نەگىزگى سىن-قاتەرلەر تالقىلاندى. ايماقتىق ىنتىماقتاستىقتى نىعايتۋعا، ترانسشەكارالىق سۋ رەسۋرستارىن بىرلەسىپ باسقارۋ تەتىكتەرىن جەتىلدىرۋگە جانە ورتالىق ازيانىڭ بارلىق مەملەكەتىنىڭ مۇددەسىن ەسكەرۋگە ەرەكشە نازار اۋدارىلدى.

كەزدەسۋ قورىتىندىسى بويىنشا تاراپتار سۋ رەسۋرستارىن تۇراقتى ءارى ۇتىمدى پايدالانۋ ماسەلەلەرى بويىنشا سىندارلى ديالوگ پەن بىرلەسكەن جۇمىستى جالعاستىرۋعا مۇددەلى ەكەنىن راستادى.

«ورتالىق ازيا ەلدەرىنىڭ سۋ شارۋاشىلىعى ۆەدومستۆولارى اراسىنداعى ءوزارا ءىس-قيمىل وتكەن ۆەگەتاتسيا كەزەڭىنىڭ تۇراقتى ءوتۋىن قامتاماسىز ەتۋگە مۇمكىندىك بەردى. بۇگىن الداعى ۋاقىتتا بىرلەسكەن ءارى ءتيىمدى جۇمىس جۇرگىزۋگە نەگىز قالاندى. ءبىز جانە ءبىزدىڭ سەرىكتەستەرىمىز بارلىق تاراپتىڭ مۇددەسىن ەسكەرە وتىرىپ، ترانسشەكارالىق سۋ رەسۋرستارىن ءادىل بولۋگە باعىت الىپ وتىرمىز»، دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

مسشۇك-ءتىڭ كەلەسى، 96-ىنشى وتىرىسىن 2027 جىلدىڭ ءبىرىنشى توقسانىندا وزبەكستان رەسپۋبليكاسىندا وتكىزۋ جوسپارلانىپ وتىر.

Abai.kz