الماتى. 14 جەلتوقسان. قازتاگ – الماتى وبلىسىنىڭ ءۇشارال-دوستىق اۆتوجولىنىڭ 105-ءشى شاقىرىمىندا دۇيسەنبى كۇنى قار قۇرساۋىندا قالعان اۋىر جۇگى بار  5 اۆتوفۋرگونمەن 7 ادامدى قۇتقارۋ  جۇمىستارىن وڭىرلىك جول قىزمەتى مەن شۇعىل ارەكەت قىزمەتى جۇرگىزىپ جاتىر، دەپ قازاقستان تجم حابارلادى.

ۆەدومستۆونىڭ مالىمەتتەرىنشە، دوستىق ستانساسىنان ۇشارالعا بەت العان اۆتوكولىك پەن ادامداردىڭ قار قۇرساۋىندا قالعانى تۋرالى اقپارات 12:50-دە كەلىپ تۇسكەن.

تجم-ءنىڭ وبلىستىق ادو-عا كەلىپ تۇسكەن وپەراتيۆتىك مالىمەتتەر بويىنشا، قۇتقارۋ وپەراتسياسىنا قازاۆتوجول  دەۋ-19-دىڭ، «كەدەنسەرۆيس» جول تەحنيكالارى، سونداي-اق الماتى وبلىسىنىڭ الاكول اۋداندىق تج جونىندەگى وپەراتيۆتىك بولىمشە تارتىلعان، دەپ حابارلايدى مينيسترلىك.

تجم حابارلاۋىنشا ادام ومىرىنە ەشقانداي قاۋىپ جوق. «اتالعان ۋچاسكەدە قازاۆتوجولدىڭ جىلىناتىن دەۋ-19 قوسىنى بار»، - دەلىنگەن حاباردا.

بۇل رەتتە، تجم مالىمەتتەرىنشە، اقتوبە وبلىسىندا اۋا رايىنىڭ ناشارلاۋى سەبەپتى (جاۋىن-شاشىن، كوكتايعاق، تۇمان) دۇيسەنبىنىڭ 19 ساعات 30 مينۋتىنان باستاپ اقتوبە - اتىراۋ  اۆتوجولىنىڭ 11-92-ءشى شاقىرىمدارىندا جانە سامارا – شىمكەنت اۆتوجولىنىڭ 753-891 شاقىرىمى ارالىعىندا (بوگەتساي كەنتى ماڭى) كولىكتىڭ بارلىق تۇرىنە جول جابىلدى.