تاراز. 16 جەلتوقسان. قازتاگ – تاراز ماڭىنداعى جامبىل اۋدانى اسا اۋلىندا امانگەلدى كەنىشىنىڭ مۇنايىن وڭدەيتىن قۋاتى جىلىنا 100 مىڭ توننا مۇناي وڭدەۋگە ەسەپتەلگەن زاۋىت ىسكە قوسىلدى. زاۋىتتى ىسكە قوسۋ ءراسىمى سارسەنبى كۇنى بولدى، دەپ جامبىل وبلىستىق اكىمشىلىگىنىڭ ءباسپاسوز قىزمەتىنەن حابارلادى.

«زاۋىت مازۋت، قىسقى ديزەل وتىنىن جانە ا-80 ماركالى بەنزين شىعارىپ، ونى جامبىل وبلىسىنا دا، قازاقستاننىڭ باسقا ايماقتارىنا دا جانە تمد-عا شىعاراتىن بولادى. مۇندا جىلىنا 100 مىڭ توننالىق شيكىزات وندىرىلەدى. 100 جاڭا جۇمىس ورنى اشىلادى»، - دەدى زاۋىتتىڭ اشىلۋ راسىمىندە قانات بوزۋمباەۆ.

ت3 ملرد تۇراتىن جوبا «امانگەلدى گوز» جشس-ءتىڭ جەكە قاراجاتىنىڭ ەسەبىنەن سالىندى.

«امانگەلدى گوز» جشس-ءتىڭ تاراز فيليالىنىڭ ديرەكتورى ورالباي يساقاەۆتىڭ ايتۋىنشا، ءوندىرىستىڭ تەحنولوگيالىق تىزبەگى – مۇناي قابىلداۋدان، ونى تۇزدار مەن پارافيننەن الدىن الا تازارتۋ، تولىق تازارتۋ، ت.ب. ساتىلاردان تۇرادى.

2011-ءشى جىلدىڭ ەكىنشى جارتىسىنا قۇرىلىستىڭ كەلەسى كەزەڭى جوسپارلانۋدا. ول كەزدە ەۋروپالىق ستاندارتتارعا ساي كەلەتىن وكتاندىعى جوعارى بەنزين شىعارۋ قولعا الىنادى. قازىر سول جوبالار مەن دايىندىق جۇمىستارى جۇرلگىزىلۋدە.

باعا ساياساتىنا كەلەتىن بولساق، سەرىكتەستىك باسشىلىعى مۇندا وندىرىلەتىن بەنزيننىڭ كوتەرمە باعاسى نارىقتاعىدان تومەن بولادى دەپ سەندىرۋدە.

زاۋىت «امانگەلدى-گاز» كەنىشىنىڭ گاز كوندەنساتىمەن نەمەسە قىزىلوردا وبلىسىنىڭ «قاراشاعان» كەنىشىنىڭ مۇنايىمەن جۇمىس ىستەيتىن بولادى.

تاۋلىگىنە 550 ت شيكىزات وڭدەپ، وتىن مەن مازۋت الۋ، ونىڭ ىشىندە 100 ت بەنزين، 60 ت كەروسين، 120 ت ديزەل وتىنى مەن 270 توننا مازۋت ءوندىرۋ جوسپارلانۋدا. اتالعان جوبا 2010-2014 جىلدارعا ارنالعان مەملەكەتتىك ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا ىسكە اسىرىلۋدا. وبلىستا بارلىعى 22 ينۆەستيتسيالىق جوبا ىسكە اسىرىلۋدا. وعان ت664,5 ملرد قاراجات قاجەت جانە 10827 جاڭا جۇمىس ورنى اشىلاتىن بولادى.