سارىارقانىڭ سايىن دالاسىندا وتانىمىزدىڭ جاڭا ەلورداسى، وركەندەۋ ۇستىندەگى قازاقستاننىڭ ورتالىعى - استانا بوي تۇزەدى. جاڭا ەلوردا سالۋ باستاماسىن العاش قازاقستان پرەزيدەنتى كوتەرگەنى بارشاعا ءمالىم. ول كەزدە، توقسانىنشى جىلدار ورتاسىندا بۇل يدەيا جۇزەگە اساتىنىنا سەنگەندەر كوپ بولعان جوق. جاڭا قالا سالۋ مەن وعان كوشۋ كوپتەگەن ونجىلدىقتارعا سوزىلادى دەپ ساناعاندار دا بولدى. بىراق ولاردىڭ ءبارى قاتەلەسكەن ەدى. استانا ەڭ قىسقا مەرزىم ىشىندە سالىنىپ، بۇكىل ەلىمىزدىڭ قارىشتى دامۋىنىڭ نىشانىنا، ميلليون تۇرعىنى بار ءىرى شاھارعا اينالدى.

قالانىڭ باس ساۋلەتكەرى شىن مانىندە مەملەكەت باسشىسى نۇرسۇلتان نازارباەۆ بولىپ سانالادى. ونىڭ يدەياسى مەن ۇسىنىستارىنىڭ ارقاسىندا استانا باتىس پەن شىعىس مادەنيەتى مەن ءداستۇرىن توعىستىرعان كوز تارتار بىرەگەي كەلبەتكە يە بولدى. قالانىڭ كوپتەگەن عيماراتتارى، ەسكەرتكىشتەرى كەزىندە پرەزيدەنت سۋرەت، سىزبا جانە نوباي تۇرىندە تۇسىرگەن ويلاردان الىندى. الەمنىڭ بەلگىلى ساۋلەتكەرلەرى نۇرسۇلتان نازارباەۆتىڭ ويلارىن ومىردە جۇزەگە اسىرا ءبىلدى. ولاردىڭ اراسىندا كيسە كۋروكاۆا، سەر نورمانن فوستەر، كەنزو تانگە جانە تاعى باسقالار بار. عيماراتتاردىڭ باسىم كوپشىلىگى استانانىڭ ەڭ كورنەكى ورىندارى مەن قالانىڭ وزىندىك رامىزدەرىنە اينالدى.

مەملەكەت باسشىسىنىڭ سىزباسى بويىنشا «بايتەرەك» - استانانىڭ جانە بۇكىل ەلدىڭ ەڭ تانىمال برەندى بوي كوتەردى. ول ەلوردانىڭ جاڭا بولىگىنىڭ ءدال ورتا تۇسىندا ورنالاسقان. ونىڭ باسىنان بۇكىل قالانىڭ اسەم كورىنىسى كوزگە شالىنادى. سونىمەن قاتار، قازاقستان پرەزيدەنتىنىڭ سۋرەتى مەن سىزباسى نەگىزىندە «حان شاتىر» بىرەگەي ساۋدا جانە ويىن-ساۋىق كەشەنى سالىندى. ارناۋلى پوليمەرلىك جابىننان جاسالعان كەشەن Forbes Style جۋرنالى نۇسقاسى بويىنشا، الەمدەگى ەڭ ۇزدىك ون ەكوعيمارات قاتارىنا ەندى. دۇكەندەر مەن پاۆيلوندارعا قوسا، مۇندا كينوتەاتر، كوپتەگەن اتتراكتسيوندار، سۇلۋلىق سالوندارى، ءتىپتى اكۆاپارك تا بار. مەملەكەت باسشىسى ويلاستىرعان تاعى ءبىر ماڭىزدى نىسان - «وتان قورعاۋشىلار» مونۋمەنتى.

الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋ ءۇشىن نۇرسۇلتان نازارباەۆ پيراميدا تۇرىندە ارنايى ساراي سالۋدى ۇسىندى. بۇل يدەيانى نورمان فوستەر تابىستى جۇزەگە اسىردى. بۇگىندە بەيبىتشىلىك جانە كەلىسىم سارايى - استانانىڭ ساۋلەتتىك ءانسامبلىنىڭ بولىنبەس بولشەگى. پرەزيدەنت مادەنيەت ورتالىعى، اقوردا رەزيدەنتسياسى جانە استانانىڭ وزگە دە ساۋلەتتى عيماراتتارى دا الدىمەن نۇرسۇلتان نازارباەۆ سىزعان جوبا تۇرىندە پايدا بولعان ەدى.

مەملەكەت باسشىسى - استانا قۇرىلىسىنا تىكەلەي قاتىسۋشى. پرەزيدەنت جۇمىستاردىڭ قارقىنىن، ەڭ باستىسى - ساپاسىن ۇنەمى قاداعالاپ وتىرادى. مۇنى بارلىق ساۋلەتكەرلەر مەن ينجەنەرلەر، استانا پرورابتارى مەن قۇرىلىسشىلارى ۇدايى ەستە ۇستاپ، مەملەكەت باسشىسىن جانە ەلوردا تۇرعىندارىن ۇياتقا قالدىرماۋعا تىرىسادى.

ەۋروپادان ازياعا اپاراتىن جولدار قيىلىسىندا قولايلى ورنالاسۋى ەلىمىزدىڭ استاناسىن ەۋرازيالىق كەڭىستىكتىڭ جاڭا ورتالىعىنا اينالدىردى. بۇگىندە استانا اۋماقتى ءوڭىردىڭ ەڭ اسەم قالاسىنا، ونىڭ ساياسي، ەكونوميكالىق، مادەني جانە رۋحاني ورتالىعىنا اينالدى.

پرەزيدەنت استانا تۋرالى

استانا - وتانىمىزدىڭ جۇرەگى، تاۋەلسىزدىگىمىزدىڭ تىرەگى.

***

جاڭا استانا - تاۋەلسىز قازاقستان ءۇشىن جارقىن كەلەشەكتىڭ نىشانى.

***
استانا - مەملەكەت ديدارى، حالىق مەرەيى. ونىڭ ءبىز جەتپەك بيىكتەردەي ورەلى، ءبىز ورناتپاق قوعامداي تارتىمدى بولىپ كوركەيىپ ءوسۋى جولىندا كۇش-جىگەردى ايامايمىز. ءبىزدىڭ جاڭا استانانى، جاڭا استانانىڭ ءبىزدى ۇياتقا قالدىرمايتىنىنا نىق سەنىمدىمىز.

***
استانانى تەك مەملەكەت باسشىلارى عانا قۇرمايدى، استانا دا ەل باسشىلىعىن قالىپتاستىرادى.

***
استانا كەلبەتى - ۇلت كەلبەتى.

***
جاڭا استانانىڭ قالاسى دا، ادامداردىڭ ساناسى دا جاڭا بولسىن.

Abai.kz