«الاش وردا» - «تاۋەلسىزدىك» ءبىر ۇعىم!
بۇگىن 13 جەلتوقسان - قازاق تاريحىنداعى ۇلى كۇن – «الاش وردا» ۇكىمەتىنىڭ قۇرىلعان كۇنى!
«الاشىمنىڭ» تۋعان كۇنى تۋعان وي...
قازاعىمنان شىققان كىلەڭ تۇنىعىم،
«الاش وردا» - «تاۋەلسىزدىك» ءبىر ۇعىم!
تۋرا وسىدان 100 جىل بۇرىن قۇرىلعان
«الاش وردا» ۇكىمەتى – ۇلى كۇن!
نەسىنە ايىپ، بۇگىن ۇلتىم جاس السا،
قيىندىقتان ءبىر قادام دا اسا السا،
ءاليحانداي، احمەت پەن مىرجاقىپ،
حالەل، مۇحامەدجان، جاھانشا...
ايتا بەرسەم، ۇلى ەسىم بار جۇزدەگەن،
ۇلى دالا توسىنەن كوپ ءىز كورەم.
نەگە كۇپتى، قايران كوڭىل سونشالىق،
بۇگىنگى ۇرپاق ۇلىلارىن ىزدەگەن؟..
استى ما ەلىم، اسۋ، اسۋ اسقاردان،
وكسىك قىسىپ، نەگە كوزدەن جاس تامعان؟
تازا قازاق مەملەكەتى باستاۋى -
نەگىزىنەن «الاشىمنان» باستالعان.
قايران ۇلتىم، بۇزا المادى بوگەتتى،
قايران ۇرپاق، كوزدىڭ جاسىن كول ەتتى...
انا كىلەڭ قانىشەرلەر قىپ-قىزىل،
ۇلت ۇلدارىن اتىپ، اسىپ، جوق ەتتى...
تۇتاستاي ۇلت - تۇعىرىنا قونا الماي،
شيرەك عاسىر - ەلىم نەگە تونالدى-اي؟
ال، بۇگىنگى «قازاقستان» تاۋەلسىز -
سول «الاشتاي» كەلە مە ءوزى بولا الماي؟
بۇگىن كىممىن، ال ول كەزدە كىم ەدىم؟
«الاشىمداي»، قايدا سول ءبىر تىرەگىم؟
شىنىمدى ايتسام، شيرەك عاسىر ۇيقى جوق،
مۇنى ويلاسام، قان جىلايدى جۇرەگىم...
جەلتوقسان جانە قازاق ارۋلارى!..
...جاۋىزدارعا قارسى تۇرىپ ەرلەگەن،
ۇلت نامىسىن قولدارىنان بەرمەگەن،
جەلتوقساندا: قىزدارىمىز بويىنان
قايتپاس قايسار وجەتتىكتى كورگەن ەم...
قانشا قاتتى سوقسا-داعى داۋىل بار،
قازاعى ءۇشىن وتقا تۇسكەن باۋىرلار.
جەلتوقساندا: قازاق قىزى اتىنا
لايىق بولعان ءبىزدىڭ قايران ارۋلار.
تۇسىنىكتى، ۇلتتى كىمدەر جىلاتتى،
تۇسىنىكتى، وندا كىمدى كىمى اتتى...
جەلتوقساندا: قازاق قىزى الاڭدا
ەرلىك ەتكەن حاس باتىرلار سياقتى.
ال، انالار «بىلدىر-ءشۇلدىر» شاتتى ما،
سولارىمەن ماسكەۋ جاققا جاقتى ما؟
قازاق قىزى - قىزىل گۇلدەي قىرمىزى،
تاس الاڭدا قان-قان بولىپ جاتتى ما؟..
ارتتا قالدى قانشا جىلدار، بەلەستەر،
سول سۋرەتتى شىعارا المان مەن ەستەن...
ءار كوكتەمدە قىردىڭ قىزىل گۇلدەرىن،
كورگەن سايىن سول ارۋلار ەلەستەر.
كىم ايتا الار، تاعدىر جولى، تار ما ەكەن؟
سول الاڭدا جاتقان ءالى قان با ەكەن؟..
سول كەزدەگى قازاق قىزى نامىسى،
ال، بۇگىنگى ارۋلار دا بار ما ەكەن؟..
جۇماش كەنەباي
Abai.kz
