سەنبى, 17 قاراشا 2018
ايتقىش ەكەن 3091 11 پىكىر 29 جەلتوقسان, 2017 ساعات 10:18

حيدجاب – بۋتافوريا بولعاندا...

ءبىزدىڭ ۇيدە تۆ قوسىلىپ تۇرا بەرەدى. «كتك»-دان كەزەكتى ءبىر – تەك انشىلەرگە قاتىستى بىردەڭە بوپ جاتىر. ادەتتەگىدەي، ۇيلەنۋ تويلارىنان ءۇزىندى كورسەتۋ، وتباسىلىق كەرەمەت ومىرلەرى جايلى ايتۋ...

«ءبىز – ونەر ادامدارىمىز عوي» دەگەن ءسوزدى ايتۋدى قاتتى جاقسى كورەدى مۇندا قاتىسۋشىلار. ءبىر جاس سازگەر مەن «جۇلدىزدى كەلىنشەك» (ويباي، ونى مەن ەمەس ايتىپ وتىرعان، جۇرگىزۋشى سولاي دەدى، سۋپەررەداكتور سولاي جازىپ بەرگەن شىعار) سويلەپ جاتىر. وسىنداي ءسوز تىركەسى، تەڭەۋ بار ما ەدى ءوزى؟ «جۇلدىزدى ءساتى» دەپ جاتۋشى ەدى: جۇلدىز دا «نۇرلانىپ» كەتتى، قۇرىسىن...

«جۇلدىزدى كەلىنشەك» – xيدجابتاعى كەلىنشەك ەكەن، باسىمدى كوتەرىپ قاراسام. تانىسقاندارىن ايتتى، عاشىق بوپ قالعاندارىن ايتتى. ءسوز بايلاسقان شاقتا قىزدىڭ ۇيىندە بىرەۋ دۇنيە سالسا كەرەك: سونىڭ جىلى وتپەي، تۇرمىسقا شىعۋعا رۇقسات كەشىرەك بەرىلگەن سياقتى. وعان ءولىپ-وشكەن عاشىقتار كونبەي، جىگىت قىزدى الىپ قاشىپتى...

حيدجابتى قالىڭدىق پەن كۇيەۋ جايلى تويداعى ءسات كورسەتىلىپ، اڭگىمە توي كويلەگى جايلى ءوربىدى. «ول كەزدە جۇكتى بولعاندىقتان، ءبىر كۇن بويى كيىپ جۇرەتىن اق كويلەگىمنىڭ ىڭعايلى ءارى جەڭىل بولعانىنا ءمان بەردىم جانە سونداي كويلەك تابىلا كەتتى»، – دە-ە-ەپ وتىر.

ايتام عوي – كيىم، انىعى، xيدجاب – بۋتافوريا دەپ! بۋ-تا-فو-ريا! سىرتقى قابىق! باعانادان بەرى ايتىلعان اڭگىمە نول بولدى. ال وسىنداي جوبا (جۇرگىزۋشىنىڭ ءسوزى) كەرەك پە؟ مىناداي اڭگىمە شە؟ «جوبانىڭ» كەيىپكەرلەرىنىڭ ەڭ ءجيى ايتاتىن سوزدەرى – «ونەر ادامى بولعان سوڭ». كوكەتايلار-اۋ، جارتى جۇمىسىڭدى تەxنيكا «جاساپ» بەرىپ وتىر، بىرەۋ سەنىڭ جەڭىل-جەلپى ءانىڭدى فونوگراممامەن ايتادى. ودان قالدى ينكۋباتوردىڭ جۇمىرتقاسى مەن بالاپانى سياقتى بىردەي «xالاۋلايدى» كۇشىكشە شۇبىرتىپ جاتقان مۇنىڭ «ءانىن» جەر بەتىندەگى بار قازاق شىرقاپ ءجۇر مە؟ «الەمگە، بار قازاققا بەلگىلى سازگەرسىڭ»، – دەپ كەلىنشەكتىڭ ايتقانى... ءشامشىنىڭ ءتىرى جۇرمەگەنىنە قۋاندىم. مىنانى ەستىگەن زاماتتا ولەتىن ەدى!

ءاي، «جوباسىماقتان» كورىنگەن، كورىنەتىن «ونەر ادامدارى»! ناعىز ونەر ادامدارى – نۇكەتاي مىشباەۆا، تولەۋبەك ارالباەۆ، سايات مەرەكەنوۆتەر! بۇلار كۇنىنە قانشاما بەت ءسوز جاتتاپ، اپتاسىنا قانشاما قويىلىمدى تەxنيكانىڭ كومەگىنسىز كورەرمەنىنە ۇسىناتىن ءتىرى ونەردە جۇرگەندەر! ال سەندەر – جەڭىل جولمەن تابىس تاۋىپ جۇرگەن مەيرامxانا «بۇلبۇلىسىڭدار». ارزان ونەر، ارزان اڭگىمە. تىڭداپ بىتكەن كەزدە-اق ۇمىتىلاتىن ارزان ءان.

پى.سى. وسىنداي «جۇلدىزدى كەلىنشەكتىڭ» ءبىرى ءوزىنىڭ اتا-ەنەسىن ماقتاپ، بىلمەگەنىن ۇيرەتىپ، كەلگەن جەرىنە ءسىڭىپ كەتۋى ءۇشىن كوپ ەڭبەك سىڭىرگەنىن ماقتانا بايانداپ وتىرىپ، كوپكە تانىمال قايىن اتاسىنىڭ اتىن بىلش ەتكىزىپ ايتا سالعانى...

ەندى بىردە ءبىر ءانشى جەڭەشەمىز ءانشى كۇيەۋىنىڭ اتى مەن تەگىن xابارلاپ، ساxناعا سونداي كوتەرىڭكى ىرعاقپەن شاقىرعانى... الدىندا عانا ءبىر باعدارلامادا يبالى كەلىن ەكەنىن ايتقانىن تىڭداپ، جاقسى كورىپ وتىرعان ەدىم. قۇداي-اۋ، كايفتى ولاي بۇزباساڭدارشى! ۇلتتى ساقتايتىن – ايەل، بىراق قازاقتىڭ ەركەگىندە دە پاراسات پەن سۇس بولسا ەكەن. نەگە جاڭاعىداي «جوباسىماققا» ناعىز ونەر ادامى تۇسپەيدى؟ ويتكەنى ولاردىڭ ۇيىندەگى جەڭەشەلەرىمدە قازاقى يبا، اعالارىمدا ۇلتتىق نامىس بار!

ايگۇل بولاتحانقىزى 

Abai.kz

11 پىكىر