الماتى وبلىسى رايىمبەك اۋدانىنداعى قىزىل شەكارا اۋىلىنىڭ  تۇرعىنى، زەينەتكەر كۇلداريا التىنبەكوۆانىڭ ۇيىندەگى ۇلكەن فوتوالبومنىڭ ءبىر ەرەكشەلىگى – Cوۆەت زامانىندا شىققان جاي البومنان قاراعاندا كولەمى ۇلكەن. ارنايى تاپسىرىسپەن جاسالعاندىعى كورىنىپ تۇر.

– ءبىز  جوعارى  سىنىپتا وقىپ جۇرگەن كەزدە ەلىمىزدە  قىز-كەلىنشەكتەر  تەمىر  تۇلپاردى تىزگىندەۋ ناۋقانى باستالعان  ەدى. اۋىل شارۋاشىلىعىنىڭ  ءتۇرلى  سالاسىندا تەحنيكانىڭ ءتىلىن مەڭگەرگەن قىزداردىڭ قاتارى كوبەيگەندە  ءبىزدىڭ   اۋىلدان گۇلبارا باشەباەۆا دا  سۋىرىلىپ شىقتى.   از ۋاقىتتىڭ ىشىندە    «ك-701» ماركالى الىپ كەمەنى يگەرىپ، كوبىمىزگە ۇلگى كورسەتتى.

مەن  دە 1969 جىلى مەكتەپ ءبىتىرىپ، «ۋم-80»، «ۋم-50» ماركالى بەلارۋس تراكتورىنىڭ  رولىنە وتىردىم. العاشىندا قيىن بولعانىمەن، كەيىن  بىر كىسىدەي مەڭگەرىپ  كەتتىم. سول جىلدان باستاپ، كسرو تاراعانشا،   تراكتوردىڭ رولىنەن تۇسكەن جوقپىن. قاربالاسقا تولى شارۋاشىلىقتىڭ  جۇمىسى جىل ون ەكى ايدا بىتپەيتىن. وعان دا ۇيرەندىك.  ەڭبەگىم ەسكەرۋسىز قالمادى، ەلدىڭ قۇرمەتىنە بولەندىم

ال مىنا فوتوالبومعا كەلسەك، 1981 جىلى ماسكەۋدە وتكەن سوكپ-نىڭ ءححۇى سەزىنە الماتى وبلىسىنان 30-عا جۋىق بەلسەندى، سونىڭ ىشىندە سول  كەزدەگى نارىنقول اۋدانىنان  مەن،  كورشى كەگەن اۋدانىنان  اتاقتى شوپان، سوتسياليستىك ەڭبەك ەرى جولسەيىت مولداسانوۆ دەلەگات بولىپ باردىق.    البومدى كورگەندەر «ءسىز قانداي باقىتتىسىز، مۇندا كىمدەر جوق. ءار سۋرەت ءبىر-ءبىر تاريح عوي» دەيدى.  كسرو-نىڭ ۇلكەن فورۋمىنا  قازاقستاننان 200-گە جۋىق دەلەگات  قاتىستى. ولاردىڭ  ىشىندە  ەلگە  تانىمال تۇلعالار از ەمەس ەدى. سونى كورگەندەر مەنەن اڭگىمە سۇرايدى. سودان بەرى قانشا جىل، تۋرا 37 جىل ءوتىپتى، - دەپ، كۇلداريا اپاي  ومىر جولىن وسىلاي  اڭگىمەلەپ بەردى.   فوتوالبوم پارتيانىڭ ءححۇى سەزىنە قاتىسقان قازاقستاندىق دەلەگاتتارعا ارنالىپتى. البومنان  ەلىمىزدىڭ  ماقتانىشى بولعان     كەڭەس وداعىنىڭ سوتسياليستتىك ەڭبەك ەرلەرىنىڭ، بەلگىلى قوعام قايراتكەرلەرىنىڭ، تانىمال ارتىستەر مەن اقىنداردىڭ  سۋرەتتەرىن كورىپ،  وتكەن جىلدارعا شەگىنىس جاساعانداي بولدىق.

البومنان دا  سەزد سارايى، اۋىل شارۋاشىلىق  كورمە زالىنداعى قازاقستاندىق ونىمدەردىڭ كورمەسى جانە باسقا سۋرەتتەر ورىن العان.   ەندىگى ءبىر سۋرەت  ماسكەۋدىڭ قىزىل الاڭىنان ءتۇسىرىلىپتى. كوپ ادامداردىڭ  ورتاسىندا  دىنمۇحامەد احمەتۇلىنىڭ  كۇلىمددەپ تۇرعان  بەينەسى  ەرەكشە كورىنەدى.

- البومداعى سۋرەتتەردىڭ ىشىندەگى قۇندىسى – وسى. ديماش اعانى الماتىداعى ۇلكەن شارالارعا بىرنەشە رەت قاتىسقانىمدا   كورگەن ەدىم. بىراق   وسى  جولى  ول كىسىنىڭ قاسىندا تۇرام دەپ ويلاعان جوقپىن. رەسپۋبليكانىڭ ءار تۇكپىرىنەن كەلگەن دەلەگاتتار ماسكەۋدىڭ قىزىل الاڭىندا بولدىق.  سوندا قازاقستان باسشىسى بىزبەن كەلىپ امانداسىپ،  ەسكەرتىش ءۇشىن سۋرەتكە تۇسكەن ەدى.  ديماش اعانىڭ  سول جاعىنداعى اق ورامالدى – مەن،   ال وڭ جاعىنداعى – قارعالى توقىما فابريكاسىنىڭ    توقىماشىسى،  سوتسياليستىك ەڭبەك ەرى كۇلداريا توقسەيىتوۆا.

سوندا مەنى ديمەكەنىڭ   جايدارى جۇزىندە كەڭپەيىلدىلىك  پەن سىيپالىق  جانە حالىقپەن  قاشاندا بىرگە ءجۇرىپ، تەڭ دارەجەدە  سويلەسۋى  تاڭداندىردى. قوناەۆپەن تاعى دا بىرگە تۇسكەن سۋرەتىم بولعان ەدى. ونى مەكتەپ وقۋشىلارىمەن بولعان كەزدەسۋدە  جوعالتىپ الدىم. قاتتى وكىندىم، امال نە، تابىلمادى.  سەزدە اتاقتى مەحانيزاتور، سوتسياليستتىك ەڭبەك ەرى كامشات دونەنباەۆامەن تانىسىپ، اڭگىمەلەكەن ەدىم.  ارىپتەسى ەكەنىمدى ايتقانىمدا،  كامشات  اپاي  ەڭبەكتەگى جەتىستىگىمە قۋاندى. قانداي كەرەمەت ادام، كىشپەيىلدىگى مەن قاراپايىمدىلىعى  قاتتى ۇنادى.

اپاي   تاعى ءبىر  قوراپشادان سارعايعان گازەت-جۋرنالداردى الدىما جايىپ سالدى. ءبارى تەمىر تۇلپاردى  تىزگىندەگەن كۇلداريا اپاي  تۋرالى   رەسپۋبليكالىق، وبلىستىق، اۋداندىق باسىلىمداردا جازىلعان  ماتەريالدار مەن فوتوسۋرەتتەر....

ال  ءبىز كورگەن  ۇلكەن فوتوالبوم سەزگە بارعان دەلەگاتتار ءۇشىن ارنايى جاسالىپ،  اركىمگە  ەسكەرتكىش رەتىندە سىيلاعان  سىي ەكەن. البومنىڭ  ىشى جاتقان تاريح. وندا ديماش اعادان باسقا جۇبان مولداعاليەۆ،  ىدىرىس نوعايباەۆ، سوتسياليستىك ەڭبەك ەرى جولسەيىت مولداسانوۆ،   قوعام قايراتكەرى زامانبەك باتقالحانوۆ، ولجاس سۇلەيمەنوۆ، ساپار بايجانوۆ سياقتى ۇلتىمىزدىڭ  ماقتانىشى بولعان  بەلگىلى  تۇلعالاردىڭ  كەزدەسە بەرمەيتىن بەينەلەرى ساقتالعان.

جەكسەن الپارتەگى

Abai.kz