قىرعىزستاندا تۋدى ەدەنگە توسەگەن مۋزەي باسشىلىعىن جاۋاپقا تارتۋدى سۇرايدى
وش قالاسىنداعى «سۋلايمان-توو» مۋزەيىنىڭ بۇرىنعى قىزمەتكەرى ءاشىرالى مارازىكوۆ قىرعىزستان تۋىنىڭ ۇستەل استىنا، ەدەنگە توسەلگەن سۋرەتىن جاريالادى. ونىڭ سوزدەرىنشە، بۇل سۋرەت مۋزەيدە جوندەۋ جۇمىستارى جۇرگىزىلىپ جاتقان كەزدە تۇسىرىلگەن.
مارازىكوۆ مەملەكەتتىك بەلگىنى وسىلايشا قور قىلۋ زاڭسىز دەپ، مۋزەي باسشىلىعىن جاۋاپقا تارتۋدى سۇرايدى.
«سۋلايمان-توو» مۋزەيىنىڭ ديرەكتورى ابدىكايىم كانگەلديەۆ بۇل وقيعا وزىنە دەيىن بولعانىن ايتىپ، جەكە باسىن جاۋاپقا تارتۋعا سەبەپ جوق دەيدى. ونىڭ ايتۋىنشا، تۋعا قاتىستى جانجال، مارازىكوۆتى جۇمىستان شىعارعاننان كەيىن ورىن العان.
قىرعىزستاننىڭ مەملەكەتتىك تۋى 1992 جىلدىڭ 3 ناۋرىزىندا قابىلداندى. مەملەكەتتىك رامىزدەردى قورلاعاندارعا زاڭعا سايكەس، 10 مىڭ سومنان (50 مىڭ تەڭگە) باستاپ ايىپپۇل سالىنىپ، ءبىر جىلعا دەيىن باس بوستاندىعىنان ايىرىلادى.
Abai.kz
