«ەستىمەگەن ەلدە كوپ» دەگەن وسى!!!  نازارباەۆ زياتكەرلىك مەكتەبىنە ءتۇسۋشى تالاپكەرلەر ءتىلسىز، ءسوزى جوق، تۇسىنىكسىز بىلدىرلاعان دىبىستار شىعاراتىن مس سايلاۋبەكتىڭ ءومىربايانىن جاقسى ءبىلىپ، شىعارماشىلىعىنان سىناق تاپسىرادى ەكەن.  بۇل تۋرالى فەيسبۋك پاراقشاسىندا كيىكباي جاقىپۇلى «ماسقارا! نازارباەۆ مەكتەبىنە ءتۇسۋ ءۇشىن وعان ارنالعان سۇراقتاردىڭ ىشىندە سايلاۋبەكتى (يا، كادىمگى تۇسىنىكسىز رەپپەر) ءبىلۋ كەرەك! ايتارىم جوق… نە بولىپ كەتتى!» -دەپ جازىپ، ۆيدەوسىن قويعان. ول قاتتى تالقىلانىپ جاتىر قازىر.

ءيا، سولاي، «قازاق ءتىلى» دەپ اتالاتىن وقۋلىقتا  «نازارباەۆ زياتكەرلىك مەكتەپتەرىنە تۇسۋشىلەرگە ارنالعان  تەست تاپسىرمالارى جيناعى» دەپ جازۋلى تۇر.

سونىمەن، ەلىمىزدەگى ەڭ تاڭداۋلى  نازارباەۆ زياتكەرلىك مەكتەبىنە  تۇسەتىندەر   «قازاق ءتىلى» وقۋ قۇرالىنىڭ  75 بەتىندەگى 7 ماتىندەگى    مس سايلاۋبەكتىڭ ەگجەي-تەگجەيلى جازىلعان ءومىرىن جاتقا ءبىلۋى كەرەك. وعان قوسا، «مس سايلاۋبەكتىڭ جۇلدىز بولۋىنا نە اسەر ەتتى؟» دەگەن 4 سۇراققا جاۋاپ بەرۋى ءتيىس …

بۇنىڭ بارىنە جاۋاپ بەرىپ، ايگىلى مەكتەپكە ءتۇسىپ كەتكەن  تالاپكەردەن  مس سايلاۋبەكتىڭ ءانىن سالىپ بەرۋدى دە سۇراۋى مۇمكىن شىعار دەپ ويلايسىڭ…  ال بۇل تۋرالى سىناق كىتاپشا اۆتورلارى  قازبەك ساعيدوللا مەن سەرىكبولسىن دۇيسەمبايلاردان سۇراۋ كەرەك…  سوندا بۇل اۆتورلاردىڭ دەڭگەيى  «ءتىلسىز» «جۇلدىزداردىڭ» اينالاسىندا ما؟ سوندا ەلىمىزدەگى ەڭ ايگىلى  مەكتەپ وقۋشىلارىنىڭ ۇلگى تۇتارى  «ءتىلسىز» رەپپەر بولۋى كەرەك پە؟ ال اتالمىش مەكتەپ باسشىلارى بۇل ماسقاراعا  نە دەيدى ەكەن؟

«قازاق ءتىلىن» «ءتىلسىز» سايلاۋبەككە تاڭعانداردىڭ ماقساتى نە؟- دەگەن سۇراققا، مۇمكىن، مەملەكەتتىك تىلدە سويلەۋى قيىن مينيستر ەرلان ساعاديەۆ تە جاۋاپ بەرىپ قالار؟

«وقۋلىقتاعى ەكى اقىننىڭ قايسىسى «ۇرى»، مينيستر مىرزا؟»– دەپ 2-ءشى سىنىپتا ءبىلىم مينيسترىنە جازعان حاتىنا 3 جىلدان بەرى ءالى جاۋاپ الا الماي كەلە جاتقان ءامينا قىزىم كوپتەن بەرى نازارباەۆ مەكتەبىنە دايىندالىپ ءجۇر ەدى… ەندى مىنادان كەيىن ول نە  تاڭداۋىن وزگەرتۋ كەرەك، نە مس سايلاۋبەكتىڭ  «بىدى-بىدىسىن» جاتتاي بەرۋى كەرەك  قوي. ويلانىپ قالدىق…

ەلىمىزدەگى ەڭ تاڭداۋلى نازارباەۆ زياتكەرلىك مەكتەبىنە جاسالىپ جاتقان سىناق تاپسىرۋ كىتاپشالارى وسىنداي بولسا، باسقالارىنىڭ سىقپىتى بەلگىلى شىعار…

«جۇرە بەرسەڭ، كورە بەرەسىڭ» دەگەن - وسى…

اللا قازاققا سابىر بەرسىن!

قازىبەك يسا

دەرەككوزى: qazaquni.kz

تۇپنۇسقاداعى تاقىرىپ: "قازاق ءتىلىن" ء"تىلسىز" سايلاۋبەككە تاڭعانداردىڭ ماقساتى نە؟