جەكسەنبى, 24 ماۋسىم 2018
اباي.tv 2629 37 پىكىر 12 ناۋرىز, 2018 ساعات 08:41

شقو مەن اياگوز... سۋ تاسقىنى

اياگوز اۋدانىندا تولاسسىز جاۋىن-شاشىن سالدارىنان توتەنشە جاعداي جاريالاندى، - دەپ حابارلايدى اباي-اقپارات قازاقپاراتقا سىلتەمە جاساپ.

«اياگوز اۋدانى اكىمىنىڭ وكىمىمەن اياگوز قالاسى بويىنشا توتەنشە جاعداي جاريالاندى»، - دەلىنگەن  اۋداندىق ىشكى ساياسات ءبولىمى بەرگەن مالىمەتتە. اكىمدىك اقپاراتى بويىنشا قالا ىشىندە  3 كوپىردى، 5 جاياۋ جۇرگىنشى وتكەلىن قارعىن سۋ باسىپ قالعان.   سۋ العان ۇيلەردەن 400 ادام قاۋىپسىز جەرگە كوشىرىلگەن. ونىڭ 30-ى بالا.

«تۇرعىندار اياگوز قالاسىنىڭ قازاق مەكتەپ-ليتسەيىنە، №6 ورتا مەكتەپ-ينتەرناتقا جانە تۋىستارىنا ورنالاستىرىلدى. توتەنشە جاعدايدىڭ سالدارىن جويۋ ماقساتىندا، جەرگىلىكتى اتقارۋشى ورگان، توتەنشە جاعداي ءبولىمى، اۋداندىق ىشكى ىستەر ءبولىمى، تەمىرجول مەكەمەلەرى، اۋداننىڭ كوممۋنالدىق مەكەمەلەر قىزمەتكەرلەرى  جانە تۇرعىندار اراسىنان ەرىكتىلەر جۇمىس ىستەۋدە. 200-دەن استام ادام، 11 ارنايى تەحنيكا، 20 اۆتوكولىك، 3 موتوپومپا جۇمىلدىرىلدى. زارداپ شەككەندەرگە اۋداندىق مەديتسينا قىزمەتكەرلەرىمەن العاشقى كومەك كورسەتىلۋدە. قازا تاپقاندار جوق»، - دەلىنگەن

شىعىس قازاقستان وبلىسىنىڭ بىرنەشە اۋدانىندا جاۋىن سوڭى تاسقىنعا اينالۋىنا بايلانىستى 1000 ادامدىق اپاتتىق قۇتقارۋ توبى قۇرىلعاندىعى دا حابارلاندى.

شقو توتەنشە جاعدايلار دەپارتامەنتىنىڭ حابارلاۋىنشا، تولاسسىز جاۋىننىڭ سالدارىن جويۋ ءۇشىن اپاتتىق قۇتقارۋ توبى قۇرىلىپ، 1000 ادام مەن 300 ارنايى تەحنيكا بولىنگەن.

«وتكەن تاۋلىكتە وبلىستا ءبىر ايدىڭ مولشەرىندەگى جاۋىن-شاشىن ءتۇستى.  داعدارىس ورتالىعىنان قۇرىلعان ارنايى توپقا 1000 ادام، 300 تەحنيكا، 56 ءجۇزۋ قۇرالى، 58 موتورلى سورعى ءبولىندى» - دەلىنگەن دەپارتامەنتتىڭ ءباسپاسوز اقپاراتىندا.

جاۋىن سالدارى اسىرەسە اياگوز، ۇلان، گلۋبوكوە اۋداندارى مەن وسكەمەن قالاسىندا كوبىرەك سەزىلۋدە. قازىرگى تاڭدا سۋ العان 22 ءۇي مەن 148 اۋلاعا كومەك كورسەتىلگەن. رەسمي دەرەك 23 ادامنىڭ قاۋىپسىز جەرگە كوشىرىلگەنىن ايتادى. ۇلان اۋدانىنىڭ ماماي باتىر اۋىلىنداعى كوپىردە ءالى دە بولسا كەزەكشى توپ جۇمىس ىستەۋدە. وسكەمەن-الماتى باعىتىنداعى جولدىڭ 130 مەتر بولىگىنە سۋ جايىلعان بولاتىن. قازىر ونىڭ 80 مەترى سۋدان ارىلدى. ءبىر كۇن ىشىندە سۋ العان اۋلالاردان 3724 تەكشە مەتر سۋ سورىپ الىنعان. سونىڭ ىشىندە وسكەمەن قالاسىندا 3484 تەكشە مەتر، اياگوز اۋدانىندا 240 تەكشە مەتر سۋ سورىلعان. وبلىس ورتالىعىنان اياگوز اۋدانىنا كومەك رەتىندە  20 ادام مەن 5 تەحنيكا شىقتى. وسى ۋاقىتقا دەيىن تۇرعىنداردان «112» نومىرىنە 1000-نان استام قوڭىراۋ تۇسكەن.

اباي-اقپارات

37 پىكىر