بۇگىن ءماجىلىستىڭ وتىرىسىندا ازات پەرۋاشەۆ ۇلتتىق بانكتى تابيعي اپاتتاردان ساقتاندىرۋدى جەتىلدىرۋدە ەش ارەكەتسىز وتىرعانى ءۇشىن سىنعا الدى. بۇل تۋرالى «اق جول» فراكتسياسىنىڭ دەپۋتاتى ءوزىنىڭ ءتيىستى ساۋالىندا مالىمدەدى، - دەپ حابارلايدى پارتيانىڭ ءباسپاسوز قىزمەتى.

«2017 جىلعى 4 قىركۇيەكتە پارلامەنتتىڭ اعىمداعى وتىرىسىنىڭ اشىلۋىندا مەملەكەت باسشىسى ساقتاندىرۋ نارىعىن دامىتۋ مىندەتىن تاپسىردى. ەلباسىنىڭ ءسوزىن دايەكسوز رەتىندە كەلتىرەمىن: «ءبىزدىڭ ەلىمىزدە ساقتاندىرۋدى دامىتۋ كەرەك، ساقتاندىرۋ قىزمەتتەرىنىڭ دەڭگەيىن جانە قولجەتىمدىلىگىن ارتتىرۋ قاجەت».

مىنە، سول كەزدەن بەرى جارتى جىلدان استام ۋاقىت ءوتتى، الايدا نە ۇكىمەت، نە ۇلتتىق بانك كۇللى الەمدە قارجى نارىعىنىڭ ماڭىزدى بولىگى بولىپ سانالاتىن ساقتاندىرۋدى ىلگەرىلەتۋ بويىنشا قاندايدا ءبىر شارالار قولدانبادى»، - دەپ ايتىلعان ساۋالدا.

شىعىس قازاقستاننان باستالىپ ىلە الاتاۋىنا دەيىنگى ايماقتاردا ورىن العان تابيعي اپات - سۋ تاسقىنىنىڭ اياسىندا بۇل تاقىرىپتىڭ وزەكتىلىگىن تىلگە تيەك ەتىپ، «اقجولدىقتارعا» وسىناۋ تۇيتكىلدى ماسەلەنى قايتادان كوتەرۋگە تۋرا كەلدى. ونداعان وتباسىلار كومەككە ءزارۋ.

«جىل سايىن ءدال وسى وقيعا ۇدايى تۇردە قايتالانىپ وتىراتىنىن اشىق ايتۋعا ءماجبۇرمىز. ءار جىلدا كوكتەم كەلگەن سايىن «كۇتپەگەن جەردەن» ءارى اياق استىنان قار ەرىپ، جاڭبىر جاۋادى. سوسىن ءار جولى، سول بۇرىنعىداي، مەملەكەتتەن اقشا تالاپ ەتەمىز»، - دەگەن پەرۋاشەۆ مۇنداي ءتاسىل – شەنەۋنىكتەردىڭ ۇقىپسىزدىعى مەن اتالمىش ماسەلەنى شەشۋدە كاسىبي ەمەس ەكەندىگىنىڭ ايقىن ۇلگىسى ەكەنىن دە اتاپ ءوتتى.

وسى ورايدا «اق جول» پارتياسى مەملەكەتكە سەنىپ قول قۋسىرىپ وتىرا بەرمەي، ءدال وسىعان ۇقساس توتەنشە جاعدايدا تۋىنداعان زالالدىڭ ورنىن وتەۋ مەن ونىڭ سالدارىن جەڭىلدەتۋ ءۇشىن ەرتەرەك جاپپاي نارىق مەحانيزمدەرىن ەنگىزۋ قاجەت دەپ سانايدى.

«جەمە-جەمگە كەلگەندە، ءبىزدىڭ ارقايسىمىز تەك وزگەلەردەن كومەك سۇراي بەرمەي، ءوزىمىز دە جەكە مەنشىك مۇلىگىمىز بەن قاۋىپسىزدىگىمىزگە دەگەن جاۋاپكەرشىلىكتىڭ بارىن تۇسىنۋگە ءتيىسپىز. ونىڭ ۇستىنە، حالىقارالىق تاجىريبەدە ساقتاندىرۋدىڭ نارىقتىق ينستيتۋتتارى ءتيىستى قۇرالداردىڭ كەڭ اۋقىمدى تاڭداۋ مۇمكىندىكتەرىن ۇسىنىپ وتىر»، - دەدى «اق جول» كوشباسشىسى.

«اقجولدىقتاردىڭ» ويىنشا، ۇلتتىق بانك قارجى جۇيەسىنىڭ رەتتەۋشىسى رەتىندە پرەزيدەنتتىڭ ساقتاندىرۋ جۇيەسىن دامىتۋ تۋرالى قىركۇيەكتەگى تاپسىرماسىنا ءتيىستى دەڭگەيدە كوڭىل بولمەي، تەك قانا بانك سەكتورىنىڭ ماسەلەلەرىنە نازار اۋدارعان.

«ۇلتتىق بانك جاي عانا سىرتتان باقىلاپ، قاراپ وتىرماي، قاراپايىم حالىقتىڭ قارجىلىق مۇمكىندىگى مەن قاۋىپ-قاتەردى ەسكەرە وتىرىپ, ساقتاندىرۋ كومپانيالارىن قۇرالدار تۇرلەرىن كەڭەيتۋگە يتەرمەلەپ، شەتەلدىك تاجىريبەنىڭ وزىق ۇلگىسىن زەردەلەۋ، ساقتاندىرۋ قىزمەتىن جەتىلدىرۋ سالاسىندا بەلسەندى ءرول اتقارۋى ءتيىس»، - دەگەن سەنىممەن پەرۋاشەۆ وسىدان 2 جىل بۇرىن ادىلەت مينيسترلىگى ازاماتتاردىڭ توتەنشە جاعدايلاردان ءوز تۇرعىن ءۇيىن مىندەتتى ساقتاندىرۋدى قاراستىراتىن زاڭ جوباسىن ازىرلەۋ تۋرالى مالىمدەمە جاساپ، الايدا، ونداي زاڭ جوباسى ءالى كۇنگە دەيىن قابىلدانباعانىن ەسكە سالدى.

«كوپتەگەن وتباسىلاردىڭ ءىس-جۇزىندەگى شىنايى قارجىلىق جاعدايىن ەسكەرە وتىرىپ، ماجبۇرلەۋ ارقىلى ەمەس، ازاماتتاردى وسى پروتسەسكە سانالى تۇردە تارتۋ جەمىستى بولار ەدى. بۇل ارادا جەرگىلىكتى تۇرعىندار مەن ساقتاندىرۋ كومپانيالارىن ىنتالاندىرۋ، ءتۇسىندىرۋ شارالارىن جۇرگىزۋ، قاراپايىم قازاقستاندىقتاردىڭ قارجىلىق جانە ساقتاندىرۋ جونىندەگى ساۋاتتىلىعىن ارتتىرۋ جۇمىستارىن ىسكە اسىرۋدا ۇلتتىق بانككە ارتىلار جۇكتىڭ وسال ەمەسى بەلگىلى. كەزەكتى ءبىر سۋ تاسقىنىنىڭ استىندا قالامىز دەگەن قاۋىپپەن ءومىر سۇرگەنشە، تۇرىپ جاتقان ءۇيىڭدى ساقتاندىرىپ قويۋ الدەقايدا تيىمدىرەك بولاتىنداي جاعداي جاساۋ قاجەت»، - دەپ تولىقتىرىپ ءوتتى پەرۋاشەۆ.

وسىعان بايلانىستى، «اق جول» قدپ فراكتسياسى ۇكىمەت پەن ۇلتتىق بانكتەن ازاماتتاردىڭ شىنايى مۇمكىندىكتەرىن ەسكەرە وتىرىپ، سۇراپىل اپاتتاردان ساقتاندىرۋ نارىعىن دامىتۋ جونىندەگى جۇمىستاردى ۇيىمداستىرۋىن سۇرايدى.

سونداي-اق، «اقجولدىقتار» ساقتاندىرۋ تەتىكتەرىن كەڭىنەن قولدانۋدى باسقا دا: كاسىپكەرلەردىڭ ماتەريالدىق جاۋاپكەرشىلىگىن ارتتىرۋ، ۆاليۋتالىق تاۋەكەلدىلىكتى، قور وپەراتسيالارىن ساقتاندىرۋ، قولدانىستاعى (نومينالدى ەمەس) مەديتسينالىق ساقتاندىرۋ سياقتى سالالاردا جەتىلدىرۋ قاجەت ەكەنىنە سەنىمدى.

«اق جول» دەموكراتيالىق پارتياسى جانە ونىڭ پارلامەنتتىك فراكتسياسى سايلاۋالدى باعدارلامانى جۇزەگە اسىرۋ جۇمىستارىن جالعاستىرۋدا.

Abai.kz