ينفورماتيكا ءپانىن 1-سىنىپتان باستاپ وقىتۋ مۇمكىندىگى زەرتتەلىپ جاتىر. بۇل تۋرالى ماجىلىستە ءبىلىم سالاسىنداعى تسيفرلاندىرۋ تاقىرىبىنداعى ۇكىمەت ساعاتىندا قر ءبىلىم جانە عىلىم ءمينيسترى ەرلان ساعاديەۆ ءمالىم ەتتى، دەپ حابارلايدى قازاقپارات.

«مينيسترلىك ءبىلىم مەن عىلىمدى تسيفرلاندىرۋ بويىنشا ءۇش باعىتتا جۇمىس جاساپ جاتىر. ءبىرىنشىسى - ول ورتا ءبىلىم جۇيەسىندە اقپاراتتاندىرۋدى دامىتۋعا نەگىزدەلگەن. ەكىنشىسى - ءبىلىم بەرۋ مەن عىلىمدى باسقارۋ پروتسەستەرىن اۆتوماتتاندىرۋ، ال ءۇشىنشىسى - ءىت مامانداردى دايارلاۋ. ءبىرىنشى باعىت بويىنشا ەىدۇ ەلدەرىندە كوبىنەسە باعدارلامالار 1-سىنىپتان باستالادى. بىزدە ينفورماتيكا ءپانى مەكتەپتە 5-سىنىپتان باستالىپ وقىتىلعان، ەندى بيىل 3-سىنىپتان باستالادى. سونىمەن قاتار، ينفورماتيكانى وقىتۋدا 1-سىنىپتان باستاپ ەنگىزۋ مۇمكىندىگى بويىنشا ساراپشىلارمەن جۇمىس جۇرگىزىپ جاتىرمىز. قازىر جوبا جاسالىپ، قوعامدا تالقىلاناتىن بولادى»، - دەدى مينيستر.

ونىڭ سوزىنە قاراعاندا، 3 مىڭنان استام مەكتەپ پەن وقۋشىلار سارايىندا روبوت تەحنيكاسى بويىنشا ەلەكتيۆتىك كۋرس ەنگىزىلدى.

«بىراق بىزگە روبوت تەحنيكاسىن بارلىق مەكتەپتەرگە دەيىن جەتكىزۋ كەرەك. بۇگىنگى مىندەت - ول اتالعان روبوت تەحنيكاسى كابينەتتەرىن قۇرالدارمەن جابدىقتاۋ. وتكەن جىلدار ىشىندە 5 400 پەداگوگ، ونىڭ ىشىندە 730-ى روبوت تەحنيكاسى بويىنشا بىلىكتىلىك كۋرستارىنان ءوتتى. 2018 جىلى تاعى 2 500 مۇعالىم وقىتامىز، سونىڭ ىشىندە اتالعان باعىت تا قامتىلادى»، - دەدى ە. ساعاديەۆ.

Abai.kz