– جەڭىس سەيدوللاۇلى، «قازاقكونتسەرت» مەملەكەتتىك ۇيىمىنىڭ ديرەكتورى بولىپ تاعايىندالعان جاڭا قىزمەتىڭىزبەن قۇتتىقتايمىز. استانا قالاسىنىڭ 20-جىلدىعى الەمدىك دەڭگەيدە اتاپ وتىلەدى دەپ كۇتىلۋدە.  مادەنيەت جانە سپورت مينيسترلىگىنىڭ قولداۋىمەن ەلىمىزدىڭ تۇكپىر-تۇكپىرىندە ءتۇرلى ءىس-شارالار اتقارىلىپ جاتىر.  ەلوردا تويى – ەلدىڭ تويى.  سىز باسقارىپ وتىرعان ۇجىم استانا تويىنا قانداي ۇلەس قوسپاقشى؟ اڭگىمەمىزدى وسى ساۋالدان باستاساق دەيمىن.   

– ەلوردا – ەلباسىمىزدىڭ قولتاڭباسى. تاۋەلسىزدىكتىڭ  تۋىندىسى. استانا – از ۋاقىت ىشىندە ادەمى كەلبەتىمەن الەمگە تانىلعان اسەم قالا. جيىرما ءبىرىنشى عاسىردا جيىرماسىنشى جىلىنا ۇلكەن جەتىستىكتەرمەن جەتكەن ەڭسەسى بيىك، رۋحى مىقتى  جاس قالا. باس قالا 20 جىلدىق تاريحىندا مادەنيەت پەن ونەردىڭ وشاعىنا اينالدى. الەمدىك دەڭگەيدە اتاپ وتىلمەك توي – استاناعا كورسەتىلگەن ۇلكەن قۇرمەتتىڭ ءبىرى. مادەنيەت جانە سپورت مينيسترلىگىنىڭ قولداۋىمەن ءىى دۇنيەجۇزىلىك «استانا» تەاتر فەستيۆالى – ەكىنشى رەت وتەتىن  الەمدىك تەاتر ۇجىمدارىنىڭ باس قوسۋى. ول وسى جىلدىڭ 17-30 ماۋسىم كۇندەرى ارالىعىندا بولادى. تەاتر ونەرىندەگى كاسىبي شىعارماشىلىق ىنتىماقتاستىقتى، حالىقارالىق قارىم-قاتىناستى قولداۋ ماقساتىندا  وتكىزىلەتىن فەستيۆالدە «Piccolo Teatro di Milano» (يتاليا), «Schaubuhne» (گەرمانيا), «Meno Fortas» (ليتۆا), «TRWarsawa» (پولشا), ش.رۋستاۆەلي اتىنداعى گرۋزيا مەملەكەتتىك اكادەميالىق  (گرۋزيا), قىتاي حالىق كوركەم تەاترى (قىتاي), تاداسي سۋزۋكي-سان  (جاپونيا) تەاترلارىنىڭ  قازاق ساحناسىنىڭ تورىنەن تابىلۋى،  ونەر تاريحىندا ايتۋلى وقيعالاردىڭ ءبىرى بولىپ قالماق.  بۇل جانە وزگە ەلدىڭ وزىق مادەنيەتىمەن تانىسۋعا جانە ۇلتتىق ونەردى الەمدىك كەڭىستىككە تانىتۋعا زور  مۇمكىندىك بەرەدى دەپ ويلايمىن. 

 –  استانا تويىنا تارتۋ رەتىندە ساحنالاناتىن الەمگە ايگىلى «Notre Dame de Paris»  ميۋزيكلىن «استانا ميۋزيكل» تەاترى قازاق تىلىندە تۇڭعىش رەت كورەرمەنگە ۇسىنادى ەكەن. العاشقى قويىلىمىنان-اق ۇلكەن تابىسقا قول جەتكىزگەن ميۋزيكل گيننەستىڭ رەكوردتار كىتابىنا ەنگەن. الەمدىك دەڭگەيدە تانىمالدىققا يە تۋىندى كورەرمەندى بەيجاي قالدىرماسى انىق. «قازاقكونتسەرت» مەملەكەتتىك كونتسەرتتىك ۇيىمىنىڭ ۇيىمداستىرۋمەن وتەتىن ءىى دۇنيەجۇزىلىك «استانا» ميۋزيكل تەاتر فەستيۆالى جانە «Notre Dame de Paris»  پرەمەراسى استانانىڭ تۋعان كۇنىنە ادەمى تارتۋ دەپ بىلەمىز.

  – ءسوزىڭىزدىڭ جانى بار، ۆيكتور گيۋگونىڭ «سوبور پاريجسكوي بوگوماتەري» رومانىنىڭ جەلىسىندە فرانتسيادا ساحنالانعان اتالعان سپەكتاكل الەمدەگى ميۋزكل جانرىنىڭ ەرەكەشە ءبىر ۇلگىسى. جەرار پرەسگۋرۆيكتىڭ داڭقىن ورلەتكەن «رومەو مەن دجۋلەتتا» ميۋزيكلىن ءساتتى ۇسىنعان «استانا ميۋزيكل» تەاترى، كومپوزيتورى ر.كوچچانتە، ليبرەتتو اۆتورى ل.پلاموندونمەن بىرلەسىپ، الەمگە ايگىلى «Notre Dame de Paris»  ميۋزيكلىن ساحنالايدى. استانا تويىنا تارتۋ رەتىندە تاماشالاناتىن ميۋزيكل – فرانتسۋزدىق شانسون مەن سىعان موتيۆىنە قۇرىلعان. ءار كورىنىستەگى  «Belle»، «Danse mon esmeralda»، «Le Temps des Cathedrales» سەكىلدى ەلۋگە جۋىق ءاننىڭ  اۋەنى تىڭدارماندى بىردەن باۋراپ الادى. استانا تەاتر ۇجىمى ءۇشىن ۇلكەن تاجىريبە ءارى زور جاۋاپكەرشىلىك جۇكتەيتىن «نوتر دام دە پاري» ميۋزيكلىنىڭ پرەمەراسى قالامىزدىڭ تۇرعىندارى مەن قوناقتارىنا توسىنسىي بولارى ءسوزسىز جانە  فرانتسيا ەلى مەن قازاقستان حالقىنىڭ اراسىنداعى مادەني قاتىناستاردى نىعايتۋعا ىقپال ەتەرى انىق. 

 –  «نوتر دام دە پاري» ميۋزيكلىنىڭ پرەمەراسى «استانا ميۋزيكل» تەاترى ساحىنالايدى دەپ اتاپ ءوتتىڭىز. ميۋزيكل – قازاق مادەنيەتى ءۇشىن تانىس جانە بەيتانىس ۇعىم. «استانا ميۋزيكل» – قازاقستانداعى تۇڭعىش مامانداندىرىلعان ميۋزيكل تەاترى دەپ بىلەمىز. مەملەكەتتىك تەاتر – ەۆروپانىڭ ءىرى قالالارىن ارالاپ، مىڭ بوياۋلى ۇلتتىق ونەردىڭ ەڭ ۇزدىك ۇلگىلەرىن الەمگە تانىتىپ ۇلگىردى. ال اتالعان ونەر ۇجىمىنىڭ قازاق ساحنالارىندا كورەرمەندەرمەن جۇزدەسۋى جوسپارلانعان با?

 –  ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى مەن «جاھاندىق الەمدەگى زاماناۋي قازاقستاندىق مادەنيەت» جوباسى اياسىندا «قىز جىبەك» ەتنو-فولكلورلىق ميۋزيكلى ۇسىنعان «استانا ميۋزيكل» تەاترى فرانتسيانىڭ استاناسى پاريجدە، ودان ءارى قاراي كانن، بريۋسسەل، ۆەنا، بەرلين ساحنالارىندا زور تابىسپەن ونەر كورسەتتى. 2016 جىلى قر مادەنيەت جانە سپورت مينيسترلىگىنىڭ قولداۋمەن «قازاقكونتسەرت» مەملەكەتتىك كونتسەرتتىك ۇيىمىندا قۇرىلعان تەاتردىڭ كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى، PhD دوكتور اسحات ماەميروۆ. ميۋزيكل – ەسترادا، حورەوگرافيا، دراما، وپەرا سەكىلدى سان ءتۇرلى ونەردى بىرىكتىرگەن شىعارماشىلىق سينتەز ونەرى. وڭشەڭ جاستاردان قۇرىلعان جاس ۇجىم. ۇجىم ءدال قازىرگى ۋاقىتتا گوسترولدىك ساپاردا ءجۇر. 23-27 ناۋرىز ارالىعىندا الماتى قالاسىندا، قاراشاڭىراق­ –  م. اۋەزوۆ اتىنداعى تەاتردا ونەر كورسەتەدى.

مەملەكەتتىك ميۋزيكل تەارتى – 31 ناۋرىز كۇنى  قازاق ونەرىنىڭ كيەلى مەكەنى شىمكەنت قالاسىندا، «تۇركىستان» سارايىندا «قىز جىبەك» ەتنو-فولكلورلىق ميۋزيكلىن كورەرمەنگە ۇسىنادى. «استانا ميۋزيكل» جاستار ۇجىمىن قولداپ وتىرعان وڭتۇستىك قازاقستان وبلىسىنىڭ اكىمى  جانسەيىت تۇيمەباەۆ مىرزاعا «قازاقكونتسەرت» ۇجىمى اتىنان زور ريزاشىلىعىمىزدى بىلدىرەمىز. 

سۇحباتتاسقان  جانار سىرلىباەۆا

Abai.kz