پريۆولجسك وكرۋگتىك اسكەري سوتى جابىق ەسىك جاعدايىندا وتكەن سوتتا وزبەكستان جانە قىرعىزستان ازاماتتارى بار جەتى ادامدى "تەرروريزم", "زاڭسىز قارۋ ساۋداسى" جانە "جارىلعىش زاتتاردى زاڭسىز ساقتادى" دەگەن باپتار بويىنشا كىنالى دەپ تانىپ، 12 جىلدان 17 جىلعا دەيىن باس بوستاندىقتارىنان ايىردى. بۇل جونىندە سوتتالۋشىلاردىڭ ءبىرى كوزيم ابدۋللاجونوۆتىڭ ادۆوكاتى دەنيس گۋدكوۆ حابارلادى.

"كوزيمجون جانە قالعان التى ادامدى يم توبىنىڭ مۇشەلەرى دەپ ايىپتادى. ولاردى رەسەي بيلىگىنە سيرياداعى اسكەري وپەراتسيانى توقتات دەگەن قارسىلىق ءبىلدىرۋ ارقىلى ەكاتەرينبۋرگتەگى «كارناۆال» ساۋدا ءۇيىن جارماقشى بولدى دەپ ايىپتادى. بىراق سوت پروتسەسى كەزىندە ۇيلەسپەگەن تۇستار وتە كوپ بولدى. ماسەلەن، كوزيمجون تاڭعى ساعات التىدا ءوزىنىڭ پاتەرىندە جىلى كۇرتكە كيىپ وتىرادى ەكەن دە، فسب قىزمەتكەرلەرى ودان گراناتا تاركىلەيدى ەكەن. ەڭ قىزىعى، تاعى ەكى ادامدى ءدال وسىنداي سيپاتتا ۇستاعان. الدىمەن ميگرانتتاردىڭ ۇيىنە وپەراتيۆتى توپ كەلگەن، ودان كەيىن تەرگەۋشى مەن كۋاگەر كەلگەن", – دەيدى دەنيس گۋدكوۆ.

دەنيس گۋدكوۆتىڭ سوزىنشە، وزبەك ميگرانتتارىنا قاتىستى سوت ءىسى جابىق ەسىك جاعدايىندا وتكەن. سۋديا ادۆوكاتتاردىڭ تەرگەۋ ىسىندە زاڭنىڭ بۇزىلعانى جانە سوتتالۋشىلاردى ازاپتاعانى جونىندەگى وتىنىشتەرىن قابىلداماعان.

ايىپتاۋ قورىتىندىسى بويىنشا، سوتتالعان وزبەك ميگرانتتار 34 جاستاعى وزبەك ازاماتى، رەسەيلىك قۇقىق قورعاۋ ورگاندارىنىڭ مالىمەتى بويىنشا «جابحات ان-نۋسرا» (حالىقارالىق «ءال-كايدا» ۇيىمىنىڭ بۇرىنعى بولىمشەسى – رەد.) توبىنىڭ مۇشەسى زيودۋللا يبودوۆتىڭ كومەگىمەن جارىلعىش زاتتار جاساعان. مۇنان بولەك وزبەك ميگرانتتارى سيرياعا 100 اقش دوللارى كولەمىندە اقشا جىبەرگەن.

​دەنيس گۋدكوۆ سوت ۇكىمىنە قارسى جوعارى ينستانتسيالارعا شاعىمداناتىنىن، ودان قالسا ادام قۇقىقتارى جونىندەگى ەۋروپالىق سوتقا دەيىن ارىزداناتىنىن ايتىپ وتىر.

Abai.kz