جەكسەنبى, 22 شىلدە 2018
450 0 پىكىر 16 ءساۋىر, 2018 ساعات 08:55

وزبەك ۇلتتىق تەلەارناسىنداعى ارنايى قىزمەتتىڭ «كۋراتورى» قىزمەتىنەن كەتتى

وزبەكستان ۇلتتىق تەلەراديوكومپانياسى توراعاسىنىڭ قاۋىپسىزدىك ماسەلەلەرى جونىندەگى ورىنباسارى ابدۋسالوم شودمونوۆ قىزمەتىنەن الىندى دەپ حابارلايدى ازاتتىقتىڭ وزبەك قىزمەتى (وزودليك).

ۇلتتىق تەلەراديوكومپانياعا قارايتىن تەلەارنالاردىڭ ءبىرىنىڭ باس رەداكتورىنىڭ وزودليككە ايتۋىنشا، 44 جاستاعى شودمونوۆ ءساۋىردىڭ 6-سى كۇنى جۇمىستان بوساتىلعان. قىزمەت مىندەتى بويىنشا ول ۇلتتىق تەلەراديوكومپانيا قۇرامىن "جاپپاي باقىلاۋدى ۇستاۋ", سونىمەن بىرگە قىزمەتكەرلەردى جۇمىسقا قابىلداۋ جانە بوساتۋ ماسەلەلەرىمەن اينالىسىپ كەلگەن.

ابدۋسالوم شودمونوۆ جۇمىستان بوساتىلعاننان كەيىن وزبەكستان ۇلتتىق تەلەراديوكومپانياسىندا ول اتقارىپ كەلگەن توراعا ورىنباسارى لاۋازىمى دا قىسقارتىلعان دەپ حابارلادى وزودليك تىلشىسىنە مەملەكەتتىك تەلەكومپانيادا ىستەيتىن جۋرناليستەردىڭ ءبىرى.

- بۇعان دەيىن وزبەكستان مۇسىلماندارى ءدىني باسقارماسىنداعى ۇلتتىق قاۋىپسىزدىك قىزمەتى (قازىر مەملەكەتتىك قاۋىپسىزدىك قىزمەتى دەپ اتالادى – ازاتتىق.) كۋراتورى بولىپ ىستەگەن ادام جۇمىستان كەتكەننەن كەيىن ونىڭ اتقارىپ كەلگەن لاۋازىمى قالاي قىسقارسا، شودمونوۆ ىستەگەن قىزمەت لاۋازىمى دا تۋرا سولاي قىسقارتىلدى، - دەيدى وزبەكستاندىق جۋرناليست.

وزبەكستان ۇلتتىق تەلەراديوكومپانياسىندا 21 جىل جۇمىس ىستەگەن، قازىر تاشكەنتتە تۇراتىن تاۋەلسىز جۋرناليست مالوحات ەشانكۋلوۆا "ۇلتتىق تەلەراديوكومپانيا توراعاسىنىڭ قاۋىپسىزدىك ماسەلەلەرى جونىندەگى ورىنباسارى قىزمەتىنە تاعايىندالاتىن ۇلتتىق قاۋىپسىزدىك قىزمەتىنىڭ وكىلى ۇجىمداعى جۋرناليستەردىڭ قىزمەتىن باقىلاۋمەن اينالىسقانىن" ايتادى. ونىڭ سوزىنشە، وسى قىزمەتتى اتقاراتىن ورىنباساردىڭ باسشىلىعىمەن تەلەارنادا "وپپوزيتسيا وكىلدەرىن، ءدىندارلاردى، پاراقورلىق ايىبى تاعىلعان شەنەۋنىكتەردى قارالايتىن ارنايى باعدارلامالار دايىندالعان".

بۇعان دەيىن وزبەكستان مۇسىلماندارى ءدىني باسقارماسى مەن مەشىتتەردە ارنايى قىزمەتتەردەن تاعايىندالعان "كۋراتورلاردىڭ" جۇمىستان بوساتىلعانى تۋرالى حابارلانعان.

Abai.kz

0 پىكىر