ق.راحىمنىڭ "مەن - قازاقپىن" انىنە قاتىستى ايتىس ءجۇرىپ جاتىر. دۇرىس قوي. بىرەۋلەر "قىرت ءان" دەسە، بىرەۋلەر "حيت ءان" دەيدى. بىرەۋلەر ن.ونەرباەۆتىڭ "ەگەمەن قازاقستان" دەگەن ءانىن پارادتا ايتاتىن ءان رەتىندە ۇسىنىپ جاتىر.

اسكەرگە ءان ۇسىنۋ دۇرىس پا؟ دۇرىس، الايدا قانداي ءان ۇسىنۋ كەرەك، ماسەلە سوندا. كەزىندە ءانۇرانىمىز تۋرالى دا كوپ اڭگىمە بولدى ەمەس پە؟ بىراق ۇسىنىلعان ءان، بۇرىنعى ءانۇران ەمەس، حالىقتىڭ ءوزى ءسۇيسىنىپ ورىندايتىن "مەنىڭ قازاقستانىم" ءانۇران بولىپ شىعا كەلدى. كەزىندە ونى "گيمنگە جارامايدى" دەگەن مىقتىلار وسى ءان ايتىلعاندا ورنىنان تىك تۇرىپ، قولىن كەۋدەسىنىڭ سول جاعىنا قويىپ، جىلامسىراپ قايتالاپ ءجۇر.

راسىندا دا، نۇرلان ايتقان ءان جامان ەمەس ەكەن. ءسوزى دە ورنىقتى. بىراق وسىنداي پاتريوتتىق اندەر نەگە كوپ ايتىلمايدى؟ ايتىلسا دا نەگە تەز ۇمىتىلادى؟ ويتكەنى ءبىر-بىرىنە ۇقساس، اۋەنى دە، ءسوزى دە، ورىنداۋشىلىق شەبەرلىگى دە. ءبىر ارنادان شىقپاي، تىك تۇرىپ ايتاتىن اندەر عوي. ەپتەپ ويناقىلىق تا كەرەك، بۇل بيلەپ كەتۋ، ءاننىڭ ارناسىنان اسىپ-توگىلۋ نەمەسە وتان، ەلىم، جەرىم دەگەندى قايتالاي بەرۋ ەمەس. سوزىمەن دە، اۋەنىمەن دە ەرتەڭگى ەل قورعانى، بولاشاق ساربازداردىڭ جۇرەگىن تولقىتاتىن ءان بولۋى كەرەك. ول سوندا عانا ومىرشەڭ، سوندا عانا جاستاردىڭ سۇيىكتى انىنە اينالادى.

ءدۇرالى دۇيسەبايدىڭ Facebook-تەگى پاراقشاسىنان

Abai.kz اقپاراتتىق پورتالىندا جاريالانعان ماقالاعا پىكىر ايتىپ، ويىڭىزدى بىلدىرگىڭىز كەلسە،مىنا پاراقشاعا جازىپ قالدىرىڭىز!

Abai.kz